2013
Tej Kev Khi Lus hauv lub Tuam Tsev
April 2013

Cov Mus Saib Xyuas tom Tsev tsab Xov, Plaub Hlis Ntuj 2013

Tej Kev Khi Lus hauv lub Tuam Tsev

Ua tib zoo thov Vajtswv kawm tej yam no thiab, thaum tsim nyog ua, sib tham txog tej no nrog cov viv ncaus uas koj mus xyuas. Siv tej lus nug no pab koj txhawb koj cov viv ncaus lub zog thiab ua kom lub Koom Haum Niam Tsev muaj feem hauv koj lub neej. Kom tau ntaub ntawv xov xwm ntxiv, cia li txuas rau reliefsociety.lds.org.

Daim Duab
lub cim rau lub Koom Haum Niam Tsev

Kev Ntseeg, Tsev Neeg, Kev Pab

“Tej kab ke cawm neeg txoj sia uas yus txais hauv lub tuam tsev yuav cia peb ua ib tse neeg rov qab mus nrog peb Leej Txiv Saum Ntuj Ceeb Tsheej nyob ua ke thiab yuav txais tej koob hmoov thiab hwj chim uas los saum ntuj los thiab tsim nyog peb siv zog ua hauj lwm thiab txi txhua yam kom peb tau tej no,”1 Thawj Tswj Hwm Thomas S. Monson hais. Yog tias koj tseem tsis tau mus hauv lub tuam tsev, koj npaj tau txais tej kab ke dawb ceev hauv lub tuam tsev thaum koj:

  • Ntseeg rau ntawm Leej Txiv Saum Ntuj Ceeb Tsheej, Yexus Khetos, tus Vaj Ntsuj Plig Dawb Huv.

  • Nrhiav kom tau ib zaj lus tim khawv txog Yexus Khetos txoj Kev Theej Txhoj thiab txoj moo zoo uas muab txum tim rov qab los lawm.

  • Txhawb nqa thiab ua raws li tus yaj saub uas muaj sia nyob tam sim no.

  • Ua neej tsim nyog txais ib daim ntawv tso cai nkag tuam tsev thaum koj them nyiaj ib feem kaum, ua neeg dawb huv, ua neeg siab zoo, ceev Lo Lus Txawj Ntse, thiab ua neej raws li lub Koom Txoos tej lus qhia.

  • Muab sij hawm, txuj ci, thiab nyiaj txiag kom pab txhim tsa tus Tswv lub nceeg vaj.

  • Pab ua tej hauj lwm tshawb nrhiav peb tsev neeg zaj keeb kwm.2

Thawj Tswj Hwm Monson qhia ntxiv hais tias, “Thaum peb nco qab ntsoov tej lus uas peb khi tseg hauv [lub tuam tsev], peb haj yam yuav ntxeem mus kom dhau txhua txoj kev sim siab thiab txhua kev haub ntxias.”3

Los ntawm cov Vaj Lug Kub

Doctrine and Covenants 14:7; 25:13; 109:22

Los ntawm Peb zaj Keeb Kwm

“Ntau tshaj 5,000 Tsoom Haiv Neeg Ntseeg sib sau ua ke rau ntawm lub Tuam Tsev Nauvoo tom qab tau muab nws fij tseg rau Vajtswv. …

“Qhov dag zog, lub hwj chim, thiab tej koob hmoov ntawm tej kev khi lus hauv lub tuam tsev [txhawb nqa] Tsoom Haiv Neeg Ntseeg thaum lawv taug kev mus [rau sab hnub poob], thaum lawv [nyiaj] qhov no no, qhov sov sov, qhov kev tshaib plab, kev pluag, kev mob kev nkeeg, kev xwm txheej, thiab kev tuag.”4

Ib yam li coob tug viv ncaus hauv lub Koom Haum Niam Tsev, Sarah Rich ua hauj lwm hauv lub tuam tsev. Nws hais txog tej yam uas tau muaj los rau nws: “Yog tias tsis tau muaj kev ntseeg thiab kev txawj ntse uas peb tau txais hauv lub tuam tsev ntawd los ntawm … tus Tswv tus Ntsuj Plig, peb txoj kev taug kev yuav zoo nkaus li peb dhia mus hauv ib lub qhov tsaus ntuj nti. … Tiam sis peb muaj siab ntseeg rau ntawm peb Leej Txiv Saum Ntuj Ceeb Tsheej, … xav tias peb yog Nws cov neeg uas Nws xaiv tseg lawm … , thiab peb tsis muaj kev tu siab, peb xyiv fab vim yog peb hnub cawm seej tau los lawm.”5

Rau cov poj niam ntawm Tsoom Haiv Neeg Ntseeg mas qhov kev khiav dim tsis yog “dhia mus rau hauv qhov tsaus ntuj nti”. Lawv tej kev khi lus hauv lub tuam tsev txhawb nqa lawv.

© 2013 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub txhais ua lus As Kiv: 6/12. Pub txhais ua lus Hmoob: 6/12. Kev txhais Visiting Teaching Message, April 2013. Hmong. 10664 295

Lus Cim

  1. Thomas S. Monson, “The Holy Temple—a Beacon to the World,” Liahona, Tsib Hlis Ntuj 2011, 92.

  2. Saib Daughters in My Kingdom: The History and Work of Relief Society (2011), 21.

  3. Thomas S. Monson, Liahona, Tsib Hlis Ntuj 2011, 93.

  4. Daughters in My Kingdom, 29–30.

  5. Sarah Rich, hauv Daughters in My Kingdom, 30.

Kuv Yuav Pab Li Cas?

  1. Kuv puas mus pe hawm tom lub tuam tsev ntshawv ntshis?

  2. Kuv puas yaum kom kuv cov viv ncaus txais tej koob hmoov ntawm lub tuam tsev?

Luam