Mensahe iti Visiting Teaching, Enero 2013

Aramid ti Misionario

Sikakararag nga adalenyo daytoy a material ken, no maitutop, ilawlawagyo daytoy kadagiti kakabsat a babbai a sarungkaranyo. Usarenyo dagiti saludsod a mangtulong kadakayo a mangpapigsa kadagiti kakabsatyo a babbai ken mangaramid iti Relief Society nga aktibo a paset iti bukodyo a biag. Para iti ad-adu pay nga impormasion, mapan iti reliefsociety.lds.org.

Pammati, Pamilia, Tulong

Maibaon dagiti Santo iti Ud-udina nga Aldaw “nga agtrabaho iti bangkag [ti Apo] para iti pannakaisalakan dagiti kararua dagiti tao” (DkK 138:56), a pakaibilangan ti aramid ti misionario. Ditay kasapulan ti pormal nga awag nga agmision tapno mangibinglay iti ebanghelio. Ti biag dagiti dadduma ket paraburanto ti ebanghelio nga adda iti aglawlawtayo, ken no isaganatayo ti bagitayo, usarennatayonto ti Apo. Mabalin nga awaten dagiti visiting teacher dagiti naespirituan a pagrebbenganda ket tumulongda a “mangipatungpal iti saan nga ipapatay ken ti agnanayon a biag ti tao” (Moises 1:39).

Idi binukel ni Propeta Joseph Smith ti Relief Society idi 1842, kinunana a dagiti babbai ket saanda laeng a mangaywan kadagiti napanglaw ngem ketdi mangisalakanda pay kadagiti kararua.¹ Daytoy pay laeng ti panggeptayo.

“Ti Apo … mangitalek iti pammaneknek maipapan ti kinapudno kadagitay mangiburayto iti daytoy kadagiti sabali,” kinuna ni Presidente Dieter F. Uchtdorf, Maikadua a Mammagbaga iti Umuna a Panguluen. “Nangruna pay, a namnamaen ti Apo kadagiti miembro ti Simbaanna nga ‘ungapen[da] ti [ngiwatda] iti amin nga oras, iti panangipakdaarda iti ebanghelio[na] iti timek a mangidirdir-i’ (DkK 28:16). … No dadduma ti maysa a binatog ti pammaneknek ket mabalin a mangituding kadagiti pasamak a mapagteng tapno mangaring iti biag ti maysa a tao para iti kinaagnanayon.”²

Manipud kadagiti Nasantuan a Kasuratan

Doktrina ken Katulagan 1:20–23; 18:15; 123:12

Manipud iti Pakasaritaantayo

Ti estoria maipapan ken ni Olga Kovářová iti sigud a Czechoslovakia ket maysa a padas ti miembro a misionario manipud iti pakasaritaan ti Relief Society. Kadagiti umuna a tawen ti 1970, nagadal iti kinadoktor ni Olga ken nagtarigagay iti naun-uneg pay a naespirituan a biag. Nadlawna ti 75 ti tawenna a ni Otakar Vojkůvka, maysa a Santo iti Ud-udina nga Aldaw. “Para kaniak pitupulo-ket-lima ti tawenna ngem ti pusona kasla asideg iti sangapulo-ket-walo ti tawenna ken napnuan iti rag-o,” kinunana.“Karkarna unay daytoy iti Czechoslovakia iti dayta a panawen ti sinisismo.”

Sinaludsod ni Olga ken ni Otakar ken ti pamiliana no kasano a nasarakanda ti rag-o. Inyam-ammoda kenkuana dagiti dadduma pay a miembro ti Simbaan ken inikkanda isuna iti Libro ni Mormon. Sigagagar a binasana daytoy ket nabuniagan ken nakumpirmaan iti nabiit. Manipud iti dayta a kanito naimpluensiaan ni Olga iti nasayaat iti maysa a lubong nga adda pannakaidadanes gapu iti politika ken pannakairurumen gapu iti relihion. Nagserbi isuna a kas presidente ti Relief Society iti bassit a branchna ken timmulong a nangisalakan kadagiti kararua dagiti sabali babaen ti panangyegna kadakuada ken ni Cristo.³

Ania ti Maaramidko?

Sursurotek kadi dagiti parikna ti Espiritu Santo bayat ti panangiburayko iti pammaneknekko kadagiti kakabsatko a babbai a sarsarungkarak?
Kasano a tultulongak dagiti kakabsat a babbai nga ay-aywanak tapno makasursuro iti ebaghelio?

© 2013 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/12. Pannakaanamongna a maipatarus: 6/12. Pannakaipatarus ti Visiting Teaching Message, January 2013. Ilokano. 10661 864