Klumech er a First Presidency, Ongerung el buil 2013
Tekoi el mo er a Kmes el Misionari
A roltirakl er a Jesus Kristo a di mla ngara cheungel a ngerachel loba ebangkelio er Ngii el mo er a beluulechad (mesa Markus 16:15–16). Eng di, bebil er a taem eng meringel er kid el mok a ngered e ouchais el kirel a klaumerang er kid el mo er tirkel ngar bitar kid. Ng uaisei el bebil er a rechedal a Ikelesia a kuk duch er tir el mengedecheduch er a rebebil el kirel a klechelid, eng di a rebebil a telkib el kmes malechub e te omelchesiu el metitur, merur, malechub e te medakt el meruul er ngii.
Me a leuasiei, e msall e bok dung a eua el tekoi el ngii dil chad a sebechel meruul el mo oltirakl er sel tekingel Osobel el mo omerk er a ebangkelio “el mo er a rebek el chad” (mesa D&C 58:64).
Bom Llomes
A kmal soak el tekoi el blechoel melutk el kirel a St. Francis of Assisi a kmo, “Momerk er a ebangkelio er a rokui el taem ea le klou a belkul, e mousbech a tekoi.”1 A belkul tia el tekoi a sel klemedengei er kid el kmo aikel kot el mesisiich el osisechakl a blechoel el diak el medung.
Se el loumerang er kid a rechad e de kiei loltirakl a ngarbab el llach, ea rechad a mesekid. Se el dochotii a deureng, ete kmal muut el mesang.
A rokui el chad a di sorir el mo ngara deureng. Se el sekum e kid el chedal a Ikelesia a ochotii a llomes er a ebangkelio, ea rechad a sebechir el mesa deuil a rengud e mo melchesiu er a beltikelreng er a Dios el omekeek el me olsesibes er a klengar kid. Ng sorir el mo medengei el kmo ngera uchul. Ng sorir el mo medengelii a berteled.
Tiaikid a mo uchul ete mo oker “Ngera uchul meng kmal dmeu a rengum?” malechub “Ngera uchul eng kmal ko er a di ungil a blekerdelem?” A nger er a ikal ker, e merang, a mechelii a cheldecheduch el kirel a mla moluut el ebangkelio er a Jesus Kristo.
Bo Bechedechedechaol
A omesodel a tekoi er a klechelid—oumesingd se el bo er a resechelid me a rebetik er a rengud—a sebechel uaia lomekrur malechub eng meringel. Ng diak el kirel uaisei. A ouchais el kirel a chedaol teletael malechub omesodel a tekoi er a Ikelesia me a teletael er a chelsel a di cheldecheduch a sebechel kmal beot e ungil alsekum e kede nguu a telkib el blekeu e ungil luldasu.
A bechik, er a Harriet, a kmal ungil okesiul tiang. Se er a ki mkiei er a Dois, eng blechoel osiik a techall el mesaod a tekoi el melutk el kirel a Ikelesia lobengterir a resechelil me a le di le kaodengi el chad. El uaia, alsekum a chad oker ngii el kirel a weekend er ngii, eng kmo, “Se er a Sandei eng meral mle ongasireng a teletael er a ikelesia! A teruich me a elolem a rekil buik a mle klebokel a cheldechedechal er mederir a reru el dart el chad el kirel a kiei er a klikiid el klengar.” Malechub, “Ak mlo medengei el kmo a oketiu a rekil el mechas a rirasm a eim el dart el blangket e uldars el mo er a Ikelesia el bo loldurokl el mo er a remechebuul el chad el meliuekl er a beluulechad.”
Oumesingd, er tirkel chad el ulerrenges a mlo sorir el muut el mo medengei a betok. Te uleker a ker. E tiaikid a mo uchul a techall losaod er a ebangkelio er a chelsel a bleketakl, e ungil, e diak lorrimel el teletael.
E chelecha el ngarngii a Internet me a media, eng mla mo beot a dosaod aikal tekoi er a chelsel a di cheldecheduch el diak el uaia ngara mong. A dousbech er ngii a di sel klisichel a rengud el mo rullii.
Bo Mui er a Chubechub
Mekngit el dolekoi, eng di ng beot el domtok er a uldesuel a tang. Kede blechoel mo kautoketok, oltuub, malechub e kede melbeakel. Se el bo el kesib a rengud, mekngit a blekerdeled, malechub e de temall a rengrir a rechad, eng dimereko el diak el sorir el mesuub el kired. Ng meringel a bo dodengei el kmo ng tela el chad a locha mla tuobed er a Ikelesia malechub eng dimlak el bol chedal a ikelesia ele ta er a rechad a dilu tekoi el tomall ma lechub e ngongasech a rengrir.
Ng kmal klou a mekngit el blekeradel er a beluulechad er chelechal sils. Meng teletael er a Internet el sebechel berrotel, eng beot a dedung a mekngit malechub e ngoberaod el tekoi er a online. Ng diak el bai kired, kid el chedal a medemdemk el Kristo, loba ngarbab, me a dmolech el beltikelreng? A chedaol llechukl a olisechakl el kmo, “A tekingem bo el blechoel lobengkel a delmedemk, el ngarngii a azi er ngii, me bo modengei el kmo ng mekra omonger er a chad” (Kolose 4:6).
Ng soak se el uldasu el kmo a tekinged bo el bleketakl el uaia sils er bab el mui er a chubechub. Ka momtab ng ko el mo uangera a telungalek er kid, wards, beluu, me a dirrek el beluulechad omko kede mo oltirakl er tia el beot el suobel?
Bo Mui er a Klaumerang
Bebil er a taem e kede kuk kmal mo ansing el soad a chetengakl malechub e kede kuk mo oltelechakl er kid sel sekum a rebebil a kongei er a ebangkelio. Ng klou a belkul el bo dodengei el kmo a Rubak a diak longerechir er kid el omult.
A bult a diak el mei lokiu a tekinged ng bai ngara babeluades el mei lokiu odngelel Chedaol Reng. Bebil er a taem eng kmal di telkib el tekoi lolchotel a klaumerang er kid malechub a teletael el dilubech a mo domdemkii a reng malechub eng mekengii a chesimer el uchul ea rebebil a mo melchesuar a mesisiich el klemerang lokiu a odbechel a Reng.
A President Brigham Young(1801–77) a dilu el kmo ng mle medengelii a ebangkelio el kmo ng klemerang er a taem er a “lesa chad el diak a a tekoi er a ngerel, duch er ngii el mengedecheduch er a buai, el di sebechel kmu el kmo, “Ak medengei, lokiu a klisichel Chedaol Reng, el kmo a Babier er a Mormon a klemerang, ea Joseph Smith a Profet er a Rubak.’” A President Young a millekoi ruriul er a rengesii tia el chisel a klaumerang, “A Chedaol Reng el mla er ngika el chad a milklemesii a klemedengei er ngak, me a llomes, klebkall, me a ngar el mo er a ulebongel a di [mla] ngarngii ruchei er ngak.”2
Rodam me a rodos, bol ngarngii a klaumerang er kemiu. A Rubak a sebechel choisois a tekoi el molekoi e smisiich. A Dios a diak lolengit er kemiu el mo omult ng bai di olengit me lobok a ngeriu. A ngerachel el omult a diak el ngercheliu—tia ngerchelel a chad el ngii orrenges me a dirrek el Chedaol Reng.
A Bek el Chedal a Ikelesia a Misionari
Kemiu el sechelik, chelechal sils eng kmal muut el betok a teletael el sebeched el mok a ngered e ouchais el mo er a rebebil el kirel a deureng er a ebangkelio er a Jesus Kristo. Ngarngii a rael ea rebek el chad—uldimukl er tirkel kmes el misionari—el mo teloi er a tia el ureor. Ng sebeched el sikii a rael e kede ousbech a duch er kid me a ikel de semeriar er ngii el mo olngeseu er tial ureor el omekeek er a beluulechad er a llomes me a klemerang. Se el bo deuaisei, e kede mo metik er a deureng el mei er tirkel tir a blak a rengrir e diak a dektir el “dechor el sionong er a Dios er a bek el taem” (Mosiah 18:9).
© 2013 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/12. Kengei er a oidel: 6/12. Oidel a First Presidency Message, February 2013. Palauan. 10662 881
Osischeklel Tia el Klumech
A ta er a bedochel el teletael er a osisechakl a mo “omeksemeriar er tirke el molisechakl er tir el mo … kudmokl a moktek el mo ngosuterir el mo oltirakl a suobel el bla mosisechakl” (Teaching, No Greater Call [1999], 159). Momdasu a siotai er tirke el molisechakl er tir el mo ngara nglunguuch el kedmeklii a moktek er tir el mo omerk er a ebangkelio el mo er a ta malechub ete betok el chad er chelechal buil. A roungalek a sebechir el mesaod a teletael el uchul ea remekekerei el ngalek a mo olngeseu. Ng sebechem el ngoseuir a telungalek el omdasu malechub ete mo er a teletelel omesodel ebangkelio er a chelsel a cheldecheduch e lomdasu aikel merael mei lomeruul er a Ikelesia el sebechir el siotai er a sechelirir.