Klumech er a First Presidency, Ongeua el Buil 2013
Ngii a Mla Mekiis
A olchotel a klaumerang el kirel a Okiis er a Kodall er a Jesus Kristo a uchul e moktek er a urunguled me a blakelreng er kid. E sebechel uaisei el mo er a ngii dil ngelekel a Dios. Ng dilubech el mei er ngak er se er a Ongelolem el buil er a 1969 er a lemad a delak, el kmal meketeketa el rak, e melemolem el meketekek el rak ruchei er a kluut el mo mesang.
A klengitelreng er a kedeb el klechacheroid er kemam a mle mereched lobult el mo deureng. Ng lmuut el ngaruchei er sel urunguled el mo dmak. Le Rubak el mla ocholt a kmal betok lokiu a reprofet er Ngii me a dirrek el Chedaol Reng el mla oterkeklii a klemerang el kirel Okiis er a Kodall el mei er ngak, e ak ko er a di omes er ngii er a uldesuek sel deluut el mo dmak lobengterir a recheledaol el mla mekiis er a kodall el betik er a rengud.
Tirkaikid tirke el mekiis er sel kot el okiis er a kodall er a remelemalt. …
Tirkaikid tirke el ngklir a llechukl er a babeluades, el Dios me a Kristo a merritel a rokui.
Tirkaikid tirkel melemalt el chad el mla mo cherrungel lokiu a Jesus el ngii a mesebechakl er a beches el telbiil el kildmeklii a cherrungel el tngakireng er ngii lokiu a rsechel mlechoit (mesaD&C 76:65, 68–69).
Le Jesus Kristo el ngilbetii a rengedel a kodall, ea rokui el ngelekel a Chedam er a Babeluades el mechell el mei er tia el beluulechad a mo mekiis er a kodall e nguu a bedengir e diak el luut el mad. Me a olchotel a klaumera er ngak me a dirrek el kemiu el kirel tia el meang el klemerang a sebechel choridii a ringel er a kodall er a betik er a rengud el chedal a telungalek malechub a sechelei e mtechir loba mui el deureng el mengiil loba mesisiich el blakelreng.
A Rubak a mla meskid el rokui a sengk er a okiis er a kodall, el delbenged a mo seluk er a chelsel a bedenged el diak a chelitechetul me a mekngit er ngii (mesa Alma 11:42–44). A delak a mo chemolt el ngeasek e dmiich, a bedengel er a cheleuodel me a ringel er a klechad a mo diak. Tia mo er ngii e dirrek el mei er kid el uaia le sengk.
Eng di tirke el lolsingch el mo obengkel el mo er a ulebongel a kirir el mo ungil melilt meng mo sebecheir el mo teloi er ngii, el mo kiei er sel renged le ngarngii a Chedam me a Betik er a Renguul el mla mekiis er a kodall el Ngelekel. Tiaikid a di chimo el basio el klengar er a telungalek a melemolem el mo er a ulebongel. A sioning er ngak el kirel tia el klaumerang a mla choisisii a blakelreng er ngak el mo sebechek ngak me tirke el betik er a renguk el mo nguu sel kot el ngarbab el dauch er a rengedel a celestial lokiu a Tngakireng er a Jesus Kristo el oureor er a chelsel a klengar kemam (mesa D&C 76:70).
A Rubak a meskid a ulekrael el kirel tia el skel a diak a ulebengelel klengar el ngara chelsel a nglunguuch er a sakrament el mo ngosukak e dirrek el sebechel ngosukemiu. Kid a mla mongit el mo omekbeches a telbiieled er a taem er a techolbechelid er a chelsel a bek el mitelengel a sakrament.
Kede tibir el mo blechoel melbedebek er a Osobel. A olchotel a ongarm er Ngii a ngosukid el mo mui er a omereng el saul el kirel a chachisois el blals el Ngii a mla nguubet luchul a kedekedel a kodall, e meskid a chubechub, e meskid a klausubes el kirel a rokui el kngtid alsekum e kede melilt el mo ouchel a rengud.
Kede tibir el mo oltirakl a Llechul. Omengiuel chedaol llechukl me a tekingir a re ngar el profet me a oderngesel a ulekrael tekoi er a sakrament a mekletkid el kirel a telbiieled. A Chedaol Reng a mekletkii a uldesued me a rengud el kirel a llach el kmal kired loltirakl er sel sils.
Chelsel sel nglunguuch er a sacrament, ea Dios a tibir el mo odureklii a Chedaol Reng el me obengked (mesa Moroni 4:3; 5:2; D&C 20:77, 79). Ak mla metik el kmo ng chelsel tiaikid el taem e a Dios a sebechel meskak sel uaia le kuk di le cheldecheduch er a delongelam. Ngii a mekletkak el kirel aikel blak ruul el ungil er Ngii, me a klou el usbechellek er a ouchel reng me a klausubes, me a ngklir me a mederir a rechad el Ngii a soal a bo kusiou er tir el Kirel.
Chelsel aika el rak, e tiaikid el blelekl el teletael a mla mult a urungulek el mo dmolech el beltikelreng e meskak sel mesisiich el klemedengei el kmo a chubechub a mlengai a chesmerel kirek lokiu a Tngakireng me a Okiis er a Kodall er a Osobel.
A kuuchais el kmo a Jesus a mla mekiis el Kristo, el Osobeled, e cherrungel el okesiu el mei er kid e omekrael el kirel a diak a ulebengelel klengar.
© 2013 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/12. Kengei er a oidel: 6/12. Oidel a First Presidency Message, April 2013. Palauan. 10664 881
Osischeklel Tia el Klumech
Ng kired el “omekesiu a rokui el chedaol llechukl el mei er kid, me bo luchul a klungiaol el mei er kid me a omesubed” (1 Nephi 19:23). Momtab er sel nglunguuch er a sacrament, el debetik er ngii er a mesa Doctrine and Covenants 20:76–79. Uriur er a omonguiu er a osischeklel a President Eyring el kirel a nglunguuch er a sakrament, e ke locha mo melatk el siotai er tirka el molisechakl er tir el mo omdasu a teletael el ika el nglunguuch a sebechel omekrael a klengar tir e ngosuterir el muut el mo kiei lobengkel a Chedam er a Babeluades me a Jesus Kristo.