Mensahe ti Umuna a Panguluen, Abril 2013
Nagungaren!
Ti pammaneknek maipapan iti kinapudno ti Panagungar ni Jesucristo ket pagtaudan ti agpada a namnama ken determinasion. Ket ti Panagungar ni Jesucristo ket mabalin a pagtaudan ti namnama ken determinasion para iti asino man nga anak ti Dios. Para kaniak manipud pay idi pimmusay ni nanangko kadaydi nga aldaw ti kalgaw iti Hunio 1969, ti Panagungar ni Jesucristo ti pagtaudanen ti namnamak ken determinasionko agingga ita, ken agingga a makitakto manen isuna.
Ti kinaladingit manipud iti di agpaut a panagsina ket dagus a nasukatan iti kinaragsak. Nangnangruna pay daytoy ngem iti maysa a namnama para iti naragsak a panagtitipon. Gapu ta nakaad-adun ti impalgak ti Apo babaen dagiti propetana ken gapu ta impatalged kaniak ti Espiritu Santo ti kinapudno ti Panagungar, makitak iti panunotko no anianto ti kayarigan ti pannakitipontayo manen kadagiti napasanto ken nagungar nga ipatpategtayo:
“Dagitoy dagiti rummuarto iti panagungar dagiti nalinteg. …
“Dagitoy dagiti naisurat ti nagnaganda iti langit, a ti Dios ken ni Cristo ti ukom ti amin.
“Dagitoy dagiti nalinteg a tao a nagbalin a naan-anay babaen ni Jesus a mangibabaet ti baro a katulagan, a nagipatungpal daytoy naan-anay a pannubbot babaen ti panagsayasay ti bukodna a dara” (DkK 76:65, 68–69).
Gapu ta pinarmek ni Jesucristo ti pannakatay, amin nga annak ti Nailangitan nga Ama a mayanak iti lubong ket agungarto iti bagi a dinton pulos matay. Ngarud ti pammaneknekko ken ti pammaneknekyo maipapan iti dayta nagloriaan a kinapudno ket mangikkatto iti saem ti pannakapukaw ti maysa nga ipatpateg a miembro ti pamilia wenno gayyem ket masukatan daytoy iti naragsak a panangnamnama ken natibker a determinasion.
Inikkannatayo amin ti Apo iti sagut ti panagungar, a pakaipanan dagiti espiritutayo kadagiti bagi nga awanan kadagiti pagkurangan iti bagi (kitaen iti Alma 11:42–44). Kasla ubing ken naragsakto ni nanangko, maikkat dagiti epekto ti panagbaket ken dagiti adu a tawen ti panagsagaba ti bagi. Dumtengto dayta a sagut ti panagungar kenkuana ken kadakami kas maysa a sagut.
Ngem dakami nga agtarigagay a makidennanto kenkuana iti agnanayon ket nasken nga agaramidkami kadagiti pili tapno maikari iti dayta a pannakitipon, tapno makipagnaedkami iti Ama ken ti Ay-ayatenna a nagungar nga Anakna iti gloria. Dayta laeng ti lugar a mabalin a pakaituloyan ti panagbiag ti pamilia iti agnanayon. Ti pammaneknekko maipapan iti dayta a kinapudno ket nangnayon iti determinasionko a mangpaikari iti bagik ken dagiti patpatgek iti kangatuan a tukad ti celestial a pagarian babaen ti Pannubbot ni Jesucristo a tumartarabay iti biagtayo (kitaen iti DkK 76:70).
Ikkannatayo ti Apo iti maysa a pangiwanwan iti daytoy a panagsapsapul iti agnanayon a biag kadagiti kararag ti sakramento a mangtulong kaniak ken makatulong kadakayo. Maawistayo a mangpabaro kadagiti katulagantayo iti panagbuniag iti tunggal miting ti sakramento.
Ikaritayo a kanayon a manglaglagip iti Mangisalakan. Dagiti tanda ti sakripisiona ket mangtulong kadatayo a mangbigbig iti kalaus ti saem a sinagabana a mangparmek iti ipapatay, tapno maipaayantayo iti asi, ken tapno mangted iti pannakapakawan iti amin a basbasoltayo no pilientayo ti agbabawi.
Ikaritayo ti agtungpal kadagiti bilinna. Ti panagbasa kadagiti nasantuan a kasuratan ken dagiti balikas dagiti sibibiag a propeta ken panagdengngeg kadagiti naparegta nga agsarita kadagiti mitingtayo iti sakramento ket mangipalpalagip kadatayo kadagiti katulagantayo a mangaramid iti dayta. Ti Espiritu Santo ti mangipalagip ken mangiparikna kadatayo kadagiti bilin a nasken unay a tungpalentayo iti dayta nga aldaw.
Kadagiti kararag ti sakramento, ikari ti Dios nga ibaonna ti Espiritu Santo a mangkadkadua kadatayo (kitaen iti Moroni 4:3; 5:2; DkK 20:77, 79). Natakuatak iti dayta a kanito a maikkannak ti Dios iti kasla maysa a personal a pannakiuman. Impalagipna kaniak no ania ti naaramidko a nangparagsak Kenkuana, ti kasapulak a panagbabawi ken pannakapakawan, ken ti nagnagan ken ruprupa dagiti tao a kayatna a pagserbiak para Kenkuana.
Kadagiti napalabas a tawen, dayta a naulit a padas ket namagbalin ti namnama kadagiti rikna ti panangngaasi ken nangisangbay iti pammatalged a ti asi ket naited kaniak babaen ti Pannubbot ken Panagungar ti Mangisalakan.
Paneknekak a ni Jesus ti nagungar a Cristo, ti Mangisalakantayo, ken ti naan-anay a pagwadan ken mangiwanwan kadatayo nga agturong iti agnanayon a biag.
© 2013 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/12. Pannakaanamongna a maipatarus: 6/12. Pannakaipatarus ti First Presidency Message, April 2013. Ilokano.10664 864
Panangisuro manipud iti Daytoy a Mensahe
Masapul nga “[aramatentayo] amin a nasantuan a kasuratan kadatayo, tapno agbalinda koma a pakairanudan ken pagadalantayo” (1 Nephi 19:23). Ibilang ti panangbasayo kadagiti kararag ti sakramento, a masarakan iti Doktrina ken Katulagan 20:76–79. Kalpasan ti panangbasayo kadagiti pannursuro ni Presidente Eyring maipapan kadagiti kararag ti sakramento, mabalin a kayatyo nga awisen dagiti sursuruanyo a mangpanunot kadagiti wagas a mabalin a pakaiwanwanan dagitoy a kararag iti biagda ken makatulong kadakuada nga agsubli a makipagnaed manen iti Nailangitan nga Ama ken ni Jesucristo.