Mensahe ti Umuna a Panguluen, Oktubre 2012
Maysa a Tulbek iti Naragsak a Pamilia
Inrugi ti naindaklan nga awtor a Ruso a ni Leo Tolstoy ti nobelana nga Anna Karenina babaen kadagitoy a balikas: “Agpapada amin dagiti naragsak a pamilia; tunggal naliday a pamilia ket naliday iti bukodna a wagas.”1 Nupay awananak iti pannakasinunuo ni Tolstoy nga agpapada amin dagiti nararagsak a pamilia, natakuatak ti maysa a banag a gagangay nga adda iti kaaduan: addaanda iti wagas a panangpakawan ken pananglipat iti biddut dagiti dadduma ken panangkita iti nasayaat.
Iti sabali a bangir, dagidiay adda kadagiti naliday a pamilia ket masansan nga agsapulda iti biddut, pagtalinaedenda ti gura, ken kasla saanda a malipatan dagiti napalabas a nagbasolanda.
“Wen, ngem …” rugian kadagidiay saan a naragsak. “Wen, ngem diyo ammo no kasano ti saem ti panangpasakitna kaniak,” kuna ti maysa. “Wen, ngem diyo ammo no kasano ti kinadakesna,” kuna ti sabali pay.
Nalabit nga agpada a pudno; nalabit a saan.
Adu dagiti tukad ti pagbasolan. Adu dagiti tukad ti pammasakit. Ngem no ania ti nadlawko ket isu ti masansan a panangikalintegantayo iti pungtottayo ken panangpennektayo kadagiti konsensiatayo babaen ti panangisalaysaytayo a mismo kadagiti estoria maipapan iti gandat dagiti dadduma a mangkedngan kadagiti aramidda a kas awan pannakapakawanna ken managimbubukod idinto nga, iti isu met laeng a gundaway, itandudotayo dagiti bukodtayo a gandat a kas nadalus ken nalinteg.
Ti Aso ti Prinsipe
Adda maysa a kadaanan nga estoria a Welsh manipud iti maika-13 a siglo maipapan iti maysa a prinsipe a nagawid iti pagtaenganna a nakakitaanna iti asona nga agar-aruyot ti dara iti rupana. Nagdardaras a simrek ti lalaki ket iti pannakakellaatna, nakitana nga awan ti lalaki a maladagana ken nakabaliktad ti indayonna. Iti pungtotna inasut ti prinsipe ti espadana ket pinatayna ti asona. Idi agangay, nangngegna ti sangit ti anakna a lalaki—sibibiag ti maladaga! Iti sibay ti maladaga nakadasay ti natay a lobo. Kinapudnona, sinalakniban ti aso ti maladaga ti prinsipe manipud iti mammapatay a lobo.
Nupay makapaliday daytoy nga estoria, mangipakpakita daytoy iti maysa a punto. Manglukat daytoy iti posibilidad a ti estoria nga isaritatayo a mismo maipapan no apay nga agtignay dagiti dadduma iti masinunuo a wagas ket saan a kanayon a maitunos kadagiti pudno a pasamak—no dadduma ditay pay kayat a maammuan dagiti pudno a pasamak. Makariknatayo ketdi iti pannakaikalintegan iti bagitayo iti panagpungtottayo babaen ti panagtalinaedtayo iti saem ken guratayo. No dadduma agpaut dagitoy a gura iti adu a bulan wenno tawen. No dadduma agpautda agingga iti tungpal biag.
Nagsina a Pamilia
Maysa nga ama ti saan a makapakawan iti anakna a lalaki gapu iti yaadayona iti dalan a naisuro kenkuana. Addaan ti anak a lalaki kadagiti gagayyem a di inamongan ti ama, ken nagaramid iti adu a banag a maisuppiat iti insuro ti amana a nasken nga aramidenna. Daytoy ti nangparnuay iti panagsina ti ama ken ti anak a lalaki, ket apaman a nabaelan ti anak a lalaki, nagtalaw ken saanen a nagsubli pay daytoy. Manmanon a nagsaritada manen.
Nakarikna kadi ti ama iti pannakaikalintegan? Nalabit ngata.
Nakarikna kadi ti anak a lalaki iti pannakaikalintegan? Nalabit ngata.
Ti laeng ammok ket nagsina ken saan a naragsak daytoy a pamilia gapu ta saan a makapagpinnakawan ti ama wenno ti anak a lalaki. Saanda a malipatan dagiti napait a lagipda maipapan iti tunggal maysa. Pinunnoda dagiti pusoda iti gura imbes nga iti ayat ken pammakawan. Tunggal maysa ket tinakawanna ti bagina iti gundaway a mangimpluensia iti biag ti maysa para iti pagsayaatan. Kasla nakaun-uneg ken nakadakdakkel ti saan a panagkinnaawatan iti nagbaetanda gapu ta ti tunggal maysa ket nagbalin a naespirituan a balud iti bukodna a panagrikna.
Nagasattayo ta ti naayat ken masirib nga Agnanayon nga Amatayo iti Langit ket nangipaay iti wagas a pakaparmekantayo iti daytoy napannakkel a luang. Ti naindaklan ken awan patinggana a Pannubbot ti kangatuan nga aramid ti panangpakawan ken pannakitunos. Ti kinapategna ket nalablabes ngem ti pannakaawatko, ngem paneknekak iti amin a puso ken kararuak maipapan iti kinapudnona ken masinunuo a bilegna. Indiaya ti Mangisalakan ti Bagina a kas pangsubbot para kadagiti basoltayo. Babaen Kenkuana magun-odtayo ti pannakapakawan.
Awan Pamilia a Perpekto
Awan kadatayo ti awanan iti basol. Agar-aramid iti biddut ti tunggal maysa kadatayo, mairamankayo ken mairamanak. Nasugatantayo aminen. Nasugatantayo aminen dagiti dadduma pay.
Babaen ti sakripisio ti Mangisalakantayo a makagun-odtayo iti pannakaitan-ok ken biag nga agnanayon. Bayat ti panangawattayo kadagiti wagasna ken panangparmektayo iti kinapannakkeltayo babaen ti panangpaluknengtayo iti puspusotayo, maisangbaytayo ti pannakitunos ken pannakapakawan kadagiti pamiliatayo ken iti bukodtayo a biag. Tulongannatayto ti Dios nga agbalin nga ad-adda pay a manangpakawan, nga agbalintayo a nataltallugod a magna pay iti maikadua a milia, nga umun-unatatayo a dumawat iti pammakawan uray no saantayo a nagbiddutan ti maysa a banag, a lipatentayon dagiti nabayagen nga im-imetan a gura ket saantayo a lagipen pay dagitoy. Agyamantayo iti Dios, a nangted iti Kakaisuna a Bugbugtong nga Anakna, ken iti Anak, a nangted iti biagna para kadatayo.
Mariknatayo ti ayat ti Dios para kadatayo iti inaldaw. Ditayo kadi kabaelan ti mangted iti ad-adu pay nga adda kadatayo kadagiti padatayo a tao a kas naisuro iti makaay-ayo a himno a “Because I Have Been Given Much”?2 Linuktanen ti Apo ti ridaw para iti pannakapakawantayo. Saan kadi nga umno laeng a lipatentayo ti bukodtayo a panagimbubukod ken kinapannakkel ket rugiantayo ti mangilukat iti dayta naparaburan a ridaw ti panangpakawan kadagiti kasinnuppiattayo—nangnangruna pay iti amin iti bukodtayo a pamilia?
Kamaudiananna, saan a sumangbay ti ragsak manipud iti kinaan-anay no di ketdi manipud iti panangyaplikar iti biag kadagiti nailangitan a pagbatayan, uray kadagiti babassit nga addang. Impakdaar ti Umuna a Panguluen ken Korum dagiti Sangapulo-ket-dua nga Apostol: “Magun-od ti ragsak ti biag ti pamilia no nabangon daytoy kadagiti pannursuro ni Apo Jesucristo. Naipasdek ken napagtalinaed dagiti naballigian a kallaysa ken kaamaan kadagiti pagbatayan ti pammati, kararag, panagbabawi, pammakawan, respeto, ayat, panangngaasi, aramid, ken makaay-ayo nga aramiden iti panagaliwaksay.”3
Ti pannakapakawan ket naitalimudok a mismo iti tengnga dagitoy simple a kinapudno, a naipasdek iti plano ti kinaragsak ti Nailangitan nga Amatayo. Gapu ta pagsisilpuen ti pannakapakawan dagiti pagbatayan, pagsisilpuennana dagiti tao. Maysa daytoy a tulbek, a manglukat kadagiti nakakandado a ridaw, daytoy ti pangrugian ti maysa a pudno a dalan, ken maysa daytoy kadagiti kasayaatan a namnamatayo para iti maysa a naragsak a pamilia.
Sapay koma ta tulongannatayo ti Dios nga agbalin nga ad-adda pay a managpakawan kadagiti pamiliatayo, ad-adda pay a managpakawan iti tunggal maysa, ken mabalin nga ad-adda pay a managpakawan uray pay iti bagbagitayo. Ikararagko ta sapay koma ta mapadasantayo ti managpakawan a kas maysa a kapintasan a wagas a pakapagpapadaan ti kaaduan a nararagsak a pamilia.
© 2012 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/11. Pannakaanamongna a maipatarus: 6/11. Pannakaipatarus ti First Presidency Message, October 2012. Ilokano. 10370 864
Panangisuro manipud iti Daytoy a Mensahe
“Bayat ti panangisaganayo iti tunggal leksion, saludsodenyo iti bagiyo no kasano a maipada ti pagbatayan iti maysa a banag a napasaranen dagiti miembro ti pamilia kadagiti bukodda a biag” (Teaching, No Greater Call [1999], 171). Ibilang ti panangawisyo kadagiti miembro ti pamilia a mangibinglay kadagiti napipintas a padasda wenno napaliiwda maipapan iti pammakawan. Ilawlawagyo dagitoy a padas, a yunay-unay dagiti bendision ti pammakawan. Gibusanyo babaen ti panangyebkas iti pammaneknek maipapan iti kinapateg ti panangpakawan iti tunggal maysa.