Poraus seni ewe Aewin Presetensi, April 2013
A Manaueta
Eu kapasen pwaratan ennetin an Jises Kraist Manausefan mi eu pisekin nukunuk me akkachocho. Iwe a tongeni ina usun fan iten noun Kot kewe meinisin. Ina usun fan itei fan eu ran non June 1969 nupwen inei we a mano, me ier meinisin seni ena fansoun, me epwe ina usun tori ua kunasefanni.
Netipechou fan iten am aimufesen mi muttir ekkesiwin ren pwapwa. Mi chok anean am chusefan fengen non pwapwa. Pokiten ewe Samon a pwarata chommong mettoch me ren Noun kewe soufos me pokiten ewe Ngun mi Fel a esinei ennetin ewe Manausefan ngeniei, ua tongeni kuna non tupuwei epwe ifa usun ach chusefan ren ekkewe ir sia tongei mi unusochuno me manausefanita:
Ikkei ekkewe ir repwe feito non ewe aewin manausefan. …
Ikkei ekkewe ir minne iter mi makketiw won nang, minne Kot me Kraist ra sou kopungun meinisin.
Ikkei ekkewe ir ra wenechar me ra unusoch me ren Jises ewe chon afforun ewe pwon minefo, minne a fori ei achasefan mi unusoch me ren suputiwen pwisin chaan (nengeni D&C 76:65, 68–69).
Pokiten Jises Kraist a ataieno ekkewe senin mano, meinisin noun Semach won Nang kewe semirit ra uputiw me won fonufan me repwe manausefanita ngeni inis esapw mano. Iwe ach kapasen pwaratan ena nongonong mi ennet a tongeni angei senuk om netipechou seni manon emon chon famini are chiechi me a ekkesiwini ren pwapwa me akkachocho.
Ewe Samon a ngenikich meinisin niffangen ewe manausefan, minne ngunuch ra nom non inis ese wor ngawan (nengeni Alma 11:42–44). Inei epwe nikinikinin serafo me epwe saram, ekkewe niwinin watte ierin me chommongun ierin an riaffou esap chuen nom. Ena sokkun epwe feito ngeni i me ngenikich pwe eu niffang.
Nge ekkewe ir mi mochen fiti i tori feinfeino aupwe fini och mettoch mi atufich ngenikem pwe epwe tufich, ne nonnom fan mesen ewe Sam me Noun we At mi Achengicheng non ning. Ina ewe chok neni minne manauen famini mi tongeni sopweno tori fansoun ese much. Eu kapasen pwaratan ena a awatteno ai mochen ne atufich ngeniei me ekkewe ir ua tongei pwe aupwe kuna ewe muun selestial mi napanap me ren ewe Achasefanin Jises Kraist mi angang non manauach (nengeni D&C 76:70).
Ewe Samon a awora eu minen emwen fan itach non ach achocho ngeni manau ese much me non ekkewe iotekin sakrament minne a anisiei me a tongeni anisuk. Sia tingor ne asofosefanni ach pwonen papatais iteitan mwichen sakrament.
Sia pwon pwe sipwe chechemeni ewe Chon Amanau fansoun meinisin. Ekkewe nikinikinin An asor ra anisikich ne mefi kinisou fan iten napanapan mon A monatiw ne atai ekkewe senin mano, ne awora ngenikich chen, me awora omusomusen ach kewe tipis meinisin ika sia finata ne aier.
Sia pwon ne anneasosichi An kewe annuk. Anneani ekkewe pukfel me kapasen ekkewe soufos mi manau me ausening ngeni chon afanafan non mwichen sakrament epwe achema ngenikich usun ach pwon ne anneasosich. Ewe Ngun mi Fel a pwar ngeni tupuwach me netipach ekkewe annuk mi namwot rech pwe sipwe anneasosichi non ena ran.
Non ekkewe iotekin sakrament, Kot a pwon ne tinano ewe Ngun mi Fel ne nom rech (nengeni Moroni 4:3; 5:2; D&C 20:77, 79). Ua kuna pwe non ena chok fansoun a usun pwe Kot a interfiuini ei pwisin. A achema ngeniei met ua fori minne a apwapwaiti I, namwotan aier me omusomusen tipis, me iten fiti mesen aramas A mochen pwe upwe angang ngeni fan itan.
Non ekkewe ier ra no, ena mettoch a ekkesiwini nukunuk ngeni memefin tong ennet me a apochokuna ai sinei pwe chen a kawor ngeniei me ren an ewe Chon Amanau we Achasefan me Manausefan.
Ua kapasen pwarata pwe Jises mi ewe Kraist a manaueta, ach Chon Amanau, me ach nenien appiru mi unusoch me souemwenin manau ese much.
© 2013 seni Intellectual Reserve, Inc. Meinisin pung mi kawor. A för non Amerika. Kapungunon non fosun Merika: 6/12. Kapungunon chiakun: 6/12. Chiakun ewe First Presidency Message, April 2013. Chuukese. 10664 901
Afanafan seni Ei Poraus
Sipwe awewefengeni pukfel meinisin ngenikich, pwe sipwe ochuno me kaeo seni (nengeni 1 Nifai 19:23). Kopwe ekiekin anneani ekkewe iotekin sakrament, mi nom non Doctrine and Covenants 20:76–79. Mwirin ka anneani an Preseten Eyring kewe afanafan usun ekkewe iotekin sakrament, meni kopwe mochen tingorei ekkewe ir ka aiti pwe repwe ekieki usun ekkoch napanap ekkei iotek mi tongeni emwenir non manauer me anisir ne niwinsefanita ne nonnom ren Semach won Nang me Jises Kraist.