2013
Dagiti Katulagan iti Templo
April 2013

Mensahe iti Visiting Teaching, Abril 2013

Dagiti Katulagan iti Templo

Sikakararag nga adalenyo daytoy a material ken, no maitutop, ilawlawagyo daytoy kadagiti kakabsat a babbai a sarungkaranyo. Usarenyo dagiti saludsod a mangtulong kadakayo a mangpapigsa kadagiti kakabsatyo a babbai ken mangaramid iti Relief Society nga aktibo a paset iti bukodyo a biag. Para iti ad-adu pay nga impormasion, mapan iti reliefsociety.lds.org.

Ladawan
Selio ti Relief Society

Pammati • Pamilia • Tulong

“Dagiti pangisalakan nga ordinansa a naawat iti templo a pakapalubosantayo a makasubli iti Nailangitan nga Amatayo iti maysa nga aldaw iti agnanayon a relasion ti pamilia ken ti maipaayantayo kadagiti bendision ken bileg manipud iti ngato ket kapateg iti tunggal sakripisio ken tunggal aramid a panagkagumaan,”1kinuna ni Presidente Thomas S. Monson. No saankayo pay a napan iti templo, makapagsaganakayo nga umawat kadagiti sagrado nga ordinansa iti templo babaen ti:

  • Panamati iti Nailangitan nga Ama, ken ni Jesucristo, ken iti Espiritu Santo.

  • Panangpatibker iti pammaneknek maipapan ti Pannubbot ni Jesucristo ken ti naisubli nga ebangheliona.

  • Panangkanunong ken panangsurot iti sibibiag a propeta.

  • Panagbalin a maikari iti maysa a rekomenda iti templo babaen ti panagbayad iti apagkapullo, panagbalin a nadalus iti dayaw, panagbalin a napudno, panagtungpal iti Word of Wisdom, ken panagbiag a maitunos kadagiti pannursuro ti Simbaan.

  • Pannangted iti panawen, talento, ken kinabaknang tapno makatulong iti pagarian ti Apo.

  • Pannakiraman iti aramid iti family history.2

Innayon pay nga insuro ni Presidente Monson, “Bayat ti pananglagiptayo kadagiti katulagan nga aramidentayo iti uneg [ti templo], ad-adda a kabaelantayonto nga ibturan ti tunggal pannubok ken mangparmek iti tunggal pannulisog.”3

Manipud kadagiti Nasantuan a Kasuratan

Doktrina ken Katulagan 14:7; 25:13; 109:22

Manipud iti Pakasaritaantayo

“Nasurok a 5,000 a Santo ti nagseksekan iti Nauvoo Temple kalpasan ti pannakaidatonna. …

“Ti pigsa, bileg, ken dagiti bendision dagiti katulagan iti templo ti [nangtulong] kadagiti Santo iti Ud-udina nga Aldaw kabayatan ti panagdaliasatda nga [agpalaud], idi [sinagabada ti lamiis, pudot, bisin, kinakurapay, sakit, aksidente, ken ipapatay.”4

Kas iti adu a kakabsat a babbai iti Relief Society, nagserbi ni Sarah Rich kas maysa a temple worker. Insaritana maipapan iti padasna, “No saan koma a gapu iti pammati ken pannakaammo a naipaay kadakami iti dayta a templo babaen … ti Espiritu ti Apo, ti panagdaliasatmi ket kasla koma iti maysa a tao nga agtappuak iti kasipngetan. … Ngem adda pammatimi iti Nailangitan nga Amami, … nariknami a dakami dagiti napili a taona … , ken imbes nga agladingitkami, nagrag-okami gapu ta dimtengen ti aldaw a pannakaisalakanmi.”5

Ti ipapanaw ket saan nga “itatappuak iti kasipngetan” kadagiti napudno a babbai a Santo iti ud-udina nga aldaw. Natulongan ida dagiti katulaganda iti templo.

© 2013 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/12. Pannakaanamongna a maipatarus: 6/12. Pannakaipatarus tiVisiting Teaching Message, April 2013. Ilokano.10664 864

Dagiti Nagadawan

  1. Thomas S. Monson, “The Holy Temple—a Beacon to the World,” Liahona, Mayo 2011, 92.

  2. Kitaen iti Daughters in My Kingdom: The History and Work of Relief Society (2011), 21.

  3. Thomas S. Monson, Liahona, Mayo 2011, 93.

  4. Daughters in My Kingdom, 29–30.

  5. Sarah Rich, iti Daughters in My Kingdom, 30.

Ania ti Maaramidko?

  1. Agdaydayawak kadi a kanayon iti templo?

  2. Al-allukoyek kadi dagiti kakabsatko a babbai nga umawat kadagiti bendisionda iti templo?

Iprenta