Ennaan eo an Būreejtōnji eo Kein Kajuon, Jeptōm̧ba 2012
Kwaļo̧k Ko̧jpeļ eo Bōro n̄an Bōro
Anij enaaj kōm̧m̧an karōk n̄an armej ro repojak n̄an bōk ko̧jpeļ eo n̄an ioon ro Rikarejeran me rej kōņaan kwaļo̧k ko̧jpeļ eo. Em̧ōj an kar waļo̧k ilo mour eo am̧ make. Emakijkij in an waļo̧k ej pedped wōt ioon pojak eo an ļōmņak eo am̧ im būruwōm̧.
Ewōr juon m̧ōtta eo ej jar aolep raan n̄an ioon juon eo me ej pojak n̄an bōk ko̧jpeļ eo. Ej bōk ippān juon kape in Bok in Mormon. Bon̄ōn eo m̧okta jān juon tūreep ekadu, eaar jokālet n̄an jab bōk juon kape ippān ijello̧kin bōk juon kaat eo leto-letak. Ak ke eaar pojak n̄an em̧m̧akūt, juon im̧we ilo jetōb eaar itok n̄an e: “Bok juon Bok in Mormon ippam̧.” Eaar likūt ilo pāāk eo an.
Ke juon kōrā eaar jeļā kajien kar jijet iturin ilo tūreep eo, eaar ļōmņak, “En̄in ej ke armej eo?” Liin eaar bar iuwe ippān juon alen ilo tūreep eo rej ro̧o̧l ie. Eaar ļōmņak, “Ekōjkan aō aikuj in kwaļo̧k ko̧jpeļ eo?”
Ijello̧kin, liin eaar ba n̄an eō, “Kwoj kōļļā juon m̧ōttan jon̄oul n̄an kabun̄ eo am̧, kwoj ke?” Eaar ba ej. Liin eaar ba eaar aikuj in kar kōļļā juon m̧ōttan jon̄oul eo an n̄an kabun̄ eo an ak eaar jab. Innām liin eaar kajjitōk, “Ta eo komaron̄ jiron̄ eō kōn Bok in Mormon?”
Eaar kōmeļeļeik bwe bok eo ej juon jeje ko rekwojarjar, bar juon kam̧ool kōn Jisōs Kraist, kar ukook jen Rikanaan Joseph Smith. Liin eaar āinwōt itok limo in, kōn menin eaar etto̧ļ ļo̧k n̄an lowaan pāāk eo an im ba, “kar im̧we eō n̄an bōktok bok in ippa. Ij ļōmņak ej n̄an eok.”
Liin eaar jino riiti. Ke raar jepelļo̧k, liin eo eaar ba, “Kwe im n̄an kōjro naaj aikuj bwebwenato eļap ļo̧k kōn menin.”
Ta eo m̧ōttan eaar jab maron̄ jeļā—ak ta eo Anij eaar jeļā—eaar bwe liin eaar pukōt juon kabun̄. Anij eaar jeļā liin eaar mijōk eo m̧ōtta im ļōmņak etke kabun̄ eo an eaar kōm̧m̧an bwe en lukkuun m̧ōņōņō. Anij eaar jeļā liin enaaj kar kajjitōk kōn Bok in Mormon im bwe liin enaaj kar m̧ōņōņō n̄an katakin jen mijenede ro. Liin eaar pojak. Barāinwōt eo kar m̧ōtta. Kwe im n̄a maron̄ barāinwōt pojak.
M̧aanjabpopo eo jej aikuji ej ilo ļōmņak eo ad im būruwōd. Juon kōrā eaar ron̄ im kememej naan ko kōn Bok in Mormon, Kabun̄ eo kar jepļaaktok an Irooj, im kien eo n̄an kōļļā juon m̧ōttan jon̄oul ko n̄an Anij. Im liin eaar en̄jake ijjino eo an kam̧ool eo an m̧ool eo ilo būruwōn.
Irooj eaar ba Enaaj kar kwaļo̧k m̧ool eo ilo ļōmņak eo ad im ilo būruwōd kōn Jetōb Kwojarjar (lale D&C 8:2). Elōn̄ wōt iaan armej ro kwonaaj ioon er ewōr ippāer ijjino eo an m̧aanjabpopo jab in. Em̧ōj aer ron̄ ak riit kōn Anij im naan eo An. Eļan̄n̄e būruwier ebwe an parōk, raar en̄jake, ijowōt ke ilo jidik, juon kapen kōn m̧ool eo.
Kōrā eo eaar pojak. Barāinwōt kar eo m̧ōtta, Armej eo Rekwojarjar ilo Raan-ko Āliktata me eaar ekkatak kōn Bok in Mormon. Eaar en̄jake juon kam̧ool bwe em̧ool, im eaar kile tōl eo jān Jetōb n̄an bōk juon kape ippān. Eaar pojak ilo ļōmņak eo an im būruwōn.
Anij ej kōpooj armej ro n̄an bōk naan in kam̧ool eo am̧ kōn m̧ool eo kōjepļaaktok. E ej aikuj tōmak eo am̧ innām m̧akūtkūt eo am̧ n̄an kwaļo̧k ilo ejjeļo̧k mijak ta eo em̧ōj an erom lukkuun in aorōk n̄an kwe im n̄an ro kwoj iakwe.
Pojak n̄an kwaļo̧k kōn kanne ļōmņak eo am̧ aolep raan kōn m̧ool ko an ko̧jpeļ eo. Ilo am̧ kejparok kien ko im kauteij bujen ko am̧, kom̧ naaj en̄jake naan in kam̧ool eo an Jetōb eo im ļapļo̧k in iakwe eo an Rilo̧mo̧o̧r n̄an kwe im n̄an ro kwoj ioon er.
Eļan̄n̄e kwoj kōm̧m̧ane ijo kuņaam̧, enaaj ļapļo̧k en̄jake eo em̧m̧an am̧ ioon armej ro me rej kōppopo n̄an ron̄jake naan in kam̧ool eo am̧ kōn m̧ool eo—kar leļo̧k jān bōro n̄an bōro, ko ami n̄an ko aer.
© 2012 jen Intellectual Reserve, Inc. Aolep jim̧we ko rej pād ippān. Kar jeje ilo Amedka. Kōmālim kajin English: 6/11. Kōmālim ukook eo: 6/11. Ukook eo an First Presidency Message, September 2012. Marshallese. 10369 874
Katakin jān Ennaan In
Ļōmņak in riiti ennaan eo ippān baam̧le eo im ekōnono kōn perokūrāāp eo m̧okta jān āliktata, ijo Būreejtōn Eyring ej ekōnono kōn wāween ko n̄an kōkajoorļo̧k naan in kam̧ool eo an juon. Ekōnono ippān baam̧le eo kōn aorōk eo an kwaļo̧k naan in kam̧ool eo n̄e kwaļo̧k ko̧jpeļ eo. Ajri ro ilo baam̧le eo remaron̄ lo bwe ejipan̄ n̄an kōm̧m̧an waanjon̄ak ekōjkan kwaļo̧k naan in kam̧ool n̄an ro m̧ōttad.