Pweng sin Prestuhnsi Se Met, Mahs 2013
Mihs, Tui
Sie lwen ah ke yac ekahsr somlah ah, tukun oruh orekma ke ohfohs ah, nga puhla sie puhlakihn na fokoko in muhtwacta nuh yurin sie katinmas mahtuh suc kaul ke sie acn in karihngihnyuck luhn mwet mahtuh fin acn Salt Lake City. Nga kahsruhsr suwohswohs nuh we.
Ke nga som nuh infuckihl lal ah, wacngihn mwet nga sokwack we. Nga siyuck sin sie mwet karihngihn ah acn el oasr we uh ac kolyuclac nuh ke sie acn in monglac. Nga sokwack katinmas na wowo se inge muhta yurin tahmtahel se wiyacl ac sie pac kawuck we. Kuht tuhkweni oruh sie asramsrami na wowo.
Ke kuht sramsram ah, mukul se tuhkuh nuh ke sruhnguhl ke infuckihl sac in eis soko kola ke insin in kola se. El ngwetma nuh sihk ac fahk, “Pai, kom pa Tom Monson.”
“Ahok,” nga topuk. “Ac atom oacna sie Hemingway.”
El ahkkahlwemye lah el pa Stephen Hemingway, wen nahtuhl Alfred Eugene Hemingway, suc tuh oruh mwet in kahsruh se luhk ke nga tuh sie pisap yac pucspucs somlah ah ac suc nga pahngon Gene. Stephen el fahk nuh sihk lah pahpah tuhmwacl ah oasr pac lun lohm sac ac el apkuhran in misac. Gene el fihlfihlin pahngon inek, ac sucu uh kena sruokyucwi tuhsruhk tiacna kuh in sokwack nacmpuh in tacluhfon luhk.
Nga sana sekihnyuclac ac weluhl Stephen nuh lucng ke infuckihl luhn mwet kahsruh mah se luhk ah, ma tuhlihk nahtuhl sahyac ah tuhkweni pac we, muhtwacn kiyacl ah misac ke yac ekahsr met ah. Mwet ke sucu an nuhnkuh toeni se luhk yohrohl Stephen lun acn in monglac se ingacn oacna sie top yurin Pahpah tuhmasr Inkuhsrao nuh ke kena yohk lalos tuh ngan liye pahpah tuhmwacltahl an met liki el misac ac topuk pahng lal. Nga puhla pac lah pa inge ma sikyak uh, tuh fin Stephen el tiacna utyak nuh infuckihl se ma nga muhtwacta we ah ke pacl se ma el oruh ah, ngwac tiacna etuh lah Gene el oasr lun lohm sac.
Kuht sang sie mwe insewowo nuh sel. Sie nguhn ke mihs tuhkuh. Kuht oruh sie muhtwacta na wowo, tohkohyang na nga som.
Lututacng tohkoh ah sie pahng ke tacluhfon fahkwack lah Gene Hemingway el misac—kena minit 20 tukun el eis mwe insewowo se sihk ac mukul se nahtuhl ah.
Nga ahkkahlwemye sie pruhe mihs ke kuloh nuh sin Pahpah Lucng ke kolyuck Lal, suc pihrihk muhtwacta luhk nuh ke acn in karihngihn sac ac kolyuc nuh yurin kawuck sacohk se luhk ah Alfred Eugene Hemingway.
Nga luhngse in nuhnkuh lah nuhnak lal Gene Hemingway ke ekuh sac—ke kuht puhlakihn Nguhn uh, wi ke pruhe puhsisacl, ac ahkkahlwemye sie mwe insewowo ke pristut—fahk kahs sruhmuhnyuck lun puk in on uh “Mwet Luti Fuhlwact, Mwe Sruhf Uh Upaclah”:
Kahkahsrihk, O Mwet Molwelah wowo!
Tiac sifil muhlkihnyuclac,
Ac ke engan nga fah orwaclah inmolsron wowo
Ac monglac fin pe acn engan uh.
Nga srwackna luhngse on in alu soko ah ac fahkwack ke ahkwoye kac uh:
Finne kasrkuhsrak ke pahkah inkof uh
Kuh ma koluk kuh mwet uh kuh oacna sie ma,
Wacngihn kof kuh in ohkohmlah acn ma oak uh oan we.
Mwet Kol luhn meoa ac facluh ac acn lucng.
Elos nuh kwewa fah ahkos kena lom:
Mihslac, tui.1
Ke sronin muhta ac ma upac uh, ke sahngweng ac ahsor uh, ke kweok ac muhkahimtacl ke wacngihnlac luhn mwet luhngse uh, pwacyena lah moul uh ma pahtpaht. Leum ac Mwet Lahngo lasr pa mwet lohoh moul lah ma ingacn pwacye.2 Kahs Lal ke ma sihmlac muhtahl uh fal: “Kowos in tiac sifil mweun, ac etuh lah nga God” (Psalm 46:10). Nga fahkwack ke ma pwacye inge.
© 2013 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/12. Ahkkweyeyucklac ke lweng: 6/12. Lwenglah luhn First Presidency Message, March 2013. Kosraean. 10663 868
Luti ke Pweng Se Inge
Pweng se inge kuh in ahkkweye mwet suc wacngihnlac mwet luhngse la ke misac kuh elos suc puhlakihn sie ma upac. In weacng pweng lal Prestuhn Monson, nuhnkuh in akacsruhi sie sin ma suhmuhslah ten inge, yohkna ke enenuh luhn mwet kom luti an: Job 19:25–26; 1 Mwet Korint 15:19–22; Mosiah 24:13–15; Doctrine and Covenants 122:7–9. Fin pihrihkyuck, kom kuh in fahkwack ke mihs ma Mwet Lahngo el usot nuh sum ke pacl upac lom uh.