iVaqa ni Veisiko, Maji 2013

Vakabulabulataki

Vulica ena masumasu na iyaya oqo ka, ena sala e veiganiti, veivosakitaka vata kei ira na marama o sikova. Vakayagataka na veitaro me vukea nomu vakaukauwataki ira na marama ka cakava sara me dua na tiki ni vakabulabulataki ni nomu bula na iSoqosoqo ni Veivukei. Me ikuri ni itukutuku, lako ki na reliefsociety.lds.org.

Vakabauta, Matavuvale, Veivukei

Na noda parofita, o Peresitedi Thomas S. Monson, e sa vakayaloqaqataki keda meda “dolele yani ka vueti ira era gadreva tu na noda veivuke ka laveti ira cake ki na gaunisala cecere ka vinaka cake. … E cakacaka ni Turaga, ia ni da sa cakava tiko na cakacaka ni Turaga, … sa na ganiti keda na veivuke ni Turaga.”¹

Ena vuqa na yabaki sa oti o La Vene Call kei na nona itokani dauveisiko e rau a sikova e dua na marama ka luluqa tu vakalotu. E rau a tukituki e katuba ka raica e dua na tina gone ka dara tu na kote itauwelu. E rairai tauvimate, ia e rau qai kidava nona leqa sa ikoya na yaqona ni valagi. E rau a dabe na dauveisiko ka veivosaki vata kei na tina gone vakaleqai tu.

Ena nodrau sa lesu tale, e rau kaya, “O koya e luve ni Kalou. E tiko nodaru itavi me daru vukei koya.” Rau sa dau veisiko vakawasoma. Ena veigauna yadua, e rau raica rawa ka vakila e dua na veisau vinaka. E rau kerea na marama me gole yani ki na iSoqosoqo ni Veivukei. E dina ni a sega ni lomana, ia a qai yaco me dau gole sara vakawasoma. Ni oti na veivakayaloqaqataki, ratou a gole yani i lotu, o koya kei na turaga watina kei na luvedrau yalewa. A vakila na Yalo Tabu na turaga watina. A kaya, “Au na cakava na ka e vakatututaka na bisopi.” Eratou sa bulabula sara ena Lotu ka ratou sa vauci vata ena valetabu.²

Mai na iVolanikalou

3 Nifai 18:32; Vunau kei na Veiyalayalati 84:106; 138:56

Mai na Keda iTukutuku Makawa

Nodra vukei o ira era sa lakosese tu me ra lesu mai ki na kosipeli i Jisu Karisito e vakawasoma me tiki ni dua naYalododonu Edaidai kei na dua na lewe ni iSoqosoqo ni Veivukei. O Peresitedi Brigham Young (1801–77) a kaya, “Meda veilomani vakataki keda, … ia ko ira na rai me ra tuberi ira na mataboko me yacova ni ra sa rawa ni raica vakataki ira na sala.”³

O Eliza R. Snow, ikarua ni peresitedi raraba ni iSoqosoqo ni Veivukei, a vakaraitaka na vakavinavinaka levu ena nodra sasaga na marama e Ogden, Utah, USA, me ra veivakaukauwataki vakataki ira. A kaya kina, “Au kila vinaka tu ni levu sara na cau [ena ivakarau ni veiqaravi] e sega ni [volai] tu vakaivolatukutukutaki. Ia ena kena kilai ni maroroi tu e dua na ivolatukutuku vakalomalagi me baleta nodra cakacaka na marama ena nodra dolele yani vei ira e sa batabata tu na yalodra, a kaya kina: “E kaya o Peresitedi Josefa Simici ni a tauyavutaki na isoqosoqo oqo me vakabulai kina na yalo. … E maroroi tu e dua tale na ivola me baleta na nomuni vakabauta, na nomuni yalovinaka, na nomuni cakacaka vinaka, kei na vosa. … E sega ni dua na ka e yali.”⁴

© 2013 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/12 Vakadonui me vakadewa: 6/12 Vakadewa ni Visiting Teaching Message, March 2013. Fijian 10663 858

iDusidusi

1. Thomas S. Monson, “Na Veikacivi Tabu ni Veiqaravi,” Liaona, Me 2005, 55, 56.

2. iVola ki na mataveiliutaki raraba ni iSoqosoqo ni Veivukei mai vua na luvena yalewa o LaVene Call.

3. Brigham Young, ena Luvequ Yalewa ena Noqu Matanitu: Na iTukutuku kei na Cakacaka ni iSoqosoqo ni Veivukei (2011), 107.

4. Eliza R. Snow, ena Luvequ Yalewa ena Noqu Matanitu 117.

Na Cava Meu Cakava?

1. Au sa yalodei tu beka noqu kerea na marama luluqa vakalotu me keirau gole vata ki na soqoni ni iSqosoqo ni Veivukei?

2. Era dau yalodei beka na marama au qaravi ira mera taroga vei au na veika me baleta na kosipeli?