Poraus seni ewe Aewin Presetensi, January 2013
Mongungun ewe Samon
Ewe puken Doctrine and Covenants a tingor ngeni aramas meinisin won ewe fonufan ne rongorong ngeni ewe Samon Jises Kraist (nengeni D&C 1:2, 4, 11, 34; 25:16). Mi uren An kewe poraus, kapasen esinesin, me kapasen pesepes mi kawor seni pwarata ngeni ekkewe soufos mi kefin. Non ekkei pwarata sia kuna ifa usun Kot a tongeni ponueni ach kewe ioketen nuku ren porausen osukkun, kinamwe, me esinesin.
Non ach kewe iotek sia achocho ach sipwe sinei met Kot a mochen sipwe fori, met sipwe fori ne kuna kinamwe me pwapwa non ei manau tori ewe manau mwirin, me met epwe nom mwach. Ewe puken Doctrine and Covenants mi uren aponuen ekkei kapaseis mi eis me ren aramasen ran me ran tori pwan ekkewe soufos non iotek mi tipetekison. Mi murinno a tongeni emwenikich me aitikich ifa usun sia tongeni angei ponuen ach kewe kapas eis usun manauach me manau ese much.
Tipetekison me nuku non ewe Samon Jises Kraist mi auchea. Oliver Cowdery a angei an ponu seni ewe Samon usun an mochen ne anisi non chiakun ewe Puken Mormon. A achechema ngeni Oliver pwe ika ese wor an nuku ese tongeni fori mo och mettoch; nge epwe fen tingor ren nuku. Ewe Samon a annuku ngeni Oliver an esap urumotei mettoch non pekin ngun; esap pwan tingorei mettoch minne ese och an epwe kuna (nengeni D&C 8:10).
Fan Chommong non ewe puken Doctrine and Covenants, ewe Samon a anamwota nuku me tipetekison me mwen I epwe ngenikich An aninnis. Pokiten fan ekkoch an ponuenikich a feito non och sokkun napanap me nukun ewe sia mochen. Pwan fan ekkoch ra tongeni weires ne etiwa.
Non met a fis ngeni ewe Mwichefen me nom pwan ngeni ach newo a anisikich ne weweiti ekkei mettoch. Ai we papa chi Henry Eyring a iotek chapur ne sinei met epwe fori nupwen a kaeo usun ewe kapas allim mi niwinsefanito non 1855. Ewe ponu a eto non ew tan.
A tanei pwe a mommot arap ngeni ewe cheipen ren Elter Erastus Snow seni ewe Mwichen Engon me Ruemon Aposel me ren emon elter itan William Brown. Elter Snow a aiti ekkewe nongonongen ewe kapas allim ren usun nge ita ew awa. Me Elter Snow a apasa, “Fan itan Jises Kraist ua annuku ngonuk om kopwe papatais me ei mwan [Elter Brown] … epwe papataisuk.”1 Ai we Famini mi uren kinisou pwe mi wor an Henry Eyring nuku me tipetekison ne papatais non kunok 7:30 nesesor non eu nenien konik mi nönö non St. Louis, Missouri, USA, seni Elter Brown.
Ewe ponuen an we iotek ese eto ren ew mongungu seni ewe Samon. A eto non ew nemasepwi me tan nepwin, usun chok Lehi (nengeni 1 Nifai 8:2).
Ewe Samon a aitikich pwe ponuen iotek a pwan tongeni eto usun sokopoten memmef. Non ewe puken Doctrine and Covenants, ewe Samon a aiti Oliver Cowdery pwe epwe ereni kich non tupuwach me non netipach, me ren ewe Ngun mi Fel, minne epwe feitiw woch o nonnom non netipach (nengeni D&C 8:2).
Mwirin ewe Samon a achema ngeni Oliver Cowdery pwe a fen kapas kinamwe ngeni ekiekin. Kese tongeni angei eu minen pwarata mi nap seni ewe me ren Kot (nengeni D&C 6:23).
Ewe puken Doctrine and Covenants, uruon Mwichefen, me ewe uruo seni Henry Eyring non an we mission a keran fis mwirin an we papatais a aitiei pwe ponuen iotek a tongeni eto non napanapen esinesin pwan kinamwe.
Fan April 1857, Elter Parley P. Pratt seni ewe Mwichen ekkewe Engon me Ruemon Aposel a fiti ew mwich a fis non ewe tenenimw ikenei itan Oklahoma, USA. Henry Eyring a makketiw pwe ekiekin Elter Pratt “mi uren mettoch mi ngau usun met epwene fis … , ese tongeni weweiti ifa usun a tongeni tou seni met epwene fis.”2 Henry a makketiw ewe poraus mi netipechou muttir chok mwirin nienon ewe Aposel. Elter Pratt a chok sopweifocheno non an sai ika mwo a mefi epwe wor feingau, usun chok ewe Soufos Joseph a fori nupwen a feino Carthage.
Ua pwarata pwe ewe Samon epwe ponueni ewe iotekin tipetekison o nuku fansoun meinisin. Ewe puken Doctrine and Covenants me ach kewe pwisin foffor ra aitikich ne esinna ekkana ponu me etiwair non nuku, ese nifinifin ika ir kapasen emwen, appunganon met mi ennet, are kapasen esinesin. Ua iotek pwe sipwe ausening ngeni me esinna ewe mongungun ewe Samon mi uren tong.
© 2013 seni Intellectual Reserve, Inc. Meinisin pung mi kawor. A för non Amerika. Kapungunon non fosun Merika: 6/12. Kapungunon chiakun: 6/12. Chiakun First Presidency Message, January 2013. Chuukese. 10661 901
Afanafan seni Ei Poraus
1. Ekieki om kopwe annea fengen ekkewe wokisin usun iotek seni ei afanafan. Nupwen ka annea, kopwe tingor ngeni chon famini ar repwe auseningoch ren ifa usun Kot a ponueni iotek. Sotuni apasata omw kapasen pwarata usun ewe auchean iotek.
2. Ewe puken Doctrine and Covenants mi uren ponuen kapas eis aramas ra eis non iotek. Met ika ekkewe ponuen ar kewe kapas eis (ekkewe pwarata) rese fen makketiw? Pesei ngeni ewe famini ne kaeo ne esinna me tapweno mwirin ekkewe memmefen ewe Ngun mi Fel. Meni repwe mochen makketiw ar ekiek usun iotek non ar kewe puken achechem.