Visiting Tijing Mesej, Mei 2013
“Kam long Mi”
Tru long toktok mo eksampol blong Hem, Kraes i bin soem long yumi olsem wanem blong kam kolosap long Hem.
Mi glad blong stap wetem yufala long konfrens ia blong Jos blong Jisas Kraes blong Ol Lata-dei Sent. Hemia Jos blong Hem. Yumi tekem nem blong Hem long yumi taem yumi go insaed long kingdom blong Hem. Hem i God, we i Krieta, mo i stret gud evriwan. Yumi ol man blong wol ia we bae yumi fesem ded mo sin. Nomata long hemia, lav blong Hem long yumi mo ol famle blong yumi, Hem i stap invaetem yumi blong stap kolosap long Hem. Hemia ol toktok blong Hem, se yumi mas kam kolosap long Hem mo bambae Hem i kam kolosap long yumi; yumi mas lukaotem Hem wetem strong tingting mo bambae yumi faenem Hem; askem mo bambae yufala i kasem; noknok, mo bae i open long yufala.”1
Long Ista taem ia, yumi stap tingbaot from wanem yumi lavem Hem mo long promes we Hem i bin mekem long ol fetful disaepol blong Hem blong kam ol gudfala fren blong Hem. Sevya i mekem promes ia mo i talem long yumi olsem wanem, long seves blong yumi long Hem, bae Hem i kam long yumi. Wan eksampol i stap long wan revelesen we i go long Oliva Kaodri taem hem i bin wok blong Lod wetem Profet Josef Smit long translesen blong Buk blong Momon. Lod i bin toktok long Oliva from ol samting we hem i wantem mo talem se hem i nid blong holemtaet gud olgeta toktok blong Lod long hat blong hem. Hem i nid blong stap fetful mo wok strong blong stap obei long olgeta komanmen blong God, mo bae Lod i raonem hem wetem ol han blong lav blong Hem.2
Mi bin gat eksperiens long glad ia blong kam kolosap long Sevya mo we Hem i kam kolosap moa long mi tru long ol simpol aksen blong fasin blong stap obei long ol komanmen.
Yufala i bin gat eksperiens ia. Ating i kam taem yu jusum blong go long sakramen miting. Mi bin gat wan gudfala eksperiens long wan Sabat taem ia mi bin yang tumas. Long tetaem ia, mifala i tekem sakramen long wan naet miting. Memori ia, blong wan dei ia, we i moa long 65 yia i pas finis, taem mi bin kipim komanmen blong karem tugeta famle blong mi mo ol Sent, dei ia i mekem mi stap go kolosap moa long Sevya.
I bin tudak mo i kolkol aotsaed. Mi tingbaot se mi filim laet mo wom insaed long japel long naet ia wetem papa mo mama blong mi. Mifala i bin tekem sakramen, we olgeta we oli kasem Aronik Prishud oli pasem, mo mekem kavenan wetem Papa blong yumi long Heven se bae oltaem, bae mifala I tingbaot Pikinini blong Hem mo obei long ol komanmen blong Hem.
Long en blong miting, mifala i singsing hym ia, “Abide with Me; ’Tis Eventide,” (Stap wetem Mi long Tetaem ia) wetem ol toktok blong hym ia, “O Savior, stay this night with me” (O Sevya, stap long naet ia wetem mi.)3
Mi bin filim lav blong Sevya mo filim Hem kolosap long naet ia. Mo mi filim kamfot blong Tabu Spirit.
Mi wantem gat bakegen, wan moa taem, ol filing blong lav blong Sevya mo filim Hem kolosap long taem blong sakramen miting ia long yangfala taem blong mi. I no longtaem nating mi bin kipim wan nara komanmen. Mi bin luklukgud insaed long ol skripja. Insaed long olgeta, mi bin save se mi save gobak bakegen blong gat Tabu Spirit i letem mi filim wanem tufala disaepol blong Lod we i bin girap bakegen long ded i bin filim taem Hem i bin akseptem invitesen blong olgeta blong kam long haos blong olgeta mo stap wetem olgeta.
Mi ridim abaot nambatri dei afta we oli hangem Hem long kros mo oli berem Hem. Ol fetful woman mo ol narafala man oli bin faenem se oli rolemaot ston i kamaot long hol blong ston, mo bodi blong Hem i no bin stap. Oli bin kam wetem lav we oli gat long Hem, blong anoentem bodi blong Hem.
Tu enjel i stanap long saed mo askem from wanem oli fraet, mo talem:
“?From wanem yufala i stap lukaot man we i laef long ples blong ol ded man?
“Hem i no stap long ples ya. Hem i laef bakegen. Yufala i mas tingbaot tok ya we hem i talem long yufala, taem hem i stap long Galili yet.
Hem i talem se: ‘Mi mi Pikinini blong Man, bambae olgeta oli putum mi long han blong ol man nogud, mo bambae ol man nogud ya oli nilim mi long kros blong kilim mi mi ded. Be long namba tri dei, bambae mi mi laef bakegen.’”4
Long Gospel blong Mak, hem i ademap wea ples blong go, we wan long ol enjel i talem: “Yufala i go, yufala i talemaot long ol man blong hem, mo long Pita se: ‘Hem i stap go fastaem long yufala, long Galili. Bambae yufala i save luk hem long ples ya, olsem we hem i talem long yufala finis.’”5
Ol Aposol mo ol disaepol oli kam tugeta finis long Jerusalem. Semmak long yumi, oli bin fraet mo tingting bigwan, taem oli stap tokbaot nius blong ded mo laef bakegen long ded blong Hem mo wanem i minim long olgeta.
Tu long ol disaepol ia i wokbaot long naet ia long Jerusalem folem rod i go long Emeas. Kraes we i laef bakegen long ded i kamaot taem san i stap go daon mo wokbaot wetem olgeta long rod. Lod i kam finis long olgeta.
Buk blong Luk i letem yumi wokbaot wetem olgeta:
“Nao taem tufala i stap storian olsem, Jisas i kam klosap long tufala, nao i stap wokbaot i go wetem tufala.
“Be i gat samting i blokem tingting blong tufala, we i mekem se tufala i no save luksave se Jisas.
“Nao Jisas i askem long tufala se: ‘Tufala. ?Wanem samting ya we yutufala i stap storian long hem i kam?’
“Nao wan long tufala we, nem blong hem Kleopas, hem i talem long hem se, ‘Ating yu nomo yu wan strenja long Jerusalem, we yu no save ol samting ya we i hapen long ol dei ya we i jes pas.’”6
Tufala i talem long Hem, harem nogud blong tufala se Jisas i ded finis, taem oli bin trastem se Hem nao bae i Ridima blong Israel.
I mas gat filing blong lav i stap long voes blong Lod we i laef bakegen, taem Hem i stap toktok long tufala disaepol ia we i harem nogud tumas mo stap krae:
“Nao Jisas i talem long tufala se, ‘Man. Yutufala i no gat hed nating. Yutufala i tektaem tumas blong bilif long ol tok blong ol profet.
“‘I stret nomo blong Mesaea i harem nogud long bodi blong hem blong biaen bambae hem i save go tekem hae nem blong hem long heven.’
Nao Jisas i stat long buk blong Moses, mo i gotru long ol tok blong ol profet, i talemaotgud long tufala, olgeta tok blong Baebol we oli bin raetem blong tokbaot hem.”7
Afta, i kam long pat ia nao we i bin mekem hat blong mi i harem gud stat long taem we mi bin wan smol boe:
“Nao trifala i kam klosap long vilej ya we tufala i stap go long hem. Mo Jisas i mekem olsem we bambae hem i lego tufala, i wokbaot i go.
“Be tufala i talem long hem se ‘Ei, i gud yu stap wetem mitufala fastaem. Naoia i let finis ya. Bae i no longtaem san i godaon’ Nao hem i go insaed, i stap wetem tufala.”8
Sevya i bin akseptem, long naet ia, invitesen blong go insaed long haos blong ol disaepol blong Hem kolosap long vilej blong Emeas.
Hem i sidaon blong kakae wetem tufala, nao i tekem bred, i talem tangkiu long God from, mo i brekem, i givim long tufala. Nao ae blong tufala i open, mo tufala i luksave Hem, se Jisas. Be hem i lus long fes blong tufala, tufala i nomo luk hem. Luk i raetem blong yumi ridim, ol filing blong ol disaepol ia we oli kasem blesing: “Nao tufala i stap taltalem long tufala se, ‘Man. Taem hem i stap toktok long yumitufala long rod, i stap talemaot ol tok ya blong Baebol, tok blong Hem i nambawan, i mekem yumi harem gud tumas.”9
Long sem taem, tufala disaepol i gobak kwiktaem long Jerusalem blong talem long ol leven Aposol wanem i bin hapen long tufala. Long taem ia, Sevya i bin kamaot bakegen long olgeta.
Hem i talem bakegen ol profesi blong misin blong Hem blong Hem i pemaot ol sin blong evri pikinini blong Papa blong Hem, mo blong brekem ol rop blong ded.
Mo hem i talem long olgeta se: “Tok we i stap long Baebol i talem se bambae ol man oli mekem Mesaea i harem nogud long bodi blong hem, gogo i ded. Mo long nambatri dei blong hem, bambae hem i laef bakegen.
“Mo long nem blong Mesaea ya, se man i mas tanem tingting blong hem from sin blong hem, nao bambae God i fogivim hem. Tok ya i mas go long olgeta man, i stat long Jerusalem ya, gogo i finisim wol.
“Yufala i luk ol samting ya, mo yufala i save talemaot stret tok blong hem.”10
Ol toktok blong Sevya oli tru tu long yumi, semmak olsem we oli bin tru long ol disaepol blong Hem bifo. Yumi ol witnes blong ol samting ia. Mo bigfala wok we yumi bin akseptem taem yumi bin baptaes long Jos blong Jisas Kraes blong Ol Lata-dei Sent, i bin kamaot klia long yumi tru long profet Alma, plante handred yia i pas long ol wota blong Momon:
“Mo i bin hapen se hem i bin talem long olgeta: Luk, hemia ol wota blong Momon (from olsem ia nao oli bin singaotem ples ia) mo nao, from yufala i wantem blong kam long yad blong God, mo se oli singaotem yufala ol pipol blong hem, mo yufala i glad blong karem ol hevi samting blong wan wan long yufala, blong mekem se oli nomo hevi;
“Yes, mo yufala i glad blong krae wetem olgeta we oli krae, yes, mo leftemap tingting blong olgeta we oli nidim fasin blong leftemap tingting, mo blong stanap olsem ol witnes blong God evri taem mo long evri samting, mo long evri ples we yufala i save stap long hem, go kasem ded, mekem se God i save pemaot yufala, mo bae oli kaontem yufala wetem olgeta ia blong fasfala laef bakegen, mekem se yufala i save kasem laef we i no save finis—
“Nao mi talem long yufala, sapos hemia i tingting we ol hat blong yufala i wantem, wanem nao yufala i gat we i go agensem yufala blong kasem baptaes long nem blong Lod, olsem wan witnes long fored blong hem se yufala i bin mekem wan kavenan wetem hem, se bae yufala i wok blong hem mo holem ol komanmen blong hem blong mekem se hem i save poremaot Spirit blong hem moa fulap long yufala?
“Mo nao taem we ol pipol i bin harem ol toktok ia, oli bin klapem han blong olgeta from glad, mo oli bin singaot: Hemia tingting we ol hat blong mifala i wantem.”11
Yumi stap long tufala kavenan ia, blong leftemap olgeta we oli stap long nid, mo blong stap ol witnes blong Sevya long ful laef blong yumi.
Bae yumi save mekem hemia nomo mo no mestem, taem nomo yumi gat lav long Sevya mo filim lav blong Hem long yumi. Taem yumi stap fetful long ol promes we yumi bin mekem, bae yumi filim se lav we yumi gat long Hem i kam antap from se bae yumi filim paoa blong Hem mo Hem i kam kolosap long yumi long seves blong Hem.
Presiden Tomas S. Monson i talem plante taem long yumi long promes blong Lod long ol fetful disaepol blong Hem se long weaples we eniwan i akseptem ol wokman blong Hem, ples ia bae Hem i stap long hem tu, from we bambae Hem i go long fored blong olgeta. Bambae Hem i stap long raet han blong olgeta, mo long lef blong olgeta, mo Spirit blong Hem bambae i stap insaed long hat blong olgeta, mo ol enjel blong Hem oli stap raonem olgeta, blong sapotem olgeta.12
I gat wan nara wei we yu mo mi i bin filim se Hem i kam kolosap long yumi. Taem yumi givim ful tingting long seves i go long Hem, nao Hem i kam kolosap long olgeta we yumi lavem long famle blong yumi. Evri taem oli bin singaotem mi long seves blong Lod blong muv o blong livim famle blong mi, mi kam blong luk se Lod i stap blesem waef blong mi mo ol pikinini blong mi. Hem i mekem rere ol gudfala wokman blong Hem mo ol janis blong mekem famle blong mi i kam kolosap moa long Hem.
Yufala i bin filim semfala blesing long ol laef blong yufala. Plante long yufala i gat olgeta we yufala i lavem we oli stap wokbaot aotsaed long rod blong laef we i no save finis. Yufala i askem yufala wanem moa bae yufala i mekem blong tekem olgeta i kambak. Yufala i save dipen long Lod blong kam kolosap long olgeta taem yufala i givim seves wetem fet.
Yufala i tingbaot promes blong Lod i go long Josef Smit mo Sidni Rigdon taem tufala i aot long famle blong tufala blong mekem wok blong Hem. Lod i talem long Sidni mo Josef, se ol famle blong tufala oli stap gud; oli stap long han blong Hem, mo bae Hem i lukluk long olgeta olsem we i stret long Hem; from we Hem i gat evri paoa.13
Olsem Alma mo King Mosaea, sam fetful papa mo mama, oli bin givim gud seves long Lod blong longtaem, yet, oli gat ol pikinini oli stap aotsaed long rod nomata sakrifaes blong papa mo mama from Lod. Oli bin mekem evri samting we oli save, be i no gat jenis, iven wetem help blong ol fren we oli gat lav mo stap fetful.
Alma mo ol Sent long taem blong ol, oli bin prea from boe blong hem, mo ol boe blong King Mosaea.Wan enjel i kam. Ol prea blong yufala mo ol prea blong olgeta we oli stap yusum fet blong olgeta, bae i sendem ol wokman blong Lod i go helpem ol memba blong famle blong yu. Bae oli helpem olgeta blong jusum wei we i gobak hom long God, nomata we Setan mo ol man blong hem i atakem olgeta, we tingting blong olgeta i blong prapa spolem ol famle long laef ia mo long taem we i no save finis.
Yufala i tingbaot ol toktok we enjel i talem long Yangfala Alma mo ol boe blong Mosaea long taem we oli agens: “Mo bakegen, enjel i bin talem: Luk, Lod i bin harem ol prea blong ol pipol blong hem, mo tu ol prea blong wokman blong hem, Alma, we i papa blong yu; from hem i bin prea wetem fulap fet long saed blong yu blong mekem se oli save tekem yu i kam long save blong trutok; taswe, from stamba tingting ia, mi mi bin kam blong winim tingting blong yu blong mekem se yu save paoa mo raet blong God, blong ol prea blong ol wokman blong hem i save gat ansa folem fet blong olgeta.”14
Promes blong mi long yufala we i stap prea mo givim seves long Lod i no blong yufala i gat evri blesing we yufala i wantem blong yufalawan mo famle blong yufala. Be mi save promesem se Sevya bae i kam kolosap long yufala mo blesem yufala mo famle blong yufala wetem wanem we i moa gud. Bae yufala i gat kamfot long lav blong Hem mo filim ansa blong Hem i kam kolosap long yufala taem yufala i stap openem han blong yufala blong givim seves long ol narawan. Taem yufala i stap mekem gud ol soa blong olgeta long nid mo givim rod blong kam klin tru long Atonmen blong Sevya, nao bae Lod i sapotem yufala. Ol han blong Hem bae oli open bigwan wetem hemia blong yufala blong helpem mo blesem ol pikinini blong Papa blong yumi long Heven, wetem olgeta we oli stap long famle blong yufala.
I gat wan bigfala homkaming we oli rere i stap blong yumi. Nao, bae yumi luk promes blong Lod we yumi lavem i hapen. Hem, we i welkamem yumi long laef we i no save finis wetem Hem mo Papa blong yumi long Heven. Jisas Kraes i tokbaot hemia olsem blong
luklukgud blong mekem Saeon i kamtru mo stanemap Saeon blong Hem. Stap obei long ol komanmen blong Hem long evri samting.
Mo, sapos yumi stap obei long ol komanmen blong Hem mo stap strong kasem en, bambae yumi gat laef we i no save finis, we presen ia, i presen blong God we i moa bigwan long evri narafala presen blong Hem.15
From olgeta we oli laef bae oli kasem wol ia, mo olgeta we oli ded bae oli spel long evri wok blong olgeta, mo ol wok blong olgeta bae oli folem olgeta; mo bae oli kasem wan hat blong king long haos blong Papa blong mi, we Jisas Kraes i bin mekem i rere blong olgeta.16
Mi testifae se yumi save, tru long Spirit, folem invitesen blong Papa long Heven se Hem ia, hem i pikinini blong Hem we Hem i lavem tumas mo blong yumi lisin gud long Hem.17
Tru long ol toktok mo eksampol blong Hem, Kraes i bin soem yumi olsem wanem blong kam kolosap long Hem. Evri pikinini blong Papa long Heven we i jusum blong gotru long get blong baptaes blong kam insaed long Jos blong Hem bae i gat janis blong oli tijim hem long gospel blong Hem mo blong harem, long ol wokman we Hem i singaotem, invitesen ia blong “Kam long mi.”18
Evri kavenan wokman blong Hem insaed long kingdom blong Hem long wol ia, mo long spirit wol bae i kasem help tru long Spirit, taem oli blesem mo givim seves long ol narawan long bihaf blong Hem. Afta, bae oli filim lav blong Hem mo faenem glad blong kam kolosap long Hem.
Mi mi wan witnes blong Laef Bakegen long Ded blong Lod, semmak olsem se mi bin stap long naet ia wetem tufala disaepol long haos ia long Emeas rod. Mi save se, olsem we i tru se Hem i laef, semmak mi save se i tru se Josef Smit i bin luk Papa mo Pikinini long laet blong gudfala moning ia long bus blong ol tri long Palmaera.
Hemia i tru Jos blong Jisas Kraes. Ol prishud ki we Presiden Tomas S. Monson i holem, i paoa blong yumi blong sil long famle blong laef blong oltaem wetem Papa blong yumi long Heven mo Lod Jisas Kraes. Bae yumi stanap, long dei blong jajmen, long fored blong Sevya, we yumi fefesem yumi. Bae i wan taem blong glad long olgeta we oli kam klosap long Hem long seves blong Hem long laef ia blong harem ol toktok ia: “Yu wan gudfala man we yu lukaot gud long ol wok blong mi.”19 Mi testifae olsem, olsem wan witnes blong Sevya we i bin girap mo Ridima blong yumi, long nem blong Jisas Kraes. amen
© 2013 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/12. Oli letem translesen: 6/12. Translesen blong Visiting Teaching Message, May 2013. Bislama. 10665 852