Mensahe iti Visiting Teaching, Oktubre 2012

Panangdayaw kadagiti Katulagantayo

Sikakararag nga adalenyo daytoy a material ken, no maitutop, ilawlawagyo daytoy kadagiti kakabsat a babbai a sarungkaranyo. Usarenyo dagiti saludsod a mangtulong kadakayo a mangpapigsa kadagiti kakabsatyo a babbai ken mangaramid iti Relief Society nga aktibo a paset iti bukodyo a biag.

Pammati, Pamilia, Tulong

Ti visiting teaching ket maysa a pakaipeksaan iti kinadisipulotayo ken maysa a wagas a pangdayawantayo kadagiti katulagantayo bayat ti panagserbi ken panangpapigsatayo iti tunggal maysa. Ti katulagan ket maysa a sagrado ken agtalinaed a kari iti nagbaetan ti Apo ken dagiti annakna. “No mautobtayo nga annaktayo iti katulagan, ammotayo no asinotayo ken no ania ti namnamaen ti Dios kadatayo,” kinuna ni Elder Russell M. Nelson ti Korum dagiti Sangapulo-ket-dua nga Apostol. “Naisurat ti lintegna iti puspusotayo. Isu ti Diostayo ket datayo dagiti taona.”¹

Kas visiting teacher mapapigsatayo dagiti sarungkarantayo kadagiti panagkagumaanda a mangtungpal kadagiti sagrado a katulaganda. Babaen ti panangaramid iti kasta, matulongantayo ida nga agsagana para kadagiti bendision ti agnanayon a biag. “Tunggal kabsat a babai iti daytoy a Simbaan a nagaramid kadagiti katulagan iti Apo ket addaan iti nadiosan a bilin a tumulong a mangisalakan kadagiti kararua, mangidaulo kadagiti babbai ti lubong, mangpapigsa kadagiti pagtaengan ti Zion, ken mangbangon iti pagarian ti Dios,”² kinuna ni Elder M. Russell Ballard ti Korum dagiti Sangapulo-ket-dua nga Apostol.

Bayat ti panagaramid ken panagtungpaltayo kadagiti sagrado a katulagan, agbalintayo a ramit kadagiti ima ti Dios. Kabaelantayonto ti mangilawlawag kadagiti pammatitayo ken mangpapigsa iti pammati ti tunggal maysa iti Nailangitan nga Ama ken ni Jesucristo.

Manipud kadagiti Nasantuan a Kasuratan

1 Nephi 14:14; Mosiah 5:5–7; 18:8–13; Doktrina ken Katulagan 42:78; 84:106

Manipud iti Pakasaritaantayo

Ti templo ket “maysa a lugar a pagyamanan para kadagiti amin a santo,” impalgak ti Apo ken ni Joseph Smith idi 1833. Daytoy ket “lugar a pakaiwanwanan para kadagiti amin a maawagan nga agtrabaho iti panagserbi iti amin nga akem ken pagrebbengan; tapno mapagbalinda a naan-anay iti pannakaawatda iti panagserbida, iti teoria, iti pagbatayan, ken iti doktrina, kadagiti amin a banag a maipanggep iti pagarian ti Dios iti daga”(DkK97:13–14.

Dagiti kakabsat a babbai iti Relief Society idiay Nauvoo, Illinois, iti nasapa a panawen ti 1840 ket tinulonganda ti tunggal maysa a nagsagana para kadagiti ordinansa ti templo. Kadagiti ordinansa ti nangatngato a priesthood a naawat dagiti Santo iti Ud-udina nga Aldaw iti Templo ti Nauvoo, “naipakita ti bileg ti kinadios” (DkK 84:20). “Bayat ti panagtungpal dagiti Santo kadagiti katulaganda, pinapigsa ken tinulongan daytoy a bileg ida iti unos dagiti pannubokda kadagiti nagkauna nga aldaw ken tawen.”³

Iti Simbaan ita nga agdama, agserbi dagiti napudno a babbai ken lallaki iti intero a lubong iti templo ken agtultuloyda a mangbirok iti pigsa kadagiti bendision a mabalin a maawat laeng babaen kadagiti katulagan iti templo.

© 2012 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/11. Pannakaanamongna a maipatarus: 6/11. Pannakaipatarus ti Visiting Teaching Message, October 2012. Ilokano. 10370 864

Ania ti Maaramidko?

Kasano a mapapigsadak dagiti katulagak?
Kasano a tultulongak dagiti ay-aywanak a kakabsat a babbai a mangtungpal kadagiti katulaganda?