Serafo
Ausening ren Memmefen ewe Ngun mi Fel
Fan ew pwin tetenin pwi we a su seni imwan, iwe ngang ua achocho ne kutta i. Nupwen ua sa won taraku, ua pwan ikiotek pwe ewe Ngun mi Fel epwe anisiei. Ua sinei pwe Kot epwe ponueni me emweniei, me ua sotuni ne ausening ngeni ekkewe memmef seni ewe Ngun mi Fel. Nge nupwen use tongeni rongorong och mettoch, ua poputa ne mefi pwe ewe Ngun mi Fel ese nom rei are ese emweniei.
Non ena fansoun ua mochen feinno touau ne kutta i, nge ua mefi pwe mi auchea upwe nom arap ngeni imwan tetenin pwi we. Iwe ua finata ne sa won taraku o pwenni ewe neni sefan. Nupwen ua konou non ewe anepenges, ua kuna ununun emon nengin a fetan. Ngang ua kuna tetenin pwi we!
Nupwen ua tou seni ewe taraku me sa ngeni i, ua weweiti pwe ewe Ngun mi Fel a emweniei ren an anisiei ne mefi pwe upwe nom non ena neni me witiwit. Pun ua ausening ren ew mongungu mi mosonoson, chipu usap fen mefi memmefen ewe Ngun mi Fel ngeniei. Iwe non ena fansoun ua weweiti pwe fan chommong sise rong ew mongungu, nge sipwe mefi mettoch non netipach.
Ua fakkun kinisou ren emwen seni ewe Ngun mi Fel. Ennet A nom iteitan fansoun! Ekkewe pukfel ra aiti kich pwe ewe Ngun mi Fel epwe chienach fansoun meinisin (nengeni D&C 121:46).
Ika sia nimenimoch ne angei emwen seni ewe Ngun mi Fel me sia rongesich, sia tongeni pisekin aninis non poun Kot ne fori mettoch mi och ngeni chommong aramas. Ren ewe Ngun mi Fel a fitikich iteitan fansoun, sipwe sinei ewe an sipwe fetan won.