Yut
Dei Bifo Krismes we I Stret Evriwan
Taem mi bin stap groap, wan long ol bes pat long evri yia, i Dei Bifo Krismes. Famle blong mi mo mi, bae i mekem pidsa, go singsing, mo afta, kam tugeta blong wan Krismes divosen. Mifala i singsing, wetem voes we i seksek, long ol hym wetem ol fo defren pat, mo mifala i plei ol krismes singsing laod wetem ol tul blong miusik. Papa bae i endem naet wetem wan tingting blong Krismes we bae i livim mifala wetem ol krae blong glad. Laef i no save gud moa bitim Dei ia Bifo Krismes.
Taem mi kam bigwan smol, mama blong mi i stat blong lukaot long wan yangfala neiba, Keli. Keli i bin stap kam long haos blong mifala evri dei afta skul, taem mama blong hem, Pati, i stap go wok. Keli i bin stap folem mi raon olsem wan smol dog—we i toktok laod mo i wantem samting. Oltaem, mi bin filim gud taem Pati bae i kam tekem gel blong hem, mo i livim hom mo famle blong mi long pis.
Wan taem long manis Disemba, mi bin kros taem mama i bin invaetem Pati mo Keli blong joenem mifala long Dei Bifo Krismes. Dei blong Mi Bifo Krismes. Mama i smael mo i talem gud long mi: “Bae i no gat samting i jenis.” Be mi bin save gud. Bae oli kakae evri pidsa blong mifala. Keli bae i laf long singsing blong mifala. Mi sarenda nomo se hemia bae i Dei Bifo Krismes we bae i nogud moa.
Taem we naet i bin kam, Pati mo Keli i kam joenem mifala, mo mifala i bin storian, mo laf, mo singsing. Mama blong mi i bin talem stret. Hem i bin stret gud evriwan. Long medelnaet, tufala i bin talem tangkyu mo tufala i bin go nomata tufala i wantem stap yet. Mi bin go long bed wetem wan hat we fulap long lav mo tangkyu. Mi bin faenem se ol tru presen blong Krismes oli no stap kam smol taem yumi serem olgeta. Be, oli kam swit moa mo oli kam moa plante taem yumi stap givim olgeta i go.