Ngeasek
Ouchais el mo er a Sechelik
A ta er a klebesei er a kusuub el kirel a klas er ngak er a seminary, e ak mlo omelchesiu er a klebokel el ngodech el teletael. Tia er a kunguiu er a subelam el kirel a klas er a bol kukuk, e ak milsa sechelik er a skuul e kmal mlo omelchesiu el kirek el ouchais er a klaumerang er ngak el mo er ngii.
Meng kmal mle bleketakl tia el kulmelchesiu er ngii, eng di ak mle medakt. Ak mle bekikl el kmo ngika el sechelik a locha mo chetil ngak, ele ngii el ko er a dimlak el teletelel a chad el semeriar el mo chedal a Ikelesia.
Ak mlo melbedebek er a cheldechedechal a Sister Mary N. Cook er a cherrengelel omerreder er a Young Women el millekoi er kid me bol blak a rengud e de mesisiich el oureor.1 Ng mle soak el mo uaisei, me ak lilchesii a babilengek el mo er ngika el redil louchais el kirel a klemerang er a Ikelesia me a beltkil a renguk el kirel a Babier er a Mormon. A bol kukuk e ak milertak e nguu a Babier er a Mormon, lobengkel tia el babilengek el locha er a chelsel a til.
Ng mlo mechas a renguk, ele ngika el sechelik a bai kmal mle semeriar lorrenges el kirel ebangkelio. Ng ulemuchel er tiaikid el sils, eng blechoel louchais er ngak el kirel aike el losuub er a Babier er a Mormon. Sesei el sandei ruriul, eng mlo kebetech ngii me a remisionari. Ng di mle mereched, el nguu a oterekokl el mla er a Chedaol Reng el kmo aika el losuub a klemerang. A remisionari me ngak a lilangel er tia er a louchisa el kirel aikel lomelchesiu. A sechelik a di mle mereched el nguu a techolbechelid, ea rechad er a blil a mlo mechas a rengrir el mes aikel mla mengodech er ngii.
Ng kmal dmeu a renguk el mlo sebechek el choridii a dakt el mla er ngak e mlo uchul a ebangkelio er a klengar ngii.