Rongorongo man te Moan Beretitentii, Maati 2013
Raoi, Tei Matoa
N te bong teuana tabeua ririki n nako, imwiin tararuaan te mwakuri inanon te aobiti, I namakina te namakin ae e korakora ni kan kawara te aine ae e a bon kara are e a tia n riki bwa te aoraki ngaia n aia tabo kaara ake a maeka i Salt Lake City. I a buti nakoina n akea riki kawaiu.
Ngke I a nako ni kawaria n ana ruu, I kunea bwa akea kaaina. I titiraki nakon are e tei bwa e mena ia ao e tuangai bwa e mena n te lounge. I a kunea ikekei te aine aei are akea buuna ae tamaroa ma tarina ao temanna raoraona.Ti karekea te maroroo ni bootaki ae tamaroa
Ngke ti tabe ni kakaraki, temanna temwaane e roko man te mataroa ao ni karekea te soda man te vending mitiin. E taraai ao e taku. “Bukin tera, ngkoe Tom Monson.”
“Eng,” I kaeka. “Ao ko tara n aiaron Hemingway.”
E kaotia bwa bon ngaia Stephen Hemingway, natin Alfred Eugene Hemingway te mwaane, are e beku bwa te kauntira ngke I bitiobu inanon ririki aika a mwaiti n nako ao I wetea Gene. Stephen e tuangai bwa tamana e mena n te tabo naba aio ao e a bon kania matena. Gene e wewetea arau, ao te utu a tangiria ni kan reitaki ma ngai ma aki kona ni karekea te tareboon nambwa ibukiu.
I bubuti inaomatau n te tai ae waetata ao n nako ma Stephen nakon te ru are e mena iai au kauntira ngkoa, ike tabeman aomata ma natina a botaki ni kabane iai, buna e a kaman mate inanon ririki ake mai imwaina. Kaain te utu a taraia bwa kaitibou ma Stephen n te runikatangaina bon ana kaeka Tamara are i Karawa ibukin nanoia bwa N na nora tamaia imwain matena ao ni kaeka ana tareboon. I namakinna naba bwa aei bon bukina, bwa ngkana e aki rin Stephen n te ruu are I kawaria n te tai raoi are e karaoia, N aki atakina bwa ngaia Gene e bon mena naba n te tabo anne.
Ti anga te kakabwaia nakoina. Tamnein te raoi e reitinako n tiku. E rang n tamaraoa ara kakawari, I mwiina are I nako.
N te bong are imwina te tareboon e kaotia bwa Gene Hemingway e a toki maiuna—tii 20 te miniti imwin karekean te kakabwaia mairoun natina ao ngai.
I karaoa au tataro ae mabu ni karabwarabwa nakon te Tama are i Karawa ibukin namakinan ana kairiri, are e kaira au kakawari nakon te tienta n tararua ao ni kairai nakon raoraou ae tangiraki Alfred Eugene Hemingway.
I tangiria n iangoia bwa ana iango Gene Hemingway n te tairiki anne—ngke ti namakina te tamnei, reitakira n te tataro ae mangori, ao ni katikui kakabwaia n te nakoanibonga—e kaoka riki te taeka are taekinaki n te anene “Te Matita, ibukin te Buaka ae Korakora”:
Tiku, O te Tia Kabooira ae kakabwaiaaki!
Tai manga kitanai,
Ao ma te kukurei N na karekea te tabo n roro
Ao ni katoka kuau iaon te bike ae tamaroa.
I teimatoa n tangira te anene anne ao ni kakoaua bwa e anga te karaunano:
E ngae ngke e korakora te buaka ae orea taari
Ke riaboro ke mwaane ke tera riki,
Akea tari ae kona kainakoa te kaibuke are e mena iai
Mwatitan marawa ao aon te aba ao karawa.
Ni kabanea a bane n ongotaeka iroum:
Raoi, tei matoa.1
Rinanon rannimata ao kataki, rinanon maku ao nanokawaki, rinanon te marakinnano ao te maroa ni buan ae ko tangiria, iai te berita bwa te maiu akea tokina. Ara Uea ao ara Tia Kamaiu ngaia te tia kakoaua ae maiu are e kaotia.2 Ana taeka aika a tabu ake a koreaki a tau mwaitia: “Tei moa, ao kam na ataai bwa te Atua ngai” (Taian Areru 46:10). I kakoaua nakon te koaua aei.
© 2013 iroun Intellectual Reserve, Inc. A bane n tauaki mwiin taian kariaia ibukin katotongana. Boretiaki i USA. Kariaiakana n te Ingiriti: 6/12. Kariaiakan rairana: 6/12. Rairan te First Presidency Message, March 2013. Kiribati. 10663 859
Reirei man te Rongorongo Aei
Aei te rongorongo are e kona ni karau nanoia naake a bua raoia ake a tangiriia ke naake a korakai n taian kangaanga. N ikotaki ma ana rongorongo Beretitenti Monson, iangoia n tibwa teuana man kibu man boki aika a tabu ake, ko reireinia: Iobi 19:25–26; 1 I Korinto 15:19–22; Motiaea 24:13–15; Doctrine ao Covenants 122:7–9. Ngkana ko kairai, ko kona n taekinna ana raoi te tia Kamaiu are e anganiko n am tai ni kataaki.