Etop eke First Presidency, Ofiong Iba eke isua 2013
Item emi enode Missionary eke enyenede Eyihi
Mme anditiene Jesus Christ kpukpru ini enyene akamba ubiong ndikworo gospel esie nno ererimbot (kese Mark 16:15 –16). Sia edide ntre, ubak ini esisong ono nnyin ndikubore inua nnyung nting mbanga edu ukpono nnyin nno mbio owo ekekperede nnyin Kini ubak mbio Ufok Abasi enyenede nte eno nditing nno mbio efen kabanga edu ukpono nnyin, mbio eken enyene ekpri eyihi mme ndikere ete ke idikemeke, ekop buut, ndien ekop ndik ndinam ntre.
Ke ntak oro, yak Ami nting nkpo inang emi owo ekededi edinamde man anam item Andinyanga ke ndikworo gospel “nno kpukpru owo” (D&C 58:64).
Di Unwana
Edinem etop kiet eke ami mmade emi esidade eti St. Francis emi okotode Assisi odoho ete “Kworo gospel kpukpru ini ndien edieke odotde, kworo ye nditing mme iko.”1 Akpan nkpo ke iko emi edi ndifiok nte ke ubak idaha ata mme edikworo iko Abasi eke enyenede odudu owo isitingke ke inua.
Kini nnyin inamde akpaniko inyung idu uwem eke ekemde ye mme ubono nkpo nnyin, mme owo eyekut. Nte nnyin iyamade iwut idara ye inemesit, mme owo ndien editim ekut.
Kpukpru owo eyom ndidu ke inemesit. Kini nnyin mbio Ufok Abasi inyenede unwana eke gospel, mme owo ekeme ndikut inemesit nnyin enyung ese nte ima Abasi oyohode oduoi ke uwem nnyin. Mmo eyom ndifiok ntak nte edide ntre. Mmo eyom ndifiok ndibe nkpo nnyin
Oro anam mmo ebup oruk mbume emi “Nso inam mbufo enem esit ntem?” ye “Nso inam mbufo enyene oruk nti eduuwem emi kpukpru ini?” Iboro eke inode ke mme mbume emi, ndien, eyetim ono ufang ndinneme mbanga gospel Jesus Christ emi ekefiakde eyak ke isong.
Se Nneme nneme
Nditongo nditing iko mbanga edu ukpono — akpan – akpan nno mme ufan nnyin ye mbio eke nnyin imade — ekeme nditie nte okposong nkpo. Ikpedighe ntre. Nditing mbanga ukpebnkpo eke Spirit ye nditing mbanga mme edinam eke Ufok Abasi ke mkpri nneme edi mmem-mmem onyung enem edieke nnyin isinde ekpri uko ye ndat mmana ifiok.
Nnwan Mi, Harriet, edi ata uwutnkpo ke ndinam emi. Kini nnyin ikedungde ke Germany, enye eyeyom ufang man esin ukpeb nkpo Ufok Abasi ke mme nneme esie ye mme ufan ye mbio eke enye ofiokde. Nte uwutnkpo, kini owo obupde abanga nte weekend esie eketiede enye eyeting ete, “Sunday emi ekebede nnyin ima inyene ata inem edinam ke Ufok Abasi nnyin! Eyen-eren isua Efurekiet ama ono inem uting iko ke iso otu owo Ikie Iba eke mbio eboho nnyin kabanga ndidu edisana uwem.” Ye, “Ami mmofiok mbanga Akananwan emi edide isua Anang ye duop emi ekekimde mme blanket eke awakde akan Ikie Ition ndien ayak mme blanket oro ono Nkok Itie uto emi esinode unwam ke Ufok Abasi nnyin man eda esok mbio unana ke ofuri ererimbot.”
Ke ubak idaha nte edide ntre, mme owo ekekopde emi esiyom nditim mfiok mbanga Ufok Abasi nnyin. Mmo ebup mme mbume Ndien oro ono mme ufang nditing mbanga gospel ke mfefere, uko ye mmem-mmem usung.
Ye Internet mme usung usuan mbuk efen ndiworo ndi, emem mfin emi nditing mbanga mme nkpo emi ke usung nneme akan nte ekesidide. Se nnyin iyom edi uko ndinam oro.
Yoho ye Mfon
Nte ido edide, esitim emem ndifafanga nkpo Oro esitibe ke ubak ini nte nyin ifangake nkpo, isuhore inyung isabare owo efen. Kini nnyin iyatde esit, inana ukpono, mme ndinam mme owo ekop iyaresit, akpatre mkpo eke mmo editrede ndiyom edi nditim mfiok mbanga nnyin. Owo idikemeke ndifiok adanga ibat owo ekekpongde ye eketrede ndiduk Ufok Abasi ke ntak koro owo kiet ama eting iko eke abiakde mmo ye ndinam mmo ekop iyaresit.
Odu ediwak idiok edu uwem ke ererimbot mfin emi. Koro enying mme andiwet nkpo nsin ke Internet owo ifiokke, emem akan nte ekesidide nditing se idiok iko eke amade mme ndidian oruk idiok ndise eke amade ke Internet. Inaha nnyin, nte mme anditiene ata sung-sung Christ nnyin, inyene nkong-nkong akamba ata ima edu ukpono? Nwed Abasi ekpeb ete, “Eyak nneme mbufo enyene inem ke esit kpukpru ini, nte esinde inung ke esit, kpang mbufo ediongo nte mbufo ekpemende iko eno kpukpru owo iboro” (Nwed Mbon Collosae 4:6).
Ami mmema nte mme iko nnyin akpanwangade nte ikpa-enyong ke ini ndaeyo onyung oyoho ye mfon. Nte mbufo emekere nte mme ufok idung, ward, obio, mme ererimbot nnyin ekpetiede edieke nnyin ikpedade mkpri ukpeb emi isin ke utom?
Eyoho ye Mbuotidem
Ubak ini nnyin imesida akamba itoro mme akamba ubiom ikpe kini ekemde nte mme owo efen ekpenyimede iko Abasi nnyin. Ofon nnyin iti ete ke Jehovah iyomke nnyin inam owo akabare esit.
Ndikabare esit iditoho ke mme iko nnyin edi oto utom eke heaven nte asangade ye Edisana Spirit. Ubak ini kpukpru se ndikabare esit oyom edi udim iko ntiense nnyin kiet mme kabanga ukpeb nkpo man otongo anam esit emem mme ndiberede usung eke edinamde mbio efen ebo mmem-mmem akpaniko eto ndausung eke spirit.
President Brigham Young (1801–77) okodoho ete ke imo ikofiok ete ke gospel emi ekedi akpaniko kini imo “ikekutde erenowo emi mikemeke nditing iko man enem, onyung ananade eno nditing iko ke otu owo, nte nkukwere se enye ekekemede nditing edi, ‘Ami mmofiok, oto ke odudu Edisana Spirit, ke Nwed Mormon edi akpaniko, ke Joseph Smith edi Prophet eke Jehovah.’” President Young okodoho ete kini imo ikopde sung-sung iko ntiense oro, “Edisana Spirit emi otode owo oro ediyama ifiok imo, ndien unwana, ubong ye mkpo nsinsi uwem [edida] imo ke iso.”2
Ndito eka Iren ye iban, enyene mbuotidem. Jehovah ekeme ndinam mme iko eke mbufo etingde enyene odudu. Abasi ibupke ete mbufo ekabare owo esit edi odoho ete yak ekubore inua mbufo. Ubiong utom ndikabare esit idihe eke mbufo —oro ana ono mme andikop iko ye eke Edisana Spirit.
Kpukpru Member edi Okworo iko Abasi
Mme ndima ufan Mi, mfin emi ediwak usung odu akan nte ekesidede ono nnyin ndikubore inua nnyin mbuana oyoho idara mbuk eke gospel Jesus Christ emi ye mbio efen. Usung odu ono kpukpru owo —kpa missionary eke enyenede eyihi — ndibuana ke akwa utom emi. Nnyin kiet kiet imekeme ndiyom usung nte ikpedade sanga-sanga eno ye udong nnyin ndinwam ke akwa utom man iyoho ererimbot ye unwana ye akpaniko emi. Nte inamde ntre, nnyin iyekut idara eke ebinede mbio ekebuotde idem ye oyoho uko “ndidi ntiense nno Abasi ke kpukpru ini” (Mosiah 18:9).
© 2013 eketode Intellectual Reserve, Inc. Ekpeme kpukpru mme unen. Ekeming ke USA. Enyimme eming ke Iko Mbakara: 6/12. Enyimme Ndikabare: 6/12. Ndikabare Etop eke First Presidency Message, February 2013. Efik. 10662 553
Ukpeb nkpo eketode Etop Emi
Ata eti usung ndikpeb owo nkpo edi “nditeme mbio eke mbufo ekpebde ndinyene… idaha eke edinwamde mmo ndinam mme nti ukpeb nkpo eke mbufo ekekpebde” (Ukpebnkpo, Ikoot efen Ikponke Ntre [1999], 159). Kere banga nditeme mbio eke mbufo ekpebde nkpo ndibong akam man etongo ndibuana iko Abasi ye owo kiet mme ye ediwak owo ke ofiong emi. Mme Ete ye eka ekeme ndinneme mme usung eke nkpri ndito edikemede ndinwam. Mbufo nko emekeme ndinwam mbio ufok idung ndidiomo ye ndinam nte drama mbanga mme usung eke ikpetongode nneme iko Abasi ke ufot nneme nnyin inyung ikere ibanga mme edinam ufok Abasi emi edide ke iso eke mmo edikemede ndida ufan mmo kiet ete ndi.