Ang Bag-ong mga Himan Makatabang sa mga Miyembro sa Pag-andam og Family Names

Sa sulat nga pinetsahan og Oktubre 8, 2012, ang Unang Kapangulohan midapit sa mga miyembro—ilabi na sa mga batan-on ug mga young single adult—sa pagdawat sa hingpit nga mga panalangin sa templo pinaagi sa pag-andam sa ilang mga family name nga dalhon sa templo.

Dugang pa, kadtong “daghang gi-reserved nga mga family name [giawhag] sa pagpagawas niining mga ngalan sa saktong panahon aron ang gikinahanglang mga ordinansa mapahigayon.”

Sa pagtabang sa mga miyembro nga makatubag sa panawagan sa Unang Kapangulohan, ang Simbahan naghimo og bag-ong mga kapanguhaan ug kasinatian, nga mabasa sa 10 ka pinulongan sa familysearch.org.

Ang bag-ohay lang nga gi-upgrade nga new.familysearch.org nga gitawag og Family Tree, pananglitan, adunay gipanindot nga paagi sa atong family history pinaagi sa pagtugot sa mga tiggamit nga (1) makakonekta ug makahan-ay sa shared family lines, (2) maka-edit ug maka-delete sa sayop nga data, ug (3) sayon nga makasumiter sa mga ngalan sa katigulangan para sa mga ordinansa sa templo. Ang mga tiggamit makakita usab sa mga video sa “Assigning Names to the Temple” ug uban pang mga pagbansay sa familysearch.org/treetraining.