Poraus seni ewe Aewin Presetensi, December 2012
Kunasefanni ewe Ngunun Krismas
Me nomw nupwen ngang emon elter, ua angei ai kokko pwe upwe fiti ekkoch aramas ne feino ren eu pioing non Salt Lake City me efeiochu semirit mi semwen. Nupwen aua tonong, aua kuna efoch iran achechemen Krismas me saramen me kinamwen an kewe tengki o aua pwan kuna ekkoch niffang mi tukutuk fan paan ewe ira. Mwirin chok ena aua pwan tonong non kengkangen ewe imw minne a nom ekkoch kukkun at me nengin— ekkoch neir a wor ar minen achikar won pour ika pecher, pwan fitemon mi wor ar sokkun semwen me samau rese tongeni chikarokai ren—ra pwan kapwong ngeni kem ren mesen pwapwa.
Emon at mi kukkun, nge a watte an semwen a kokkoriei, “Ifa itom?”
Ua ereni i itei, iwe a kapas eis ngeniei, “Ka tongeni efeiochuei?”
Atewe a angei an efeioch, me nupwen aua kunu ne feino seni an pet, a apasa, “Kinisou chapur.”
Aua poputa ne fetan nge ua rong an kokko, “Oh, Brother Monson, merry Krismas ngonuk.” Iwe atewe a mesen pwapwa me a wesen emenimen.
A nom ren ena at ewe ngunun Krismas. Amo itä ewe ngunun Krismas a och mettoch epwe nom non netipach me manauch—esap ren ei fansoun chok nge pwan non unusen ewe ier.
Nupwen ewe ngunun Krismas a nom rech, sia chechemeni I ewe emon ion uputiwan sia chechemeni non ei kinikinin ewe ier: “Non ei ran ikenai a uputiw non teninimwen David ami we Chon Amanau Christ, ewe Samol” (Luke 2:11).
Non ach fansoun ewe ngunun fangeno niffang a eu sokkun angang sia föri ren apwapwan atun Krismas. Ua nafareni ika sipwe feioch ren ach sipwe pwisin eisini kich, Met sokkun niffang ewe Samon epwe mochen ngang upwe ngeni I ika ngeni pwan ekkoch non ei fansoun non ei ier?
Upwe mwo apasa pwe Semach won Nang a mochen emon me emon kich sipwe fangeno ngeni I pwan tori Noun we At ewe niffangen aneasochis. Ua pwan mefi pwe epwe tingorei kich ach sipwe fang seni pwisin kich nge sisap pwan kichingau ika tipemmong ika tipeweires, usun Noun we At a aitikich non Ewe Puken Mormon:
“Iwe, ennet, ennet ua apasa ngeni ami, are emon a anomu ren ewe ngunun anini, iwe esap i nei, pwe I noun ewe tefin, I ewe a … atai netipen aramas ar repwe uren song pwe repwe aninifengen nefiner.
“Nengeni, pwe esap iei usun pungun netipei pwe upwe wisen awora anini nefinen aramas are fori met repwe song fengen nefiner, pwe wisei ua mochen ataeno ekkei minen atatakis nefinen aramas” (3 Nifai 11:29–30).
Non ei amwararen fansoun soponon, ach tufichin tong me anisi mi tongeni fis fan chommong, nge mi pwan tongeni monono. Ikenai mi wor netip sipwe apwapwai, mi wor kapas mi pwetete ach sipwe apasa, foffor ne fori, me ngunun aramas sipwe amanaua.
Emon a kuna namwoten ewe ngunun Krismas a makkei:
Ngang ewe Ngunun Krismas—
Ua tonong non imwen ir mi osupwang, ua efisata mesen pwapwa won mesen semirit mi mesengau o sukano meser, non amwarar.
Ua epichano poun ewe emon mi kichingau ina minne ua asarama ngunun.
Ua fori pwe ekkewe chinap repwe usun serafö me tatakir usun ra för me nomw.
Ua anomu manauen tong non netipen ekkewe semirit, me asarama ar annut ren tan mi amwarar.
Ua efisata mochenin aninis non pechen aramas, iwe netipen aramas ra mwar ren ochun ei fonufan.
Ua föri pwe ewe aramas mi tutumunungau ren an moni epwe kouno seni an föfför mi asonap me tinano eu niffang ngeni emon mi noninen me efisi kechiwen pwapwa—chonun mas epwe amonono riaffou.
Ua tonong non rumwen kanupus, me achema ngeni aramas usun itä met epwe fis me apwapwa ir ngeni ekkewe ran mi allim rese mwo feito.
Ua anifenong non mosonoson, imw mi pwech imwen metek, me tunn auw mi apwangapwang rese tongeni kapas nge chechech chok non mosonoson, ennetin kinisou.
Fan fite ngörou napanap, ua föri pwe ewe fönufan non an pekus epwe nennetä ngeni mesen Kot, me non ekis chok fansoun monukano mettoch mi kukkun me ngau.
Ngang ewe Ngunun Krismas.1
Amo sipwe kunasefanni ewe ngunun Krismas—ewe mwo Ngunun Kraist.
© 2012 seni Intellectual Reserve, Inc. Meinisin pung mi kawor. A for non Merika. Kapungunon non fosun Merika: 6/11. Kapungunon chiakun: 6/11. Chiakun ewe First Presidency Message, December 2012. Chuukese. 10372 901
Afanafan seni Ei Poraus
Non om kopwe afanafan ngeni om famini usun an Preseten Monson poraus, kopwe anamwota ewe kapas eis a aani ngeni kich usun met sokkun niffang ewe Samon a mochen sipwe fang ngeni I ika ngeni ekkoch aramas non ei fansoun. Kopwe pesei chon om famini ar repwe makkei mefier (ika, fan iten semirit, chungani sasing) won ifa usun ach sipwe “Kunasefanni ewe ngunun Krismas—ewe mwo Ngunun Kraist.”