iTukutuku ni Mataveiliutaki Taumada, Tiseba 2012
Laukune Tale na Yalo ni Siganisucu
Me vaka e dua na italatala qase gone ena vica na yabaki sa oti, au a kacivi vata kei ira eso tale ki na dua na valenibula e Salt Lake City me ra laki vakalougatataki kina na gonelalai tauvimate. Neimami yaco yani, keimami raica e dua na vunikau ni Siganisucu kei na kena cina rarama vakaciriloloma vakakina na ioloolo ologi vakamatau ka ra sa tuvai tu e rukuna. Keimami sa qai curuma yani na tadrua ka ra tu kina na gonetagane kei na goneyalewa lalai—eso e palasita simede tu na ligadra se yavadra, eso tale era tauvimate ka rairai sega ni rawa me totolo nodra vakabulai—era kidavaki keimami ena matadredredre.
E dua na gone tagane lailai, tauvimate e a tarogi au mai, “O cei na yacamu?”
Au tukuna vua na yacaqu, ka qai tarogi au, “E rawa ni ko vakalougatataki au?”
A qai mani vakalougatataki, ia ena neitou vuki ka biubiu mai ena nona idavodavo, a kaya, “Vinaka vakalevu.”
Keitou sa cavu ikalawa vakavica, au qai rogoca nona kaci, “Oi, Baraca Monson, me nomuni na marau ni Siganisucu.” A qai seraka na kena irairai ena nona matadredredre.
Na yalo ni Siganisucu e a tiko vua na gone tagane o ya. Na yalo ni Siganisucu sa ikoya e dua na ka au nuitaka ni na tu e lomada kece sara kei na noda bula—e sega ena gauna va oqo, ia ena loma ni yabaki taucoko.
Ena kena tu vei keda na yalo ni Siganisucu, eda nanumi Koya ka a sucu me ivakananumi ni gauna oqo ena dua na yabaki: “Ni sa sucu vei kemudou ena siga oqo, ena koro i Tevita, na i Vakabula, ko koya na Karisito na Turaga” (Luke 2:11).
Ena gauna oqo yalo ni soli iloloma e matanataka e dua na itavi levu ena kena vakananumi na gauna ni Siganisucu. Au nanuma, de na rairai vinaka cake meda tarogi keda mada, Na isolisoli cava ena vinakata na Turaga meda solia Vua se kivei ira tale eso ena gauna talei oqo ni yabaki?
Meu vakatututaka mada ni Tamada Vakalomalagi ena vinakati keda vakayadua me da solia vei Koya kei na Luvena na isolisoli ni talairawarawa. Au vakila tale ga ni o Koya ena kerei keda me da soli keda ka kakua ni nanumi keda vakai keda se kocokoco se veivala, me vaka e vakatututaka o Koya na Luvena vakamareqeti ena iVola i Momani.
“E dina, e dina au sa kaya vei kemudou, ko koya sa tiko vua na yalo ni veileti, sa sega ni noqu; ia sa nona ga na tevoro, ni sa ikoya … sa dau vakauqeti ira na tamata me ra veileti ka veicudruvi vakai ira.
“Raica, e sega ni noqu ivakavuvuli me ra vakauqeti na tamata me ra veileti; ia au sa vakaroti kemudou me muduki sara na veileti vakaoqo” (3 Nifai 11:29–30).
Ena itabagauna vakasakiti ni gauna vakataucokotaki oqo, na veigauna tadolavi meda loloma ka soli keda kina e sega dina ni vakaiyalayala, ia era dau vuca rawarawa talega. Nikua era tu eso na yalo me na vakamarautaki, vosa ni loloma me cavuti, cakacaka me qaravi, kei na yalo me vakabulai.
A vola e dua ka rai vagumatua sara ki na yalo ni Siganisucu:
O au na Yalo ni Siganisucu—
Au curuma na vale ni dravudravua, vakavuna me rabailevu ena nodra rai na gonelalai matavulaci, ena nodra sa vakacegui.
Au vakavuna me tasere na liga qumi ni tamata mamaqi e dau vesuki tu ka vakakina me boroi e dua na iwase ni yalona me rarama mai.
Au vakavuna na qasecake me vakavouia nodra itabagone ka dau dredre ena ivakarau makawa ni marau.
Au maroroya na vakabulabulataki ni veilasamaki e lomadra na itabagone, ka vakararamataka na tadra ena gauna ni moce me ka e veivakurabuitaki.
Au vakavuna na yava gugumatua me cabeta na ikabakaba butobuto vata na basikete tawani, biuta laivi tu mai na yalo e qoroya na veika totoka ni vuravura.
Au vakavuna na gonecidroi me wawa vakalailai ena nona sala dredre ni vakasabusabu ka vakauta ki na loloma nuiqawaqawa eso, na ivakaraitaki lalai ka vakasavuya na wainimata ni marau—wainimata ka savata laivi na iyatu dredre ni rarawa.
Au curuma na rumu butobuto ni valeniveivesu, ka vakananumi ira na tamata vakamavoataki na cava a rawa me yaco ka dusia tiko ki liu na veisiga vinaka me namaki.
Au lako vakamalua mai ki na vale vulavula vakanomodi ni mosi, kei na tebenigusu era sa malumalumu ni vosa ka ra sa sautaninini ena vakadirorogo, matau ni vakamuduo.
E udolu na sala, au vakavuna na vuravura ni vakacauoca, me rai cake vua na Kalou, ka guilecava na veika e somidi ka veivakacalai era tu veivakavolivoliti..
O au na Yalo ni Siganisucu.1
Meda qai vakasaqara vakayadua na yalo vou ni Siganisucu—ia na Yalo i Karisito.
© 2012 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/11. Vakadonui me vakadewa: 6/11. Vakadewa ni First Presidency Message, Tiseba 2012. Fijian. 10372 858
iVakavuvuli mai na iTukutuku Oqo
Ena nomu wasea vata kei na matavuvale na itukutuku nei Peresitedi Monson, qai vakasamataka vakamatata na taro a taroga me baleta na isolisoli cava ena vinakata na Turaga meda na solia Vua se kivei ira tale eso ena gauna oqo. Vakauqeti ira na lewe ni matavuvale me ra volaitukutukutaka na nodra vakanananu kei na vakasama (se, vei ira na gone lalai, me ra droinitaka e dua na iyaloyalo) me baleta na kena “kunei vakacava na yalo vou ni Siganisucu—ia na Yalo i Karisito.”