Agtutubo
Panangdengngeg kadagiti Parikna
Maysa a rabii nagtalaw ti ubing a kasinsinko manipud iti pagtaengan, isu a nagdardarasak a napan nangsapul kenkuana. Bayat ti panagmanehok, inkararagko a tulongannak ti Espiritu. Ammok a sungbatan ken iturongnak ti Dios, ket inkarigatak ti dumngeg kadagiti parikna ti Espiritu. Ngem idi awan ti mangngegko, nariknak ti pannakaupay ket nariknak a saannak a pinariknaan ti Espiritu.
Nupay kayatko ti umadayo tapno agsapul pay, nariknak a nasken nga agtalinaedak iti lugar iti lawlaw ti pagtaengan ti kasinsinko. Isu nga inkeddengko ti agmaneho manen a manglawlaw iti lugar. Idi agsardengak iti pagballasiwan, nakitak ti anniniwan ti maysa nga ubing a babai a magmagna. Nasarakakon ti kasinsinko!
Iti iruruarko iti kotse ken panagtarayko nga umasideg kenkuana, naamirisko nga iturturongnak ti Espiritu laeng babaen ti panangtulongna a mariknak a nasken nga agtalinaedak iti dayta met la a lugar. Gapu ta dumdumngegak iti naulimek a timek, dumani diak impangag dagiti parikna ti Espiritu. Naawatak kalpasanna nga iti adu a gundaway a saantayto a mangngegan ti maysa a timek, ngem mariknatayto dagiti parikna iti puspusotayo.
Agyamanak unay iti pannarabay ti Espiritu. Pudno nga Isu ket kanayon nga adda idiay! Kas iti kuna dagiti nasantuan a kasuratan, “Ti koma Espiritu Santo ti kanayon a kaduam” DkK 121:46).
No maikaritayo iti pannarabay ti Espiritu ket mangikasotayo, makapagbalintayo a ramit kadagiti ima ti Dios nga agaramid iti nasayaat kadagiti adu a tattao. Babaen iti kanayon a panangkadkadua ti Espiritu, ammotayto ti dalan a nasken a papanantayo.