Mensahe iti Visiting Teaching, Pebrero 2013
Napasurot iti Apo
Sikakararag nga adalenyo daytoy a material ken, no maitutop, ilawlawagyo daytoy kadagiti kakabsat a babbai a sarungkaranyo. Usarenyo dagiti saludsod a mangtulong kadakayo a mangpapigsa kadagiti kakabsatyo a babbai ken mangaramid iti Relief Society nga aktibo a paset iti bukodyo a biag. Para iti ad-adu pay nga impormasion, mapan iti reliefsociety.lds.org.
Pammati, Pamilia, Tulong
Dagiti baro a kakabsat a babbai ti Simbaan—agraman ti Young Women a sumsumrek iti Relief Society, dagiti kakabsat a babbai nga agsubsubli nga aktibo, ken dagiti baro a napasurot—agkasapulanda iti tulong ken pannakigayyem dagiti visiting teacher. “Napateg unay ti pannakiraman ti miembro iti panangpatalinaed iti pannakapasurot wenno konbersion ken iti panangpasubli kadagiti saan unay nga aktibo a miembro iti naan-anay a panagaktibo,” kinuna ni Elder M. Russell Ballard ti Korum dagiti Sangapulo-ket-dua nga Apostol. “Italimudokyo ti pannirigan a ti Relief Society … makapagbalin a [maysa kadagiti] kabibilgan a pagtaudan ti pannakigayyem nga adda kadatayo iti Simbaan. Tulonganyo iti nasapsapa dagiti masursuruan ken mapapaaktibo manen, ket ayatenyo ida nga iserrek iti Simbaan babaen ti organisasionyo.”1
Kas miembro ti Relief Society, makatulongtayo kadagiti baro a miembro a makasursuro kadagiti kangrunaan nga aramiden iti Simbaan, kas iti:
-
Panangted iti bitla.
-
Panangiburay iti pammaneknek.
-
Panagtungpal iti linteg ti panagayuno.
-
Panagbayad iti apagkapullo ken dadduma pay a daton.
-
Pannakiraman iti aramid iti family history.
-
Panangannong kadagiti panagbuniag ken kumpirmasion para kadagiti pimmusayen a kapuonan.
“Kasapulantayo dagiti naregta a gagayyem tapno mangiparikna kadagiti baro a miembro a komportable ken maawatda iti Simbaan,” kinuna ni Elder Ballard.2 Addaantayo amin, nangnangruna dagiti visiting teacher, kadagiti napapateg a pagrebbengan a mangipasdek kadagiti pannakigayyem kadagiti baro a miembro kas maysa a wagas ti panangtulong kadakuada nga agbalin a sititibker a “napasurot iti Apo” (Alma 23:6).
Manipud kadagiti Nasantuan a Kasuratan
Manipud iti Pakasaritaantayo
“Iti agtultuloy a panagadu ti bilang dagiti napasurot,” kinuna ni Presidente Gordon B. Hinckley (1910–2008), “nasken nga ad-adda pay nga ikarigatantayo ti mangtulong kadakuada bayat ti panangsapsapulda iti dalanda. Kasapulan ti tunggal maysa kadakuada ti tallo a banag: maysa a gayyem, maysa a pagrebbengan, ken pannakataraon iti ‘nasayaat a balikas ti Dios’ (Moroni 6:4).”3
Pagrebbengan dagiti visiting teacher ti mangtulong kadagiti ay-aywananda. Masansan nga umuna ti pannakigayyem, kas iti inaramid daytoy agtutubo a kabsat iti Relief Society a visiting teacher ti in-inauna a kabsatna a babai. Nabayagda a nangbangon iti pannakigayyem agingga a nagtitinnulongda a nagtrabaho iti proyekto iti panagdalus. Nagbalinda nga aggayyem, ken bayat ti panagsaritada maipapan iti Mensahe iti Visiting Teaching, agpadada a nataraonan iti “nasayaat a balikas ti Dios.”
Ni Presidente Joseph Fielding Smith (1876–1972) kinunana a ti Relief Society “ket napateg a paset ti pagarian ti Dios iti daga ken … tulonganna dagiti napudno a miembrona a manggun-od iti agnanayon a biag iti pagarian ti Ama.”4
© 2013 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/12. Pannakaanamongna a maipatarus: 6/12. Pannakaipatarus tiVisiting Teaching Message, February 2013. Ilokano.10662 864
Ania ti Maaramidko?
-
Ikarkararagak kadi ti kaduak a visiting teacher ket idawdawatko kadi iti Espiritu a tarabayennakaminto bayat ti panagserbimi kadagiti kakabsatmi a babbai?
-
Kadagiti ania a wagas ti pakapagserbiantayo iti tunggal kabsat a babai nga ay-aywanantayo tapno ammona a pudno nga ipatpategtayo isuna?