2012
Visiting Tijing, Wan Wok blong Fasin blong Sevem Man
Disemba 2012

Visiting Tijing Mesej, Disemba 2012

Visiting Tijing, Wan Wok blong Fasin blong Sevem Man

Wetem prea, stadi long toktok ia, mo olsem we i stret, toktok raon long hem wetem ol sista we yu stap visitim. Yusum ol kwestin blong helpem yu blong mekem ol sista blong yu oli kam strong moa mo blong mekem Rilif Sosaeti i kam wan aktiv pat long laef blong yu.

Pikja
Rilif Sosaeti sil

Fet • Famle • Help

Visiting tijing i givim long ol woman, wan janis, blong lukaotem, mekem i kam strong, mo tijim wanwan long olgeta—i tru, hem i wan wok blong fasin blong sevem man. Tru long visiting tijing, ol sista oli givim seves long bihaf blong Sevya, mo oli stap helpem ol woman blong oli rere from ol blesing blong laef we i no save finis.

Presiden Spensa W. Kimbol (1895–1985) i talem se, Lod, long ol revelesen blong Hem, i bin talem se yumi mas givim woning, eksplenem, askem strong, mo tij, mo invaetem ol narafala man blong kam long Kraes (luk long D&C 20:59). Presiden i talem moa, i talem se: “Testemoni blong yufala i wan rod we i gud tumas.”1

Taem yumi, olsem ol visiting tija, yumi stap kam antap long save blong yumi long saed blong ol trutok blong gospel, testemoni blong yumi i sapotem mo i mekem i kam strong ol sista ia we oli stap rere blong kasem baptaes mo konfemesen. Yumi stap helpem ol niufala memba blong oli fas strong insaed long gospel. Ol visit mo lav blong yumi, oli help blong “winimbak olgeta we oli bin go lus mo i help blong mekem hat blong olgeta we oli kam kolkol long gospel i kam hot bakegen.”2 Mo yumi stap leftemap tingting blong ol sista blong kam long Kraes tru long fasin blong go long tempol.

Presiden Kimbol i talem long ol visiting tija: “Bae yufala i sevem ol sol, mo huia bae i save talem; be plante long ol gudfala aktiv pipol insaed long Jos tedei, oli aktiv from se yu bin stap insaed long hom blong olgeta, mo givim olgeta wan niufala wei blong luk samting, wan niu visen. Yu bin pulum rido i open. Yu bin mekem tingting blong olgeta i lukluk i go longwe. …

“Yu luk. Yu no stap sevem ol sista nomo, be ating, yu stap sevem ol hasban blong olgeta tu, mo hom blong olgeta.”3

I Kamaot long Ol Skripja

Doctrine and Covenants 20:59; 84:106; 138:56

I Kamaot long Histri blong Yumi

Taem Profet Josef Smit i bin oganaesem Rilif Sosaeti, hem i bin talem se ol woman, bae oli no lukaotem olgeta we oli pua nomo, be tu, bae oli sevem ol sol. Hem i bin tijim tu se ol woman insaed long Jos oli gat ol stamba wok insaed long plan blong Papa long Heven long saed blong fasin blong sevem man.4 Yumi, olsem ol sista blong Rilif Sosaeti, wetem ol prinsipol we Profet Josef Smit i bin tijim blong lidim yumi, yumi save wok tugeta blong mekem ol woman mo famle blong olgeta oli rere from ol blesing blong God we oli moa bigwan.

“Yumi mas gat lav mo sore long wanwan long yumi,” Presiden Brigham Yang (1801–77), i talem, “mo olgeta we oli strong oli mas lukaot gud long olgeta we oli no strong long bodi, mo olgeta we oli save luk samting oli mas lidim olgeta we oli blaen kasem taem oli save faenem rod olgetawan.”5

© 2012 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/11. Oli letem translesen: 6/11. Translesen blong Visiting Teaching Message, December 2012. Bislama. 10372 852

Ol Not

  1. Spencer W. Kimball, insaed long Daughters in My Kingdom: The History and Work of Relief Society (2011), 116.

  2. Eliza R. Snow, insaed long Daughters in My Kingdom, 83.

  3. Spencer W. Kimball, insaed long Daughters in My Kingdom, 117.

  4. Luk long Joseph Smith, insaed long Daughters in My Kingdom, 171–72.

  5. Brigham Young, insaed long Daughters in My Kingdom, 107.

Wanem Mi Save Mekem?

  1. Olsem wanem nao Rilif Sosaeti i stap mekem mi mi rere from ol blesing blong laef we i no save finis?

  2. Wanem nao mi save mekem blong mekem fet, blong olgeta we mi stap lukaotem, i kam antap?

Printim