Klumech er a First Presidency, Ongedei el buil 2013
Budech, Bom Chelellakl
Ta er a klebesei er a sesei el rak er a memong, uriur er a urerek er a obis, e ak mlo omelchesiu el kirek el mo odngelii a uodel el mesobil redil el mle smecher el ngara blirir a remechuodel er a Salt Lake City. A kulmekall el mong.
Ak bocha er a delmerab er ngii, eng mle bechachau. A kuleker er a oungerachel el kirel eng dula er ngak el mo er a kuk ta er a delmerab. Ak bochang eng mla er ngii me a merrengel ma ta er a sechelei el kaiuedingel. Ng kmal mle ungil a cheldechedemam.
Tia er a ki mchadecheduch, e a ta el chad a mlei el soiseb er tia el delmerab el me melai er a imelel soda er a mesil blil oteruul el ilumel. Ng ulemes er ngak e dula el kmo, “Ea, kau a Tom Monson.”
“Oi,” ak dilung. “E kau a locha Hemingway.”
Ng dula el kmo ng Stephen Hemingway, el ngelekel a Alfred Eugene Hemingway, el mle counselor er ngak er ak bisop er a betok el rak er a memong e ak mle belchoel loleker ngii el Gene. A Stephen a ulechais er ngak el kmo a demal a nga er tia el osisiu el ospitar e kmal di merael mong. A Gene a meketeketang el omekedong er a ngklek, me a telungalek er ngii a mle sorir losiik er ngak e uaia lak el sebechir el metik er a dengua er ngak.
Ak di mle mereched el melmesumech e merola lobengkel a Stephen el mocha er tia el delmerab er ngika el mle counselor er ngak, el rengelekel a mla er ngii, e a bechil a mla mo er ngii a tela el rak er a lemad. A rechedal tia el telungalek a mlo omtab er tia el klaseues er ngak me a Stephen el uaia ble le nger er a Chedam er a Babeluades el kirel ongterir me bol sebechek el mesa demerir ruchei er a lemad e kunger er a ongtil. Ak dirrek el mlo omelchesiu el kmo tiaikid a teletael, ele omko Stephen a dimlak el bel siseb er a delmerab el kbla er ngii er seikid el taem, eng locha dimlak bo kudengei el kmo a Gene a nga er tia el ospitar.
Aki milsa klengeltengat. A reng er a budech a mlo mesisiich. Ng mle klebokel a klaiuedingel er kemam, e ak merolang.
A bol kukuk er a tutau ea dengua mle er ngak el kmo a Gene Hemingway a mlo smecher er a kmal di chelsel— a lluich el bung ruriul er a lenguu a klengeltengat el ngak me a ngelekel a milsang.
Ak mocha dulii a nglunguuch er a renguk loureng a sulel a Chedam er a Babeluades er a ulekrael er Ngii, el mlo uchul a odngelek el mo er tia el blirir a rsmecher e milkrolak el mo er a sechelik er a Alfred Eugene Hemingway.
Ng soak lomdasu el kmo a mla er a uldesuel a Gene Hemingway er sel kesus—el ki ulemelchesiu er a Chedaol Reng, lobengkel a nglunguuch er a reng, me a klengeltengat er a priesthood—a meketakl a tekoi er a chelsel a chelitakl el “Master, the Tempest Is Raging”:
Bem keed, Kau el Osobel!
Lak bom cheroid er ngak,
Bok ngara deureng el mo er sel kbo er ngii
E bok ngara ulengull.
Ng kmal dirk soak tia el chelitakl e odersii a klaumerang er ngak el kirel ongelaod el beskid:
A le sal kmal mesisiich el meringel a daob
A le chelid ma le chad malechub e ngii dil ngerang,
Ng diak el rechorech a bilas
Le Mastang er a daob ma beluulechad me a eanged.
Rokui el di mo olngesenges er kau:
Budech, bom chelellakl.1
Ngokiu a klengitelreng me a ongarm, ngokiu a dakt me a chelebuul, ngokiu a ringel me a klesabisi sel bol dibus a betik er a rengud, e ngarngii sel klaumerang el kmo a klengar a diak a ulebengelel. A Rubak e Osebeled a ngar el sioning el kirel tiang.2 A Tekingel el llechukl er a chedaol llechukl a klebech el dolab: “Bom chelellakl, e modengei el kmo ngak a Dios” (Psalm 46:10). A kuuchais el kirel tia el klemerang.
© 2013 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/12. Kengei er a oidel: 6/12. Oidel a First Presidency Message, March 2013. Palauan. 10663 881
Osischeklel Tia el Klumech
Tia el klumech a sebechel cholaod a rengrir tirke el ngarngii a mla mo dibus el betik er a rengrir malechub e tirke el ngara chelsel a ringel. Ongingil a klemechel a President Monson, e momdasu ouchais aikakid el bades er a chedaol llechukl, lultuil er a usbechellir tirkel molisechakl er tir: Job 19:25–26; 1 Korinth 15:19–22; Mosiah 24:13–15; Doctrine and Covenants 122:7–9. A momelchesiu er ngii, e mouchais el kirel a budech el Osobel a mla meskau er a chelsel a ringel.