Inona no Antony Ilantsika ny Bokin’i Môrmôna

Mety hanontany anao ny olona sasantsasany hoe inona no antony ilantsika ny Bokin’i Môrmôna nefa efa ananantsika ny Baiboly. Raha ny marina dia nijoro ho vavolombelona i Jesoa Kristy fa hitranga izany (jereo ny 2 Nefia 29:3). Misy antony maro mahatonga ny Bokin’i Môrmôna ho manan-danja amin’izao androntsika izao (jereo ohatra ny 2 Nefia 29:7–11). Ireto misy antony vitsivitsy fotsiny mahatonga azy io ho zava-dehibe.

Testamenta Iray Hafa momba an’i Jesoa Kristy

Asehon’ny soratra masina amintsika ny fomba iray fampiasana vavolombelona maro hanorenana fahamarinana ato amin’ny Fiangonanan’i Kristy. Ny Bokin’i Môrmôna dia manampy vavolombelona iray hafa ankoatra ny Baiboly amin’ny maha vavolombelon’i Kristy azy. Ny Loholona Mark E. Petersen (1900–84) avy ao amin’ny Kôlejin’ny Apôstôly Roambinifolo dia niteny indray mandeha hoe: “Ny antony voalohany ananantsika ny Bokin’i Môrmôna dia ny hoe amin’ny tenin’ny vavolombelona roa na telo no hanorenana mafy ny teny rehetra. (Jereo ny 2 Kor. 13:1.) Ananantsika ny Baiboly; ananantsika ihany koa ny Bokin’i Môrmôna. Mandrafitra rakitsoratra roa izy ireo—boky soratra masina roa—avy amin’ny vahoaka roa fahiny izay nifanalavitra be, izay samy mijoro ho vavolombelona ny amin’ny maha Andriamanitra an’i Jesoa Kristy Tompo.”¹ Ny Filoha Ezra Taft Benson (1899–1994) dia nanampy hoe: “Tsy tokony ho adinointsika fa ny Tompo mihitsy no nanolotra ny Bokin’i Môrmôna ho vavolombelona lehibe indrindra momba Azy.”²

Ny Fahafenoan’ny Filazantsara

Fantatsika fa “zavatra tsotra sy sarobidy … [no] nesorina tanatin[‘ny]” Baiboly tao anatin’ny vanim-potoana iray (1 Nefia 13:40). Manazava ny fotopampianaran’i Kristy ny Bokin’i Môrmôna ary mamerina ny fahafenoan’ny filazantsara ho ety ambony tany indray (jereo ny 1 Nefia 13:38–41). Ny Bokin’i Môrmôna ohatra dia manampy antsika hahafantatra fa ny batisa dia tsy maintsy atao amin’ny alalan’ny fanitrihana (jereo ny 3 Nefia 11:26) ary ny zaza madinika dia tsy ilaina atao batisa (jereo ny Môrônia 8:4–26).

Ivon’ny Fiangonana naverina tamin’ny Laoniny

Nijoro ho vavolombelona i Joseph Smith fa ny Bokin’i Môrmôna no “vato ifaharan’ny fivavahantsika.”³ Noho ny fahafantarantsika izany dia toa tsy fifanojoan-javatra raha toa ka tamin’ny 6 Aprily 1830 no nanorenana ny Fiangonan’i Jesoa Kristy ho an’ny Olomasin’ny Andro Farany, 11 andro monja taorian’ny namoahana ny Bokin’i Môrmôna ho azon’ny tsirairay ho vidiana, tamin’ny 26 Marsa 1830. Tsy naorina ny Fiangonana raha tsy teo am-pelatanan’ireo mpikambana ho ao aminy ny vato ifaharany.

Fitahiana eo amin’ny Fiainantsika

Raha ny mikasika ny Bokin’i Môrmôna dia nampianatra i Joseph Smith hoe: “hanatona bebe kokoa an’Andriamanitra ny olona amin’ny fanarahana ny fepetra ao anatiny toy izay ny ao anatin’ny boky hafa.”⁴ Manana hery izy io hanova fiainana—an’isan’izany ny anao sy ny an’ireo izay izaranao ny Bokin’i Môrmôna. Nanamarina ny Filoha Henry B. Eyring, Mpanolotsaina Voalohany ao amin’ny Fiadidiana Voalohany, fa “Tena azo antoka fa misy fiantraikany eo amin’ny toetranao sy ny herinao ary ny herim-ponao ho vavolombelon’Andriamanitra ny Bokin’i Môrmôna. Hankahery sy hitarika ary hanome fahatokiana ho anareo ny fotopampianarana sy ireo ohatra feno herim-po ao amin’ io boky io. … Ny fandalinana amim-bavaka ny Bokin’ i Môrmôna dia hanorina finoana an’ Andriamanitra Ray, sy ny Zanaka Malalany ary ny Filazantsarany. Hanorina ny finoanareo an’ireo mpaminanin’ Andriamanitra fahiny sy ankehitriny izany. … Afaka mampanatona anareo akaikikaiky kokoa an’ Andriamanitra izany boky izany mihoatra noho ireo boky hafa. Afaka manova ny fiainana ho amin’ ny tsaratsara kokoa izany.”⁵

Vavolombelona Roa

“Ny Baiboly dia vavolombelona iray momba an’ i Jesoa Kristy ary ny Bokin’ i Môrmôna dia anankiray hafa koa. Nahoana no tena ilaina toy izany ilay vavolombelona faharoa? Mety hanampy ity ohatra manaraka ity: Firy ny isan’ ny tsipika mahitsy azonao atao miala avy amin’ ny teboka iray eo amin’ ny taratasy iray? Ny valiny dia isa tsy manam-petra. Eritrereto mandritra ny fotoana fohy hoe izany teboka iray monja izany dia maneho ny Baiboly ary ireo tsipika mahitsy an-jatony maro avy eo amin’ ilay teboka dia maneho ny fandikana samihafa ny Baiboly ary ireo dikanteny samihafa ireo dia samy maneho fiangonana iray hafa.

“Inona no mitranga anefa raha toa ka misy teboka faharoa eo amin’ izany taratasy izany izay maneho ny Bokin’ i Môrmôna? Firy ny isan’ ny tsipika mahitsy azonao faritana eo anelanelan’ ireo teboka ifantohana ireo: ny Baiboly sy ny Bokin’ i Môrmôna? Iray ihany. Dikanteny iray ihany momba ireo fotopampianaran’ i Kristy no afaka hisy noho ny fijoroana ho vavolombelon’ ireo vavolombelona roa ireo.

“Mbola mitana ny toerany hatrany hatrany ihany ny Bokin’i Môrmôna amin’ny maha vavolombelona mpanamarina sy mpanazava ary mpampiray azy mikasika ireo fotopampianarana ampianarina ao amin’ny Baiboly.”

Loholona Tad R. Callister ao amin’ny Fiadidian’ny Fitopololahy, “Ny Bokin’i Môrmôna—Boky iray avy amin’Andriamanitra” Liahona, Nôv. 2011, 75.

Mandraisa Anjara amin’ny Fifanakalozan-kevitra

Mandritra ny volana Aprily dia hianatra mikasika ny Apôstazia sy ny Famerenana amin’ny laoniny ianareo ao amin’ny kôlejin’ny fisoronana misy anao sy ao amin’ireo kilasin’ny Zatovovavy sy ny Sekoly Alahady (raha manana ireo lesona vaovao ny paroasy na sampana misy anao). Ny fahatongavan’ny Bokin’i Môrmôna dia ampahany manan-danja tamin’ny Famerenana tamin’ny laoniny. Rehefa avy mamaky ity lahatsoratra ity ianao dia diniho izay niova teo amin’ny fiainanao noho ny fanananao ny Bokin’i Môrmôna. Azonao raketina an-tsoratra ao amin’ny diarinao ny zavatra tsapanao ary diniho ny hizarana izany amin’ny hafa amin’ny alalan’ny fijoroana ho vavolombelona ao an-trano sy any am-piangonana na amin’ireny tambajotra fifaneraserana amin’ny Internet ireny.

Ireo Lesona Alahady

Ny Lohahevitra amin’ity Volana ity: Ny Apôstazia sy ny Famerenana amin’ny Laoniny