Jodikdik ro
Bon̄ōn eo Eweppān M̧okta jān Kūrijm̧ōj
Ke Iaar rūttoļo̧k, juon iaan m̧ōttan ko rem̧m̧an an kajjojo iiō eaar Bon̄ōn eo M̧okta jān Kūrijm̧ōj. Baam̧le eo aō im n̄a kar kōm̧m̧an pizza, kar etal in al, innām koba n̄an juon nokon in jota in Kūrijm̧ōj. Kōm kar al al ko ilo emen m̧ōttan ko jokkun wōt juon rōudiddid im buuļ al kōn kein kōjan̄jan̄ ko am rokoktaktak. Baba iien otemjeļo̧k eaar kōjem̧ļok joten eo kōn juon ļōmņak an Kūrijm̧ōj me kar letok n̄an kōm kōmejaaļaļ in m̧ōņōņō. Mour eaar jab em̧m̧an ļo̧k jān Bon̄ōn eo M̧okta jān Kūrijm̧ōj.
Ke Iaar rūtto tak jidik, jiņō eaar jino lale juon ajri riturim edik, Kelly. Kelly eaar itok n̄an m̧weo imōm̧ aolep raan ālkin jikuuļ ilo an jinen, Patty, kar jerbal. Kelly eaar ļoor eō jabdewōt jikin āinwōt puppy—koļap im aikuj. Eaar iien otemjeļo̧k juon kakkūje n̄e Patty eaar itok im bōk leddik eo nejin im kōtļo̧k bwe kapjuknen eo am im baam̧le eo en pād ilo aenōm̧m̧an.
Juon Tijemba, Iaar illu ke m̧am̧a eaar karuwaineneik Patty im Kelly n̄an koba ippām n̄an Bon̄ōn eo M̧okta jān Kūrijm̧ōj. Bon̄ōn eo M̧okta jān Kūrijm̧ōj eo Aō. M̧am̧a eaar ettōn̄ im kam̧ool n̄an eō, “Eban ukōt juon men.” Ak iaar jeļā em̧m̧anļo̧k. Renaaj kar kan̄ aolep pizza ko kijem. Kelly enaaj kar kōm̧m̧an kōjak kōn am al. Iaar kōtmene im bōk bwe menin enaaj kar Bon̄ōn eo M̧okta jān Kūrijm̧ōj enana otem nana.
Ke joten eo eaar itok, Patty im Kelly kar koba ippām, im kōm kar kōnono im ettōn̄ im al. Jinō eaar jim̧we. E eaar weppān. Ilo lukōn bon̄ōn eo raar kam̧oolol kōm im m̧akoko in kar rool. Iaar etal n̄an jikin kiki kōn juon bōro eobrak kōn iakwe. Iaar lo bwe menin leļo̧k ko rem̧ool raorōk an Kūrijm̧ōj rejjab jakoļo̧k n̄e ajeji. Ijello̧kin rej em̧m̧anļo̧k im orļo̧k n̄e jej liļo̧k.