Mensahe sang Unang Panguluhan, Abril 2013
Nabanhaw Sia
Ang panaksihon sang pagkamatuod sang Pagkabanhaw ni Jesucristo isa ka ginakuhaan sang pag-asa kag determinasyon. Kag ini [ang Pagkabanhaw] mahimo man ini para sa bisan sin-o nga anak sang Dios. Nangin matuod ini para sa akon sang isa ka adlaw sang tig-ilinit sa bulan sang Hunyo tuig 1969 sang napatay ang akon iloy, nangin amo sini sang mga tinuig sumugod sadto kag mangin amo sa gihapon tubtob nga makita ko sia sa liwat.
Ang kasubo gikan sa temporaryo nga paghilayoay sa gilayon ginbuslan sang kalipay. Labaw yadto sangsa isa ka pag-asa para sa isa ka malipayon nga liwat nga pag-updanay. Tungod nga ang Ginuo madamo sing ginpahayag paagi sa Iya mga propeta kag tungod ang Balaan nga Espiritu nagkompirmar sang kamatuoran sang Pagkabanhaw sa akon, mahunahuna ko kon ano ang mangin kahimtangan sa liwat nga makaupod naton ang aton natinluan kag nabanhaw nga mga pinalangga:
Amo ini sila ang magabangon sa pagkabanhaw sang mga matarong. …
Amo ini sila nga ang mga ngalan nasulat sa langit, sa diin ang Dios kag si Cristo amo ang hukom sang tanan.
Amo ini sila ang matarong nga mga tawo nga ginhimo nga perpekto paagi kay Jesus nga manugpatunga sang bag-ong kasugtanan, nga among nagplano sining perpekto nga pagpasag-uli [atonement] paagi sa pagpaagay sang iya kaugalingon nga dugo” (tan-awa sa D&C 76:65, 68–69).
Bangod ginbugto ni Jesucristo ang mga gapos sang kamatayon, ang tanan nga kabataan sang Amay nga Langitnon nga natawo sa kalibutan mabanhaw sa isa ka indi na mapatay pa nga lawas. Gani ang akon kag ang imo nga panaksihon sa sinang mahimayaon nga kamatuoran sarang magkakas sang kasakit sa pagtaliwan sang isa ka pinalangga nga miyembro sang pamilya ukon abyan kag buslan ini sing malipayon nga pagpaabot kag mabaskog nga determinasyon.
Ang Ginuo naghatag sa tanan sang regalo sang pagkabanhaw, sa diin ang aton mga espiritu ginabutang sa mga lawas nga wala sing mga kasablagan (tan-awa sa Alma 11:42 –44). Ang akon iloy mangin bataon kag malipayon kon tulukon, nga ang mga epekto sang pag-edad kag tinuig nga pag-antos sang lawas wala na. Magaabot ina sa iya kag sa aton bilang isa ka regalo.
Apang kita nga nagahangad nga mangin kaupod sia sa katubtuban kinahanglan maghimo sing mga pagpili agud mangin bagay sa sina nga pagpakig-upod, sa pagkabuhi sa kon diin ang Amay kag ang Iya Pinalangga nga nabanhaw nga Anak nagapuyo sa kahimayaan. Amo lamang ina ang lugar sa diin ang pangpanimalay nga kabuhi upod sa pamilya sarang makapadayon sa wala’y katapusan. Ang panaksihon sang sina nga kamatuoran nagpadako sang akon determinasyon agud nga ako kag ang akon mga pinalangga mangin bagay para sa pinakamataas nga halintang sa selestiyal nga ginharian paagi sa Pagpasag-uli ni Jesucristo nga nagaepekto sa aton mga kabuhi (tan-awa sa D&C 76:70).
Ang Ginuo nagatanyag sa aton sang giya sa sini nga misyon para sa pagpangita sang wala’y katapusan nga kabuhi sa pang-sakramento nga mga pangamuyo nga nagabulig sa akon kag sarang magbulig sa inyo. Ginaagda kita sa pagbag-o sang aton mga kasugtanan sa bunyag sa tagsa ka sacrament meeting.
Nagasaad kita nga dumdumon pirme ang Manluluwas. Ang mga simbolo sang Iya pagsakripisyo nagabulig sa aton nga maapresyar ang kadakuon sang iya pag-antus agud mabugto ang mga gapos sang kamatayon, agud magtanyag sa aton sing kaluoy, kag maghatag sing kapatawaran sa tanan naton nga mga sala kon pilion naton ang maghinulsol.
Nagasaad kita nga tumanon ang tanan Niya nga mga kasuguan. Ang pagbasa sang balaan nga mga kasulatan kag sang mga pulong sang buhi nga mga propeta kag ang pagpamati sa inspirado nga mga manughambal sa aton mga sacrament meeting nagapahanumdum sa aton sang aton mga kasugtanan sa paghimo sang mga ini. Ginadala sang Balaan nga Espiritu sa aton mga panghunahuna kag balatyagon ang mga kasuguan nga labi naton kakinahanglan nga tumanon sina nga adlaw.
Sa pang-sakramento nga mga pangamuyo, ang Dios nagasaad nga Iya ipadala ang Balaan nga Espiritu nga mangin kaupod naton (tan-awa sa Moroni 4:3; 5:2; tan-awa sa D&C 20:77, 79). Natukiban ko sa sina nga tion nga ang Dios sarang maghatag sa akon sang daw pareho sa isa ka personal nga pagpakigsugilanon. Ginpabatyag Niya sa akon ang ginhimo ko nga nagpalipay sa Iya, ang kakinahanglan ko nga maghinulsol kag mapatawad, kag ang mga ngalan kag mga nawong sang mga tawo nga luyag Niya nga akon alagaran para sa Iya.
Sa pagligad sang mga tinuig, inang sulit-sulit nga inagihan nagbaylo sang pag-asa paagi sa mga balatyagon sang gugma sa isigkatawo kag nagdala sing pasalig nga ang kaluoy nabuksan para sa akon paagi sa Pagpasag-uli kag Pagkabanhaw sang Manluluwas.
Nagasaksi ako nga si Jesus amo ang nabanhaw nga Cristo, ang aton Manluluwas, kag ang aton perpekto nga ehemplo kag giya padulong sa kabuhi nga wala’y katapusan.
© 2013 iya sang Intellectual Reserve, Inc. Tanan nga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/12. Petsa sang pagtugot sa paglubad: 6/12. Paglubad sang First Presidency Message, April 2013. Hiligaynon. 10664 861
Pagtudlo gikan sa Sining Mensahe
Kinahanglan naton nga “idapat ang tanan nga balaan nga mga kasulatan sa aton, agud nga mangin para ini sa aton kapuslanan kag tinun-an” (1 Nefi 19:23). Binagbinaga ang pagbasa sang pang-sakramento nga mga pangamuyo nga makita sa Doctrine and Covenants 20:76–79. Pagkatapos nga mabasa ang mga pinanudlo ni Pangulong Eyring parte sa pang-sakramento nga mga pangamuyo, mahimo mo agdahon ang imo mga ginatudloan nga magpamensar sing mga paagi nga ining mga pangamuyo sarang maggiya sang ila mga kabuhi kag magbulig sa ila sa pagbalik agud magkabuhi liwat upod sa Amay nga Langitnon kag kay Jesucristo.