Mensahe sa Visiting Teaching, Abril 2013

Mga Kasugtanan sa Templo

Tun-i ining materyal sing mainampuon kag, kon nagakabagay, hambali ini upod sang mga sisters nga inyo ginabisita. Gamita ang mga pamangkot agud buligan kamo sa pagpabakod sang inyo mga sisters kag himuon ang Relief Society nga aktibo nga bahin sang inyo mismo kabuhi. Para sa dugang nga impormasyon, mag-log on sa reliefsociety.lds.org.

Litrato

Selyo sang Relief Society

Pagtuo, Pamilya, Bulig

“Ang nagaluwas nga mga ordinansa nga ginabaton sa templo nga nagatugot sa aton sa pila ka adlaw nga makabalik sa aton Amay nga Langitnon sa isa ka wala’y katapusan nga kaangtanan sang pamilya kag madulotan sang mga bugay kag gahum gikan sa kahitaasan nagahatag kapuslanan sa tagsa ka pagsakripisyo kag tagsa ka pagtinguha,”¹ siling ni Pangulong Thomas S. Monson. Kon wala pa kamo makakadto sa templo, sarang kamo maghanda sa pagbaton sang sagrado nga mga ordinansa sa templo paagi sa:

Pagtuo sa Amay nga Langitnon, kay Jesucristo, kag sa Balaan nga Espiritu.
Pagpasanyog sang panaksihon sang Pagpasag-uli ni Jesucristo kag sang ginpanumbalik nga ebanghelyo.
Pagtib-ong kag pagsunod sa buhi nga propeta.
Pagpanghanda para sa isa ka temple recommend paagi sa pagbayad sang ika-pulo [tithing], pagkamatinlo sing moralidad, pagkatampad, pagsunod sang Word of Wisdom, kag pagkabuhi nga nagaugyon sa mga pinanudlo sang Simbahan.
Paghatag sang panahon, talento, kag ikasarang sa pagbulig pasad sang ginharian sang Ginuo.
Pagpartisipar sa mga buluhaton sa family history.²

Si Pangulong Monson nagtudlo pa gid nga, “Kon ginadumdom naton ang mga kasugtanan nga aton ginhimo sa sulod [sang templo], mangin mas makasarang kita sa pagbatas sang tagsa ka pagtilaw kag sa paglampuwas sang tagsa ka pagsulay.”³

Gikan sa Balaan nga mga Kasulatan

Doctrine and Covenants 14:7; 25:13; 109:22

Gikan sa Aton Kasaysayan

“Masobra sa 5,000 ka mga Santos ang nagdagsa sa templo sang Nauvoo pagkatapos sang iya sini pagpahanungod ukon dedication. …

“Ang kusog, gahum, kag mga bugay sang mga kasugtanan sa templo [nagpabakod] sa mga Santos sa Ulihing mga Adlaw sa ila pagpanglakaton pakadto [nakatundan], sang sila [nag-antos] sang tugnaw, init, gutom, kapigaduhon, balatian, mga aksidente, kag kamatayon.”⁴

Pareho sang madamo nga mga sisters sa Relief Society, si Sarah Rich nag-alagad bilang isa ka temple worker. Nagsaysay sia parte sa iya inagihan: “Kon indi tungod sang pagtuo kag ihibalo nga ginhatag sa amon sa sinang templo paagi sa … Espiritu sang Ginuo, ang amon pagpanglakaton mangin pareho kontani sa paglumpat sa dulom. … Apang may pagtuo kami sa amon Amay nga Langitnon, … nagabatyag nga Iya kami pinili nga mga katawhan … , kag imbis sing kasubo, nabatyagan namon ang magkalipay tungod ang adlaw sang amon kaluwasan nag-abot na.”⁵

Ang pagpanglakaton indi isa ka “paglumpat sa dulom” para sa matinuohon nga mga babayi nga Santos sa Ulihing mga Adlaw. Ginpabakod sila sang ila mga kasugtanan sa templo.

© 2013 iya sang Intellectual Reserve, Inc. Tanan nga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/12. Petsa sang pagtugot sa paglubad: 6/12. Paglubad sang Visiting Teaching Message, April 2013. Hiligaynon. 10664 861

Ano ang Sarang Ko Mahimo?

Pirme bala ako nagakadto sa templo?
Ginapaisog ko bala ang akon mga sisters sa pagbaton sang mga bugay sang templo?