Klumech er a Oldingel e Olisechakl, Ongeteruich el Buil 2012
Mengull a Telbiled
Mosuub er tial klumech, e a di lungil, e msodii lobengterir a rodos el moldingel er tir. Mousbech aikel ker el smisicheterir a rodos e dirrek el rullii a Relief Society meng mo klou a belkul er a klengar kau.
Klaumerang, Telungalek, Ngeso
Oldingel e olsisechakl a ta er a ochotii a doltirakl e ta er a rael el mo mengull a telbiled sel dosiou e dolisiich er a ta me a tang. A telbiil a ta er a cheledaol e melemolem el yaksok er a delongelel a Dios me a Rengelekel. “Sel bo dolchesuar el kmo kid a rengalek er a telbiil, e ke de medengei el kmo ke de ua techang e ngera longerchir er kid a Dios,” ng dilu a Elder Russell M. Nelson er a Chelechad er a Teruich me a Terung el Apostol. “A llechul a lluches er a chelsel a rengud. Ngii a Dios er kid e kid a Chedal.”1
Me sel doldingel e olsisechakl e ng sebeched el melisiich er tirkel doldingel er tir eolngeseu er tir el mo otirakl a chedaol el telbilir. Me sel doruul er ngii, e ke de ngosuterir el mengedmokl el kirel a klengeltenget er a diak a ulebengelel klengar. “Rokui el rudos er tia el Ikelesia el mla meruul a telbilir lobengkel a Rubak a ngar er ngii a chedaol el ngerachel el olngeseu el mo olsobel a klengar, e momekrael er a redil er tia el beluulechad, e melisiich a delengchokl er a Zion, e dirrek lomekedechor er a rengedel a Dios,”2 ng dilu a Elder M. Russell Ballard er a Chelechad er a Teruich me a Terung el Apostol.
Me sel doruul e doltirakl a chedaol el telbiil, e ke de mo dongu er a chimal Dios. Ke de mo sebeched el locholt a klaumerang er kid e melisiich er a klaumerang er a ta me a ta el kirel a Chedam er a Babeluades me a Jesus Kristo.
Ngar er a Chedaol Llechukl
1 Nephi 14:14; Mosiah 5:5–7;18:8–13; Doctrine and Covenants 42:78; 84:106
Ngar er a Reksi er Kid
A templo a “basio er a omereng el saul el mo er a rokui el santo,” a Rubak a ulechotii el mo er a Profet Joseph Smith er a 1833. Ngii a basio er a omsodel a tekoi el mo er tirkel rokui el mla mokedong el mor tia el uroer er a ikel kakerous el deruchall me a obis; me ng mo ungil el diak a telmellel er a klemedengei er tir er tia el ureor, me a uldasu, me a osisechakl, me a chedaol llechukl, er a rokui el tekoi el kirel a rengedel a Dios er tia el beluulechad (mesa D&C 97:13–14).
Rudos er a Relief Society er a Nauvoo, Illinois, er a uchelel a 1840s a ulngeseu er a ta me a ta el mengedmokl el kirel a chedaol ruoll er a templo. Chelsel a chedaol ruoll er sel ngarbab el priesthood el ngilai a Ruriul-klebesei el Santo er a Templo er a Nauvoo, a klisiich er a kldios [a mlo] chemolt (mesa D&C 84:20). “Me se er a Resanto a loltirakl a telbilir, e tia el klisiich a mlo mesisiich e ngosuterir er a ike el lemechitechut er ngii er a sils me a rak el ngar mederir.”3
Chelsel a Ikelesia er chelechang, e a mesisiich a klaumerang er tir el redil me a sechal er tia el beluulechad a mesiou er a templo e melemolem losiik a klisiich er a klengeltengat el kmal di sebeched el ngmai lokiu a telbiil er a templo.
© 2012 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/11. Kengei er a oidel: 6/11. Oidel a Visiting Teaching Message, October 2012. Palauan. 10370 881
Ngera Sebechek el Rulii?
-
Ng mekerang e a telbilek a smisichak?
-
Ng mekerang e a kulngeseu er a rudos el kumes er tir el moltirakl a telbilir?