Pweng sin Prestuhnsi Se Met, Eprel 2013
El Moulyak
Sie fahkwack luhlahlfongi luhn ma pwacye ke Sifil Moulyak luhn Jisus Kraist pa sie kahsruh ke kwewana finsrak ac kampare. Ac kuh in sikyak nuh sin kuhtwena tuhlihk nuhtin God. Sikyak nuh sihk ke sie lwen in summer ke Jun 1969 ke ninac kiyuck ah misac, sikyak ohinge ke yac na fohn sac me, ac e fah oacna nwe ke nga sifil liyaclwack.
Suhpwacr ke kihtin fahsrwelihk sac sana aholyucklac ke engan. Yohk likina sie finsrak nuh ke sifil fahsrweni engan se. Ke srihpen Leum el fahkwack yohk sin mwet pahluh Lal uh ac ke srihpen Nguhn Muhtahl ahkkweyelah ma pwacye ke Sifil Moulyak nuh sihk, nga kuh in liye ke nuhnak luhk uh ohiyacn sifil ohsun yurin mwet ahknwacsnwacsyeyucklac ac moulyak kuht luhngse uh:
Pa inge elos suc ac fah tuhkuh nuh met ke sifil moulyak luhn mwet wo uh. …
Pa inge elos suc ine uh sihmlac inkuhsrao, ma God ac Kraist pa mwet nuhnuhnkuh luhn mwet nuh kwewa.
Pa inge elos suc mwet wo oreklac suwohswohs sin Jisus mwet in ahkmihs luhn olweacng sasuc, suc orwaclah iwaclah fas se inge ke ahkkahkyelah srah Kacl sifacna (liye D&C 76:65, 68–69).
Ke srihpen Jisus Kraist el kuhnahoslah sucl in misac uh, tuhlihk nuh kwewa nuhtin Pahpah Lucng isuslac nuh facluh uh fah sifil moulyak ke sie mahno ma ac tiac sifil misac. Oruh fahkwack luhlahlfongi luhk ac lowos ke ma pwacye wolacna sacn kuh in eslah ahsor ke wacngihnlac luhn mwet ke sucu kuh kawuck uh ac ahollah ke rahrah in engan ac nuhnak kuh.
Leum el use nuh sesr nohfohn mwe sang ke sifil moulyak, ma nguhnasr fihliyucki ke mahno wacngihn mahno suhfas la (liye Alma 11:42–44). Ninac kiyuck an fah ngwetngwet arlac fuhsr ac kahto, atac ke matwac ac yac ke kweok in mahno uh itucklac. Ma ingacn fah tuhkuh nuh sel ac nuh sesr oacna sie mwe sang.
Tuhsruhk kuhtuh sesr suc kena in weluhl ma pahtpaht uh enenuh in orwaclah sulaclah in lwelah nuh ke wi sacn, in muhta ke acn ma Pahpah Lucng ac Wen Kuloh sifil moulyak Nahtuhl moul in wolacna we. Pa ingacn acn sefanna ma moul in sucu uh kuh in tuhtahflah nwe tok ma pahtpaht uh. Sie fahkwack luhlahlfongi ke ma pwacye sacn ahkyohkyaclihk nuhnak luhk in lwelah nga sifacna ac mwet nga luhngse uh nuh ke luhpah fuhlwact se ke tohkohsrahi luhn celestial ke Iwaclah luhn Jisus Kraist uh orekma ke moul lasr uh (liye D&C 76:70).
Leum el use nuh sesr sie mwe kol ke sukok se inge nuh ke moul ma pahtpaht ke pruhe in kuhfa luhn Leum ma kahsrweyuc ac kuh in kahsrwe kom uh. Suliyuck kuht in ahksasucye olweacng ke pacptais lasr ke miting ke kuhfa luhn Leum nuh kwewa.
Kuht olwelah in esam Mwet Lahngo lwen nuh kwewa. Akucl ke kihsackuhnlah Lal kahsrwe kuht in luhngse luhpah yohk ke ngal El kweokkihn in kuhtanglah misac, in use nuh sesr pahkomuhta, ac in sang nuhnak muhnahs ke ma koluk lasr nuh kwewa kuht fin sulaclah in auliyak.
Kuht olwelah in liyacacng masap Lal uh. Riti ma suhmuhslah uh ac kahs luhn mwet pahluh moul uh ac porongo mwet sramsram mokleyuck ke miting ke kuhfa luhn Leum ac ahkacsmakihnye kuht ke olweacng lasr in oruh oacna. Nguhn Muhtahl use nuh ke nuhnak lasr uh ac puhla masap ma kuht enenuh yohk emet in liyacacng ke lwen sac.
Ke pruhe ke kuhfa luhn Leum uh, God el olwelah in suhpwacma Nguhn Muhtahl in wi kuht (liye Moroni 4:3; 5:2; D&C 20:77, 79). Nga sokwack ke pacl sacn lah God el kuh in use nuh sihk ma puhlakihnyuck oacna sie lohlngohk la sifacna uh. El use nuh ke acsmaklac luhk ma nga orwaclah ma ahkinsewowoyacl uh, enenuh luhk nuh ke auliyak ac nuhnak muhnahs, ac ine ac muhtuhn mwet El ac use ngan kuhlwacnsapuh nuh Sel.
Yac ekahsr somlah ah, puhlakihn kalweniyuck se ingacn ekuhllah finsrak uh nuh ke puhla ke luhngse pwacye ac use sie ahkpwacye lah pahkotwen uh utuckuh nuh sihk ke Iwaclah luhn Mwet Lahngo ac Sifil Moulyak sac.
Nga fahkwack luhlahlfongi lah Jisus pa Kraist moulyak, Mwet Lahngo lasr, ac srihkasrak wowo lasr ac kol nuh ke moul ma pahtpaht.
© 2013 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/12. Ahkkweyeyucklac ke lweng: 6/12. Lwenglah luhn First Presidency Message, April 2013. Kosraean. 10664 868
Luti ke Pweng Se Inge
Kuht enenuh in kapsra ma suhmuhslah nuh kwewa nuh sesr, tuh in ma ac wo ac etwacack nuh sesr (liye 1 Nephi 19:23). Nuhnkuh in riti pruhe ke kuhfa luhn Leum an, sukokyak ke Doctrine and Covenants 20:76–79. Tukun riti luti lal Prestuhn Eyring ke pruhe ke kuhfa luhn Leum uh, kom ac luhngse in suli mwet kom luti an in nuhnkuh ke inkacnek ma pruhe inge kuh in kol moul lalos ac kahsrwelos in fohlohk in sifil wi Pahpah Lucng ac Jisus Kraist muhta.