Klumech er a First Presidency, Ongeteruich el buil 2012
Ta er a Kiis er a Deureng er a Telungalek
A ta er a merael a chisel el chad ra omeluches el Leo Tolstoy a ulemuchel el meluches el kirel a Anna Karenina el olab a ikakid el tekoi: “A deureng er a telungalek a rokui el di osisiu; a rokui el diak a deureng er ngii el telungalek a diak el ungil er a kuk di teletelir.”1 Me ng uaisei el ngak a diak kuba klaumerang er a Tolstoy el kmo rokui el ungil telungalek a di osisiu, ak mla metik er a ta el tekoi el osisiu er tir: ngar er ngii a rolir el ousubes e obes a ike el telitur er a rebebil e omes er sel ungil.
Tirke el diak a deureng er tir el telungalek, a blechoel el metik a mekngit, e urrekodel er a klengit el reng, e diak el sebecherir el obes a mla mo merek.
“Uaisei, e ng di …” tomuchel tirke el diak a deuil a rengrir. “Uaisei, e ng di ng diak modengelii a klungel a mekngit el rirellii el me er ngak,” ng dula tang. “Uaisei, e ng di ng diak modengelii el kmo ng mekngit el ua ngerang,” dula chimong.
Ng locha meral tekoi a lolekoi el terung; malechub e ng diak.
Ng kmal betok a telkael er a klengit. Ng kmal betok a telkael er a telemall. E ng di ak mla metik er ngii el kmo kid a blechoel el ochotii a ngesechel a rengud e mo oltirakl er a soal a uldesued e di kid el ouchais er kid a tekoi el kirel a mekngit el omerellir a rechad el ledu el kmo ng diak el sebeched el ousubes e diak el ludesuall, e a osisiu el taem, e kede oldubech a teleteled el kmo ke de klikiid e beches.
Chermel a Prince el Bilis
Ngar er ngii a cheldecheduch er a Welsh er se er a 13th century el kirel a prince el mle remei e metik er a cheremel bilis el oldalech a rasech er a medal. Ngika el chad a rirurt el tmuu er a blai e, ng mlo medakt, le ng milsa ngelekel tolechoi el sechal el dibus e a dukellel a chebecheb. Me ng ngesechel a rengul e a prince ultebedii a saider er ngii e mekodir a cheremel bilis. Ng di mle telekib, e ng rirengesiiu a lengelel a ngelekel—a tolechoi a dirk chad! E a bita er a tolechoi a ulekeuad el okami. A mera er ngii, ea bilis a, silbecheklii a ngelekel a prince er a omekeuad el okami.
Me ng uaisei el tia el cheldecheduch a kmalsmiich, le ngochotii a moktek. Ng ochotii el kmo ng sebechel a cheldecheduch el douchais er kid el kirel a teletelir a rebebil a diak el blechoel el klemerang—e a le bebil e ng diak el soad el mo medengelii a klemerang. Ke de bai mo melchesiu a uchul a ngesechel a rengud el kmo ng kirel uaisei me ke de urrekodel er a kngtil a rengud me a ngasechereng. A le bebil e a ikakid el mekngit el reng a sebechel melelmolem el mo buil me a rak. A le bebil e ng sebechel melemolem el mo cherechar.
Ng Telunglek el mla Obii
Ta er a chedam el diak el sebechel el ousubes er a ngelekel el milrael el mocheroid er a rael el ngii a mlosisechakl er ngii. Ng ka el buik a mla er ngii a rsechelil el demal a dimlak el kengei er tir, e ngii a riruul a betok el tekoi el ngodech er a ike el demal a ulemdasu el kmo ng kirel meruul. Tia a rirelii a chedam me a ngalek el mo chacheroid, me sel rechedel a buik el mo sebechel, e ng mlo ikrii a blil e dimlak a luut er ngii. Ng dimlak el luut el chadecheduch.
A chedam ng mlo melchesuar el kmo ng melemalt? Ng locha uaisei.
E a ngalek ng mlo melchesuar el melemalt? Ng locha uaisei.
E ng di a kmedengei el kmo tia el telungalek a ulebii e diak a deureng er ngii e le ng ka el chedam me a lechub e ng ka el ngalek a diak el sebechel el ousubes er a tang. Ng diak el sebecherir el mengai osengir er a mla mo merek el tekoi er a delongelir. Te milkeek a rengrir er a ngasechereng el mo ngaruchei er a beltik er reng me a klausubes. Derta er tir a mla choitii a techall el mlo sebecherir el olngeseu er a klengar er a ta el mo er a ungil. A ulemii er a delongelir a chemolt el kmal dmolech e meteu el tir a milcheseches a rengrir er a blekerdelir.
Kede ngeltengat, e le a betik er a rengul el melemalt el Diak a Ulebengelel el Chedam er a Babeluades a mla meskid a rael el mo rokir a klengarbab el reng. Sel klou e diak a ulebengelel el Tngakireng a di chimo el teletael er a klausubes me a kltal reng. A klungel a klou er sel kudengelii, e ng di a kuuchais e oumera el oba renguk me ngak el rokir er a klemerang er ngii me a meral klisichel. A Osobel a di mle Ngii el tongetengii el kirel a kengtid. Ngokiu Ngii e kede ngmai a klausubes.
Ng Diak a Telungalek el Melemalt
Ng diak a ta er kid el diak a kengtil. A rokui el chad a mo cheleuid, el uldimukl er kau me ngak. Kede rokui el mla metemall. Kede rokui el mla tomelterir a rebebil.
A Osobel a mlo chuarm el uchul me ng mo sebeched el mo suobel e mo nguu a diak a ulebengelel klengar. Me sel de kengei a Omerellel e chemoit a ngarbab el reng lokiu a omelemdemk er a rengud, e ng sebeched el ngmai a kltalreng me a klausubes el mo er a telungalek er kid me a kuk di klengar er kid. A Dios a mo ngosukid el mo mui el ousubes, e mo mui el outekangel el mo rolii a ongeru el mile, e mo kot el ousubes ngii mal dimlak el kngtid, e mo mechei a mechut el klengit el reng e diak deluut el omriuch. Omereng el saul el mo er a Dios, el Ngii a mileskid a di Chimo el Ngelekel, e mo er a Ngelekel Sechal, el Ngii a mlo odersii a klengar er ngii el kired.
Ng sebeched el mo melchesuar a beltkil a rengul a Dios el me er kid er a bek el sils. Kid ng diak el kired el mo sebeched el ngosukii a ta er kid el mo er a tkul rebab el sebeched el di ua sel osisechakl el ngar sel klebokel el chelitakl “Because I Have Been Given Much”?2 A Rubak a mla mekengii a chesimer el mei er kid el mo ng mai a klausubes. Ng diak el bai le melemalt a dengai a uldesued er kid me a klengarbab el reng e domuchel mekengii a chesmerel a klengeltengat er a klausubes el mo er tirkel kid a ousbech a ngeso—tokuni tirke el rokui el ngar er a telungalek er kid?
E a ulebongel, a deureng a diak le bo er ngii el okiu a tekoi el diak a chebirkelel ng bai mo er ngii sel doltaut a ika el cheledaol el osischakl, mo lmuut er a ike el mekekerei el bakes. A First Presidency me a Chelechad er a Teruich me a Terung el Apostol a mla melekoi: “Deureng er a klengar er a telungalek a blechoel el sebeched el nguu alsekum e ng meruul loltirakl a osisecheklel a Rubak el Jesus Kristo. A ungil chebechiil me a telungalek a sebechel mekedmokl e melemolem el ultuil er a osischakl er a klaumerang, nglunguuch, ouchel reng er a klengit, klausubes, omengull, beltik el reng, klechubechub, ureor, me a ungil e ngar er ngii a belkul el omilil me a omeruul.”3
Klausubes a ngar sel kmal belengel a ika el kmal bleketakl el klemerang, el mlengai er a uldesuel a Chedam er a Babeluades el kirel a deureng. E le klausues a omak a osisechakl, ng dirrek el omak er a rechad. Ngii a kiis, el omok a chelseches el chesimer, ng uchelel a meral rael, e dirrek el ta er a kot el urunguled el kirel a deureng er a telungalek.
A Dios bo el olngeseu er kid el mo sebeched el mui el ousubes er a chelsel a telungalek er kid, mui el ousubes el mo er a ta me a tang, e dirrek el mo mui el ousubes er kid. Ak meluluuch me bol sebeched el mo medengelii a klausubes el ta er a ungil rael el oumesingd el deureng er a telungalek a dmak el osisiu.
© 2012 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/11. Kengei er a oidel: 6/11. Oidel a First Presidency Message, October 2012. Palauan. 10370 881
Osischeklel Tia el Klumech
“Sel mongedmokl er a ta er a suobel, moker er kau el kmo ng mekera tia el osisechakl a di ua kmo ngerang el chad er a telungalek er kau a medengelii er a chelsel a klengar er tir” (Teaching, No Greater Call [1999], 171). Momdasu el omekedong er a telungalek er kau el mo ocholt a ike el ungil el bla bo lodengei me a lechub e te mla mes lokiu a klausubes. Mosaod a ika el bla bo lodengei, e lmuut el smisichii a klengeltengat er a klausubes. Mongesimer el ouchais er a klaumerang er kau er sel klou el belkul a dousubes er a ta me a tang.