Mensahe ti Umuna a Panguluen, Pebrero 2013
Balikas para iti Agduadua a Misionario
Kanayon nga obligasion dagiti disipulo ni Jesucristo ti mangidanon iti ebangheliona iti lubong (kitaen iti Marcos 16:15–16). Nupay kasta, no dadduma narigat nga ungapen dagiti ngiwattayo ket isao maipapan iti pammatitayo kadagiti adda iti aglawlawtayo. Idinto ta sumagmamano kadagiti miembro ti Simbaan ti addaan iti gagangay a sagut iti pannakisarita kadagiti dadduma maipapan iti relihion, adda met dagiti medio agduadua wenno makarikna a madi, mabain, wenno agamak a mangaramid iti kastoy.
Iti dayta a paset, isingasingko man ti uppat a banag a mabalin nga aramiden ti asino man a mangsurot iti bilin ti Mangisalakan a mangikasaba iti ebanghelio “iti tunggal parsua” (DkK 58:64).
Agbalin a Silaw
Masansan nga aggapu ti kaay-ayok a pagsasao ken ni St. Francis of Assisi a mabasa, “Ikasabayo ti ebanghelio iti amin nga oras ken no kasapulan, usarenyo dagiti balikas.”1 Nalawag a maawatan a ti kayat a sawen daytoy a pagsasao ket ti pannakaawat a masansan a saan a maisasao dagiti kabibilgan a sermon wenno kaskasaba.
No adda integridadtayo ken agbibiagtayo a mayannurot kadagiti pagrukodantayo, madlaw dagiti tao. No ipakitatayo ti rag-o ken ragsak, ad-adda pay a madlawda.
Kayat ti tunggal maysa ti agbalin a naragsak. No datayo a miembro ti Simbaan ket pagraniagentayo ti silaw ti ebanghelio, makita dagiti tao ti kinaragsaktayo ken mariknada ti ayat ti Dios a mangpumpunno ken agliplipias iti biagtayo. Kayatda a maammuan no apay. Kayatda a maawatan ti palimedtayo.
Dayta ti mangiturong kadakuada nga agsaludsod iti “Apay a nakaragragsakkayo?” wenno “Apay a kanayon nga addaankay iti kasta a nasayaat nga ugali?” Dagiti sungbat kadagitoy a saludsod, kinaagpaysona, ket naan-anay a mangiturong iti pannakisarsarita maipapan iti ebanghelio ni Jesucristo.
Agbalin a Mannakisarita
Ti panangdakamat iti pagsasaritaan maipapan ti relihion—nangnangruna kadagiti gagayyem ken ipatpategtayo—ket kasla nakaam-amak ken mapannubok. Saan a nasken nga agbalin a kasta. Ti panangdakamat kadagiti naespirituan a padpadas wenno panangisarita maipapan kadagiti aktibidad wenno pasamak iti Simbaan iti gagangay a pannakisarsarita ket mabalin a nalaka ken makaay-ayo no maddaantayo iti bassit a tured ken sentido komon.
Maysa a napintas a pagwadan daytoy ti asawak, a ni Harriet. Idi agnanaedkami iti Alemania, mangsapul no kua isuna iti wagas tapno mairamanna dagiti pagsasaritaan a mainaig iti Simbaan kadagiti pannakisarsaritana kadagiti gagayyem ken am-ammona. Kas pagarigan, no adda agsaludsod kenkuana maipapan iti Sabado ken Domingona, kunana no kua, “Itoy a Domingo, naaddaankami iti makaay-ayo a padas iti simbaanmi! Nangted ti agtutubo a lalaki nga agtawen iti 16 iti napintas a bitla iti sango ti 200 a tattao ti kongregasionmi maipapan iti panagbiag a nadalus.” Wenno, “naammuak maipapan iti maysa a babai nga agtawen iti 90 a naggansilio iti 500 nga ules ket intedna dagitoy iti humanitarian program ti Simbaan tapno maipatulod kadagiti tao nga agkasapulan iti amin a paset ti lubong.”
Ad-adda pay a masansan ngem iti saan, a kayat dagiti tao a nakangngeg iti daytoy a mangammo iti ad-adu pay. Agsaludsodda. Ket dayta ti mangiturong kadagiti gundaway a pagsasaritaan ti maipapan iti ebanghelio iti gagangay, natalek, saan a napilit a wagas.
Iti idadateng ti Internet ken ti social media, nalaklaka itan ti mangisao maipapan kadagitoy a banag iti wagas a panagsasarita ngem idi kasakbayanna. Kasapulantayo laeng ti tured a mangaramid iti kasta.
Mapno iti Parabur
Daksanggasat, nalaka unay ti agbalin a mannakisuppiat. Mapasamak a kanayon unay a makisuppiat, mangtagibassit, ken mangkondenatayo. No agbalintayo a naunget, bastos, wenno manangpasakit kadagiti tao, ti maudi a banag a kayatda ket mangammo iti ad-adu pay maipapan kadatayo. Imposible a maammuan no mano a tattao ti pimmanawen iti Simbaan wenno di pulos kimmappeng gapu ta adda maysa a banag nga insao ti maysa a tao a nangpasakit wenno nangpagura kadakuada.
Adu unayen dagiti awan daydayawna iti lubong ita nga agdama. Gapu iti saan a panangipakaammo ti Internet, nalaklakan ngem idi ti panangisao kadagiti makasabidong wenno makadadael a banag iti online. Saan kadi a nasken koma kadatayo, dagiti manamnama a disipulo ti nadungngo a Cristotayo, nga ad-adda pay a pagrukodan ti panangngaasi? Isuro dagiti nasantuan a kasuratan, “Ti saoyo kankanayon koma a makaay-ayo a kasla natempla iti asin, tapno ammoyo no kasano ti isusungbat iti tunggal maysa” (Taga Colosas 4:6).
Kayatko ti kapanunotan dagiti balikastayo a kas kalawag ti nainit a tangatang ken napnuan iti parabur. Mapanunotyo kadi no ania koma ti kayarigan dagiti pamilia, ward, nasiontayo, ken uray pay ti lubong no ipakattayo daytoy simple a pagbatayan?
Mapno iti Pammati
No dadduma awatentayo ti nakaad-adu a pakaidayawan wenno nakaad-adu a pakabasolan no maipanggep kadagiti dadduma iti panangawatda iti ebanghelio. Nasken a laglagipen a saan a namnamaen ti Apo nga aramidentayo ti panagpasurot.
Sumangbay ti pannakapasurot saan a babaen dagiti balikastayo ngem ketdi babaen dagiti nailangitan a panagpapaay ti Nasantuan nga Espiritu. No dadduma kasapulan laeng ti maysa a sao ti pammaneknektayo wenno maipapan iti padas a mangpalukneng iti maysa a puso wenno manglukat iti maysa a ridaw a makaiturong kadagiti dadduma a mangpadas kadagiti naindaklan a kinapudno babaen dagiti parikna ti Espiritu.
Ni Presidente Brigham Young (1801–77) kinunana nga ammona a pudno ti ebanghelio idi “nakitana ti maysa a lalaki nga awan ammona, wenno awan laingna nga agsarita iti kaaduan, a makaibaga laeng iti, ‘Ammok, babaen ti bileg ti Espiritu Santo, a pudno ti Libro ni Mormon, a ni Joseph Smith ti Propeta ti Apo.’” Kinuna ni Presidente Young idi nangngeganna dayta a napakumbaba a pammaneknek, “Dayta nga Espiritu Santo a naggapu iti dayta a tao ket nanglawlawag iti pannakaawatko, ket adda [idi] iti sangok ti lawag, gloria, ken imortalidad.”2
Kakabsat, maaddaankayo iti pammati. Mabalin a padakkelen ti Apo dagiti balikas nga isaoyo ken pabilgenna dagitoy. Saan a kiddawen ti Dios nga agpasurotkayo no di ketdi ungapenyo dagiti ngiwatyo. Ti aramid a panagpasurot ket saan nga agpaay kadakayo—agpaay dayta iti tao a dumdumngeg ken iti Nasantuan nga Espiritu.
Misionario ti Tunggal Miembro
Ay-ayatek a gagayyemko, ita ad-adun dagiti wagas a pakaungapantayo kadagiti ngiwattayo ket ibinglaytayo kadagiti dadduma dagiti naragsak a damag maipapan ti ebanghelio ni Jesucristo. Adda maysa a wagas para iti tunggal maysa—uray pay ti agduadua a misionario—tapno makiraman iti daytoy naindaklan nga aramid. Makasapul ti tunggal maysa kadatayo iti wagas a pangusarantayo kadagiti bukodtayo a naipangpangruna a talento ken pagesman a tumulong iti naindaklan nga aramid a mangpunno iti lubong iti lawag ken kinapudno. No aramidentayo daytoy, masarakantayonto ti rag-o a sumangbay kadagiti napudno ken natured “nga agtakder kas saksi ti Dios iti amin a panawen” (Mosiah 18:9).
© 2013 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/12. Pannakaanamongna a maipatarus: 6/12. Pannakaipatarus ti First Presidency Message, February 2013. Ilokano. 10662 864
Panangisuro manipud iti Daytoy a Mensahe
Maysa nga epektibo a wagas a mangisuro ti “mangparegta kadagiti suruanyo a mangituding … kadagiti panggep a tun-oyen a makatulong kadakuada nga agbiag iti pagbatayan nga insuroyon” (Teaching, No Greater Call [1999], 159). Ibilangyo ti panangawis kadagiti suruanyo a sikakararag a mangitudingda iti panggep a tun-oyen a kaduada ti maysa wenno ad-adu pay a tao iti daytoy a bulan. Mabalin a pagsasaritaan dagiti nagannak dagiti wagas a pakatulongan dagiti babbabassit nga annak. Mabalinyo pay a tulongan dagiti miembro ti pamilia a pagsisinniriban wenno yakemda dagiti wagas a pakadakamatan ti ebanghelio iti gagangay a saritaan ken mangpanunot maipapan kadagiti dumteng nga aktibidad ti Simbaan a mabalin a pangawisanda iti maysa a gayyem.