Agtutubo
Panangibinglay iti Maysa a Gayyem
Maysa nga aldaw bayat ti panagadalko para iti klasek iti seminary, naaddaanak iti napintas ken naidumduma nga impresion. Bayat ti panangbasak iti leksion para iti sumaruno nga aldaw, nakitak ti rupa ti maysa a gayyem a naggapu iti eskuela ket naaddaanak iti napigsa a panagrikna a nasken nga ibinglayko ti pammaneknekko kenkuana.
Iti baet ti kinalawag ti impresion, nagbutengak. Nagdanagak amangan ta dinak awaten ti gayyemko, nangnangruna a gapu ta kasla saan nga isu ti klase ti babai nga agessem a kumappeng iti Simbaan.
Napanunotko ti maysa a bitla ni Sister Mary N. Cook ti Young Women general presidency a nangkaritanna kadakami nga agtrabaho a nasayaat ken agbalin a natured.1 Kayatko ti agbalin a kastoy, isu a sinuratak daytoy a babai ket impaneknekko ti kinapudno ti Simbaan ken ti pammategko iti Libro ni Mormon. Iti kabigatanna nangipanak iti maysa a kopia ti Libro ni Mormon, karagpin ti suratko, iti uneg ti bagna.
Iti siddaawko, nakasagana unay nga umawat iti ebanghelio ti gayyemko. Nangrugi iti dayta nga aldaw, ibagana no kua kaniak maipapan iti nasursuronan iti panagadalna iti Libro ni Mormon. Kalpasan ti sumagmamano a lawas, inyam-ammok isuna kadagiti misionario. Dumani madagdagus, nga inawatna ti pammatalged manipud iti Espiritu Santo a pudno ti nasursurona. Nagsangitak ken dagiti misionario idi imbagana kadakami maipapan kadagiti riknana. Iti nabiit nabuniagan ti gayyemko, ket nasdaaw dagiti nagannak kenkuana a nakakita dagiti panagbalbaliw a napasamak kenkuana.
Naragsakanak unay gapu ta naparmekko dagiti panagamakko ken nakatulongak a nangisangbay iti ebanghelio iti biagna.