iTukutuku ni Mataveiliutaki Taumada, Maji 2013
Mo Cegu, Mo Maravu Mai
Ena dua na siga ena vica na yabaki sa oti, ni oti na qaravi cakacaka e valenivolavola, au a vakila vakaukauwa ni dodonu meu sikova e dua na marama yada qase sara ka sa curu koto ena vale ni veimaroroi baleti ira na sa qase e Salt Lake City. Au a draiva vakadodonu sara kina.
A lala tu na nona rumu ena gauna au yaco yani kina. Au taroga e dua na dauveiqaravi se evei na vanua e tiko kina ka kauti au sara ki na vanua ni gade. Au raica e kea na yada totoka oqo vata kei na tacina yalewa kei na dua nona itokani ka rau laki veisiko talega yani. Sa totoka dina na neitou veitalanoa vata toka.
Ena neitou veivosaki tiko, a curu mai e dua na turaga ena katuba ni rumu me mai kauta e dua na tini soda mai na kena misini saumi. A raici au mai ka kaya, “Ae, o iko o Tom Monson.”
“Io,” Au a sauma lesu. “Ia o vaka na irairai ni dua na Hemingway.”
A vakamacalataka ni o koya o Stephen Hemingway, na luvei Alfred Eugene Hemingway, ka a dau veiqaravi tu vaka noqu daunivakasala ena noqu a bisopi voli ena vuqa na yabaki sa oti, kau a dau vakatokai koya tu me o Gene. A kaya vei au o Stephen ni tiko talega e kea ena vanua vata o ya o tamana ka sa voleka tiko ni mate. A dau vaqirita voli tikoga na yacaqu o Gene, ka ratou vinakata na matavuvale me ratou veitaratara vata kei au ia ratou a sega tiko ni kunea rawa na noqu naba ni talevoni.
Au sa kerea sara ga ena gauna vata o ya ka gole vata kei Stephen i cake ki na rumu ni noqu daunivakasala e liu, ka ra sa soqoni vata tu kina na luvena kei ira eso tale, na marama watina a sa takali yani ena vica na yabaki sa oti. Na noqu sotavi Stephen ena vanua ni gade era okata na lewe ni matavuvale ni sa ikoya sara ga oqori na nona sauma lesu na Tamada Vakalomalagi na nodratou gagadre cecere meu na raici tamadratou ni bera nona mate ka sa isau ni nona kaci. Au vakila tale ga ni oqo na kena inaki, kevaka me a sega ni curuma o Stephen na rumu au a laki sikova ena gauna vata ga a lako yani kina o koya, keu a sega tale ga ni kila ni o Gene sara mada ga a tiko ena vanua o ya.
Keirau a vakalougatataki koya. A tiko kina na yalo ni vakacegu. A totoka sara neirau veisiko, ni oti o ya au sa biubiu.
Ena mataka ka tarava a qiritaki mai kina ni sa vakacegu o Gene Hemingway— ni oti ga e 20 na miniti mai na nona a ciqoma na veivakalougatataki mai vei au kei na luvena tagane.
Au a masu lo ni vakavinavinaka vua na Tamada Vakalomalagi me baleta Nona veivakayarayarataki ena veidusimaki, ka a vakauqeta na noqu veisiko ki na vale ni veimaroroi ka liutaki au vua na noqu itokani daulomani o Alfred Eugene Hemingway.
Au via vakasamataka na kena voqa mai ena vakasama nei Gene Hemingway ena bogi o ya — na qaqa ni sere ni lotu “Jisu, Sa Laba Na Cagi” —ena neitou a raragi ena iserau ni Yalotabu, masumasu ena yalolokuni, kei na kena soli e dua na veivakalougatataki ni matabete.
Yalovinaka ni Tiko!
Kua ni laivi au,
Me sa curu vinaka na waqa
Me uru ka matalau.
Au se taleitaka tikoga na sere ni lotu o ya ka vakadinadinataka na veivakacegui e solia:
Sega na cudru ni wai oqo
Se cagi tamata se tevoro,
Sa cata ka rawa na waqa ga
Ni moce ko koya ka dau lewa.
I cagilaba ka tu edai:
Ruru mai.1
Mai na wainimata kei na veivakatovolei, mai na rere kei na rarawa, mai na mosi ni yalo kei na galili ena nodra dau yali noda daulomani, sa tu na veivakadeitaki ni bula e tawamudu. Na noda Turaga kei na iVakabula sa ivakadinadina bula ni veika oqori.2 Na nona vosa ena i vola tabu e sa veirauti: “Dou tiko lo, mo dou kila niu sa Kalou” (Same 46:10). Au vakadinadinataka na dina oqo.
© 2013 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/12 Vakadonui me vakadewa: 6/12 Vakadewa ni First Presidency Message, March 2013. Fijian 10663 858
Veivakavulici mai na iTukutuku Oqo
Na itukutuku oqo e rawa me vakacegui ira ka sa yali nodra daulomani ena mate se vei ira eso ka ra tovolea vagumatua baleta nodra vakatovolei. Me ikuri ni itukutuku nei Peresitedi Monson, vakasamataka mo wasea e dua vei ira na ivolanikalou oqo, yavutaki mai na nodra gagadre o ira o vakavulica: Jope 19:25–26; 1 Koronica 15:19 –22; Mosaia 24:13–15; Vunau kei na Veiyalayalati 122:7–9. Kevaka o vakauqeti, e rawa mo vakadinadinataka na vakacegu e solia vei iko na i Vakabula ena nomu vakatovolei.