Agtutubo
Kararag ken Talna
Maysa a sardam nakisinnuppiatak iti inak ket nagmadi unay ti riknak. Isu nga ingkeddengko nga agkararagak. Nupay madi ti riknak ken diak kayat ti agbalin a “naespirituan,” ammok a makatulong kaniak ti panagkararag a mangparagsak kaniak ken saanak a manakisinnuppiat. Kalpasan ti ipapanaw ti inak iti siled, rinugiak ti kararagko. “Patgek a Nailangitan nga Ama, umayak Kenka ita a rabii gapu ta …” Saan. Nagmulagatak ken pinagsinak dagiti imak; kasla madi dagidiay a balikas. Pinadasko manen. “Nailangitan nga Ama, kasapulak …” Kasla karkarna met dagidiay a balikas. Nariknak a guyguyugoyennak ni Satanas nga isardengko ti kararagko nga agpatpatulong iti Nailangitan nga Ama.
Kellaat a natignayak a mangibaga iti agyamanak kenka! Isu nga inaramidko, ket nangrugi a rimsua dagiti kapanunotan manipud iti isipko maipapan iti amin nga adu a banag a pagyamanak iti Nailangitan nga Amak. Idi nakapagyamanak Kenkuana, inlawlawagko ti agdama a problemak.
Kalpasanna nakariknaak iti nakaskasdaaw a talna iti kaunggak, ti nabara a naespirituan a rikna nga ammok nga ipatpategnak ti Nailangitan nga Amatayo ken dagiti nagannak kaniak ken maysaak nga anak ti Dios. Nabaelak ti dimmawat iti pammakawan iti inak ken immawat iti pammakawanna.