Mensahe ti Umuna a Panguluen, Enero 2013
Ti Timek ti Apo
Ti Doktrina ken Katulagan ket awisenna ti amin a tao iti amin a lugar tapno dumngeg iti timek ni Apo Jesucristo (kitaen iti DkK 1:2, 4, 11, 34; 25:16). Napno daytoy kadagiti mensahe, ballaag, ken makaparegta a balakadna a naited babaen ti paltiing kadagiti napili a propeta. Kadagitoy a paltiing makitatayo no kasano a masungbatan ti Dios dagiti kararagtayo ti pammati nga addaan kadagiti mensahe ti pammilin, talna, ken ballaag.
Kadagiti kararagtayo kalikagumantayo nga ammuen no ania koma ti paaramid ti Dios kadatayo, no ania ti nasken nga aramidentayo tapno masarakan ti talna ken ragsak iti daytoy a biag ken kalpasanna, no ania ti agur-uray kadatayo. Napno ti Doktrina ken Katulagan kadagiti sungbat iti kakasta a saludsod a dinamag dagiti ordinario a tao ken dagiti propeta iti napakumbaba a kararag. Mabalin a napateg daytoy a pangiwanwan a mangisuro kadatayo no kasano ti panangawat iti sungbat kadagiti saludsod maipapan iti temporal a pagsayaatan ken agnanayon a pannakaisalakan.
Ti panagpakumbaba ken pammati ken ni Apo Jesucristo ket isu dagitoy ti tulbek. Inawat ni Oliver Cowdery ti sungbat manipud iti Apo maipanggep iti tarigagayna a tumulong iti pannakaipatarus ti Libro ni Mormon: “Laglagipem nga awan ti maaramidam no awan ti pammati; ngarud agdawatka babaen iti pammati. Dimo tagibassiten dagitoy a banag; dimo dawaten dayta saan a nasken” (DkK 8:10).
Nadagdagullit iti Doktrina ken Katulagan, nga idawat ti Apo a kasapulan ti pammati ken panagpakumbaba sakbay nga itedna ti tulongna. Maysa a gapu iti daytoy ket saan a mabalin nga umay dagiti sungbatna iti wagas a namnamaentayo. Kasta met a saanda a kanayon a nalaka a maawat.
Ipakita ti pakasaritaan ti Simbaan ken ti padpadas dagiti kapuonantayo daytoy a kinapudno. Nagkararag a sipapasnek idi ni lelongko iti tumeng a ni Henry Eyring tapno ammuenna no ania ti nasken nga aramidenna idi nangngegna ti naisubli nga ebanghelio a naisuro idi 1855. Immay ti sungbat iti maysa a tagtagainep.
Natagtagainepna a nakatugaw kano iti sango ti maysa a lamisaan a kaabayna ni Elder Erastus Snow ti Korum dagiti Sangapulo-ket-dua nga Apostol ken ti maysa nga elder nga agnagan iti William Brown. Insuro ni Elder Snow dagiti pagbatayan ti ebanghelio iti uneg ti kasla maysa nga oras. Kalpasanna kinuna ni Elder Snow, “Iti nagan ni Jesucristo bilinenka nga agpabuniag ket daytoy a lalaki [ni Elder Brown] … ti mangbuniagto kenka.”1 Agyaman ti pamiliak gapu ta adda pammati ken pakumbaba ni Henry Eyring nga agpabuniag ken ni Elder Brown, iti alas 7:30 iti bigat iti maysa a pagdigusan ti naurnong a tudo iti St. Louis, Missouri, USA.
Saan nga immay ti sungbat iti kararagna iti maysa a mangngeg a timek nga aggapu iti Apo. Immay daytoy iti maysa a parmata ken tagtagainep iti rabii, kas iti naaramid ken ni Lehi (kitaen iti 1 Nephi 8:2).
Insuro ti Apo kadatayo a mabalin pay nga umay dagiti sungbat kas panagrikna. Iti Doktrina ken Katulagan, insurona ni Oliver Cowdery, “Adtoy, ibagak kenka iti panunotmo ken iti pusom, babaen ti Espiritu Santo, ti dumteng kenka ken agnaed iti pusom” (DkK 8:2).
Ket pinaregtana ni Oliver iti kastoy: “Diak kadi imbaga ti kappia iti panunotmo maipanggep iti dayta a banag? Ania pay ti nain-indaklan a saksi a magun-odmo ngem ti aggapu iti Dios?” (DkK 6:23).
Ti Doktrina ken Katulagan, pakasaritaan ti Simbaan, ken ti pakasaritaan nga indulin ni Henry Eyring iti misionna kalpasan laeng ti panagbuniagna ket nakaisuro kaniak a mabalin a marikna dagiti sungbat kas ballaag kasta met a kas kappia.
Idi Abril 1857, ni Elder Parley P. Pratt ti Korum dagiti Sangapulo-ket-dua nga Apostol ket dimmar-ay iti maysa a komperensia iti maawagan itan iti Oklahoma, USA. Insurat idi ni Henry Eyring a ni Elder Pratt ket “napnuan ti panunotna kadagiti makapaleddaang a bambanag … , saanna a kabaelan ti mangilasin iti masakbayan wenno ania man a wagas tapno makaruk-at.”2 Insurat a dagus ni Henry dagiti naliday a damag kalpasan laeng ti pannakapapatay ti Apostol. Intultuloy ni Elder Pratt ti panagdaliasatna iti baet dagiti nariknana a peggad, kas met laeng iti inaramid ni Propeta Joseph idi mapan iti Carthage.
Daytoy ti pammaneknekko a kanayon a sungbatan ti Apo ti napakumbaba a kararag nga addaan pammati. Ti Doktrina ken Katulagan ken ti bukodtayo a padas ket mangisuro kadatayo no kasano a mailasin dagita a sungbat ken maawatda iti pammati, pangiturong, pammatalged iti kinapudno, wenno pammallaag man dagitoy. Ikararagko ta sapay koma ta kanayon a dumngeg ken mailasintayo ti managayat a timek ti Apo.
© 2013 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/12. Pannakaanamongna a maipatarus: 6/12. Pannakaipatarus ti First Presidency Message, January 2013. Ilokano. 10661 864
Panangisuro manipud iti Daytoy a Mensahe
1. Basaenyo nga aggigiddan dagiti parapo maipapan iti kararag iti daytoy a mensahe. Bayat ti panagbasayo, dawatenyo kadagiti miembro ti pamilia a dumngegda a nasayaat no kasano a sungbatan ti Dios dagiti kararag. Paneknekanyo maipapan iti kinapateg ti panagkararag.
2. Napno ti Doktrina ken Katulagan kadagiti sungbat iti kakasta a saludsod a dinamag dagiti tao iti kararag. Ania ngata no saan iti kaano man nairekord dagiti sungbat kadagiti saludsodda (dagiti paltiing)? Allukoyenyo ti pamilia a mangsursuro a mangilasin ken mangsurot kadagiti parikna ti Espiritu. Mabalin a kayatda nga isurat dagiti kapanunotanda maipanggep iti kararag kadagiti diurnalda.