Pweng sin Prestuhnsi Se Met, Fepweri 2013
Sie Kahs nuh sin Misineri Tahfuh Luo
Ma kunen mwet tuhma lutlut luhn Jisus Kraist pacl nuh kwewa in us wosasuc Lal nuh fin facluh (liye Mark 16:15–16). Tuhsruhktuh, kuhtuh pacl uh upac in ikacslah inwacluhsr ac sramsramkihn luhlahlfongi lasr nuh sin mwet rauni kuhtlac uh. Ke kuhtuh mempucr ke Alu uh oasr mwe sang se la in sramsram nuh sin mwet sahyac uh ke alu, kuhtuh ac luhman tahfuh luo kuh ake kac, mwekihn, kuh finne sahngweng in oruh.
Ke srihpac sacn, nga luhngse fahk ahkosr ma ma kuhtwena mwet kuh in oruh in ukwe kuh luhn Mwet Lahngo in fahkwack wosasuc “nuh sin mwet nuh kwewa” (D&C 58:64).
Oruh sie Kahlwem
Sie fahk pahiyuck kwacna tuhkuh nuh sin St. Francis fin acn Assisi ritiyuck, “Fahkwack wosasuc ke pacl nuh kwewa ac fin kuh, orekmakihn kahs.”1 Tiac fwackyuck ke fahk soko inge pa etuh se ma kwacna luti ma kuh emet tiac sruhmuhnyuck.
Ke oasr suwohs lasr ac moulkihn wo ke ohiyac lasr uh, mwet uh akihlen. Ke kuht ahkkahlwemye pwacr ac engan uh, elos akihlen yohk liki.
Mwet nuh kwewa luhngse in engan. Ke kuht mempucr ke Alu uh ahkkahlwemye kahlwem ke wosasuc uh, mwet uh kuh in liye engan lasr ac puhla ke luhngse luhn God nwacnwaclah ac kahkkahk ke moul lasr uh. Elos luhngse in etuh lah efuh. Elos ke etuh lah kuht oruh fuhkah.
Ma oruh elos in siyuck kihsen siyuck ma oacna “Efuh kom arlac engan?” kuh “Efuh kuh oasr kain atac wowo se ingacn lom pacl nuh kwewa?” Top nuh ke kihsen siyuck inge, pwacyena, kol suwohs nuh ke sie sramsram ke wosasuc fohlohkyak luhn Jisus Kraist.
Oruh Kom In Luhngse Sramsram
Sramsramkihn sifac ke alu uh—yohkna nuh sin kawuck lasr ac mwet kuht luhngse uh—kuh in tuhfalkihnyuck ac upac. Tiac enenuh in ohingacn. Sruhmuhn ma puhlakihnyuck ke nguhn kuh sramsram ke mukwikwi ke Alu uh kuh ma sikyak ke sramsram fal uh kuh in fihsrwacsr ac wo kuht fin orekmakihn kihtin puhlaik ac nuhnak.
Muhtwacn kiyuck, Harriet, el sie mwe srihkasrak na wowo ke ma inge. Ke kuht muhta fin acn Germany, el kuh in sokwack sie inkacnek in sramsramkihn sifac kuhpahsr nuh ke Alu uh nuh ke sramsram lal yurin kawuck ac mwet aetuhi uh. Nuh ke mwe srihkasrak, ke sie mwet siyuck ke kapihn wik lal an, el ac fahk, “Sacnri se inge oasr sie puhlakihn na wowo lasr lun lohm alu lasr ah! Sie tuhlihk mukul fuhsr matwac-yac-16 oruh sie sramsram na kahto ye muhtuhn mwet 200 ke alu lasr ah ke moulkihn sie moul nwacsnwacs.” Kuh, “Nga lotwelah ke sie muhtwacn mahtuh matwac-yac-90 suc otwelah plwacngkiht puhs liki 500 ac sang nuh ke prokracm in kahsruh luhn Alu ah in suhpweyucklac nuh yurin mwet enenuh nuh kwewa fin facluh.”
Puhs likina in tiac, mwet suc lohng ma inge luhngse in etuh yohk liki. Elos siyuck kihsen siyuck uh. Ac oruh sac kol nuh ke pacl wowo in sramsramkihn wosasuc uh ke sie atac fal, luhlahlfongi, ac tiac suhfal.
Ke muhtwacwacackiyacn Internet ac ohiyac luhn media, fihsrwacsr uh mihsenge in sramsramkihn ma inge ke atacn sramsram likina met ah. Ma na kuht enenuh uh pa puhlaik in oruh oacna.
Oruh In Sesseslah ke Pahkotwen
Koluk ohiyac, arlac fihsrwacsr in tiac ainsesei. Kwacna sikyak oruh kuht akuhkuhin, srihkkihn, ac ahkkoluk. Ke kuht foloyak, kasrkuhsrak, kuh ngalyak sin mwet uh, ma sahflah se elos luhngse uh pa in lutlut kacsr yohk likina met ah. Tiacna kuh in etuh lah mwet ekahsr som liki Alu uh kuh tiac welah ke srihpen sie mwet fahk kuhtuh ma ma ahkngalyacltahl kuh ahkkolukyacltahl.
Arlac yohk seahkfuhlwact fin facluh mihsenge. Ke srihpen wihklac luhn Internet uh, fihsrwacsri likina met ah in fahk mwe ahkngal kuh ahkkoluk uh. Yac tiac enenuh kuht, mwet tuhma lutlut yohk finsrak la luhn Kraist lasr, in eis sie atac fuhlwact, ac luhng kuhlwacng? Ma suhmuhslah uh luti, “Pacl nuh kwewa kowos in oruh sramsram lowos nuh selos in ahkinsewowoyaclos, ac mwe pihrakwack nuhnak lalos, ac kowos in ahkolah in topuk kuhtwena mwe siyuck lalos ke top fal ac suwohs” (Colossians 4:6).
Nga luhngse nuhnak ke kahs lasr uh nwacsnwacs oacna pe kuhsra kahlwem ac sesseslah ke kuhlwacng. Yac kom kuh in nuhnkuh ma sucu lasr, ward, muhtuhnfacl, ac finne facluh ac oacna kuht fin kuh in kapsra ip yohk fihsrwacsr inge?
Oruh In Sesseslah ke Luhlahlfongi
Kuhtuh pacl uh kuht eis nuh facsr sifacna yohklaclac kuh nuhnuhnkuh yohklac ke ac tuhkuh nuh sin mwet sahyac insese ke wosasuc uh. Arulacna yohk srihpac in esam lah Leum el tiacna motko kuht in oruh eklac uh.
Eklac uh tuhkuh tiac ke kahs lasr uh tuhsruhk ke luti inkuhsrao luhn Nguhn Muhtahl. Kuhtuh pacl uh oruh nuh kac uh pa sie pohloh kahs ke fahkwack luhlahlfongi lasr kuh ke sie puhlakihn in muhtwacwacack fihsrwacsr luhn sie inse ke ikacslah luhn sie sruhnguhl ma kuh in kol mwet sahyac in puhlakihn ma pwacye ke pihrihkyuck luhn Nguhn.
Prestuhn Brigham Young (1801–77) el fahk lah el etuh lah wosasuc uh pwacye ke el “liyacack sie mukul suhpah in kacs, kuh wacngihn talan in sramsram ye muhtuhn mwet, suc kuh in fahk muhkwena, ‘Nga etuh, ke kuh luhn Nguhn Muhtahl, lah Puk luhn Mormon pwacye, lah Joseph Smith el sie Mwet Pahluh luhn Leum.’” Prestuhn Young el fahk lah ke el lohng fahkwack luhlahlfongi puhsisacl sac, “Nguhn Muhtahl sikyak yurin mwet sac ahkkahlwemye etwacack, ac kahlwem, wolacna luhk, ac moul kawihl uh ye muhtuhk.”2
Tamuhlwel ac tahmtahel, eis luhlahlfongi. Leum el kuh in ahkyohkye kahs kowos sruhmuhn an ac oruh elos in fokoko. God el tiacna siyuck suwos in ekuhllah tuhsruhk in ikacslah inwaclum. Orekma in ikihl uh tiacna ma lowos—ma luhn mwet ma lohng ac nuh sin Nguhn Muhtahl.
Mempucr Nuh Kwewa Misineri
Kawuck sacohk luhk, mihsenge oasr inkacnek puhkantwen nuh sesr in ikacslah inwacluhsr ac akacsruhi yurin mwet sahyac uh pweng engan ke wosasuc luhn Jisus Kraist. Oasr sie inkacnek nuh sin mwet nuh kwewa—finne misineri tahfuh luo se—in wi orekma yohk se inge. Kuht kais sie kuh in sokwack sie inkacnek in orekmakihn talan ac kena lasr sifacna in ahkkweye orekma yohk sacn ke nwacklah facluh ke kahlwem ac ma pwacye. Ke kuht oruh ohinge uh, kuht fah sokwack engan ma tuhkuh yurin mwet ma yohk luhlahlfongi la ac puhlaik fal “in tu oacna mwet lohoh luhn God ke pacl nuh kwewa” (Mosiah 18:9).
© 2013 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/12. Ahkkweyeyucklac ke lweng: 6/12. Lwenglah luhn First Presidency Message, February 2013. Kosraean. 10662 868
Luti ke Pweng Se Inge
Sie inkacnek wo in luti pa in “ahkkweye mwet kom luti an in orwaclah … finsrak ma kuh in kahsrwelos moulkihn ip yohk kom luti an” (Teaching, No Greater Call [1999], 159). Nuhnkuh in suli mwet kom luti an in pruhe in orwaclah sie finsrak in akacsruhi ke wosasuc uh yurin sie kuh mwet puhs ke mahlwem se inge. Pahpah ninac an kuh in sramsramkihn inkacnek ma tuhlihk fuhsr an kuh in kahsruh uh. Kom kuh pac in kahsruh mwet ke sucu an in sokwack kuh srihke atacn inkacnek in sramsramkihn wosasuc uh ke oacna sie sramsram ac nuhnkuh ke mukwikwi luhn Alu ma ac orek ma elos kuh in suli sie kawuck an.