Ngeasek
Nglunguuch me a Budech
Ta er a klebesei e ak kuluutoketok er a delak me ng kmal mlo mekngit a renguk. Me ak mocha kongei el mo meluluuch. Me ng uaisei el mle mekngit a renguk e dimlak el soak el mo “mui er a reng,” ak mle medengei el kmo a nglunguuch a mo ngosukak el mo ungil a renguk e diak sal el outeketok. Uriul er a lorael a delak er tia elel delmerab, e ak mlo omuchel el meluluuch. “Betik er a renguk el Chedam er a Babeluades, ak mei er Medam er chelechal kesus e le …” Diak. Ak milok a medak e ngmai chimak; se ko er a dimlak el ungil oderngesall. Ak liluut el melasem. “Chedam er a Babeluades, a kuusbech …” Sei me ng dirrek el kora ngodech. Ak mle melchesiu er a Diablong el mengetikaik er ngak el choitii a nglunguchek el olengit a ngeseu er a Chedam er a Babeluades.
Ng dimlak el meketeket e ak mlo modubech el kirek el oureng a saul! Me ak mocha rullii, e a uldasu a omuchel el metebtobed er a uldesuek er a ike el betok el tekoi el ngak a sebechek el oureng a sulel a Chedam er a Babeluades el kirel. Se er a bok merek el oureng a Sulel, e ak mlo mesaod er a mondai el chelebangel er ngii.
A uriul e ak mlo melchesuar er a ungil budech, el omelchesiu er sel mekeald el reng el kudengelii el kmo a Demad er a Babeluades me a rechad er a blik a betik a rengrir er ngak e ngak a ngelekel a Dios. Ng mlo sebechek el ousubes er a delak e dirrek el kongei a ike el klausubes er ngii.