Fas Presidensi Mesej, Mei 2013
Fasin blong Stap Obei I Tekem Ol Blesing Oli Kam
Wan save long trutok, mo ol ansa long ol bigfala kwestin blong yumi oli kam long yumi taem yumi stap obei long ol komanmen blong God.
Ol brata mo sista blong mi we mi lavem tumas. Mi mi glad tumas blong stap wetem yufala long moning ia. Mi nidim fet mo ol prea blong yufala taem mi stap tekem janis ia blong toktok long yufala.
Truaot ol taem, ol man mo ol woman oli bin lukaotem blong kasem save mo andastaning long saed blong laef long wol ia, mo ples mo stamba tingting blong olgeta insaed long hem, mo tu, oli bin lukaotem wei blong gat pis mo hapines. Ol samting ia, wanwan long yumi i stap mekem.
Save mo andastanding ia, i stap long evri man mo woman long wol ia. Oli stap insaed long ol trutok we oli no save finis. Long Doctrine and Covenants, seksen 1, ves 39, yumi rid se Lod i God, mo Spirit i testifae long hemia, mo rekod ia i tru, mo trutok bae i stap blong oltaem mo oltaem.
Man blong raetem poem i raetem:
Nomata ol heven oli gowe mo springwota blong wol i bosta,
Trutok, we i kavremap evri samting, bae i stanap agensem samting we i moa nogud,
I no save finis, i no save jenis, i stap oltaem.1
Sam bae oli askem: “?Weaples nao bae yumi faenem trutok ia?. Mo ?hao nao bae yumi luksave?” Long wan revelesen we God i givim tru long Profet Josef Smit long Ketlan, Ohaeo, long Mei 1833, Lod i talem se,
trutok hem i wan save abaot ol samting olsem we oli stap, olsem we oli bin stap, mo olsem we bae oli kam.
Hem i talem se Spirit blong trutok i kam long God,
mo i no gat man i kasem ful trutok kasem taem nomo hem i kipim ol komanmen blong Hem.
Hem we i stap obei long ol komanmen blong God bae i kasem trutok mo laet kasem taem hem i kam antap long glori blong trutok, mo hem i save evri samting.2
!Hemia wan gudfala promes! Promes ia i talem se hem we i obei long ol ol komanmen blong God bae i kasem trutok mo laet kasem taem hem i kam antap long glori blong trutok, mo hem i save evri samting.
Hem i no nid blong yu o blong mi, long taem ia blong bigfala laet, taem we gospel we i fulwan i kambak, blong stap sel tru ol solwota mo ol rod we oli no makem long taem we yumi stap lukaotem trutok. Wan Papa long Heven we i gat lav i raetemdaon rod blong yumi finis, mo i givim wan gaed we i no save giaman—we i fasin blong obei. Wan save long trutok, mo ol ansa long ol bigfala kwestin blong yumi oli kam long yumi taem yumi stap obei long ol komanmen blong God.
Yumi lanem fasin blong stap obei long ful laef blong yumi. Stat long taem we yumi yangfala, olgeta we oli responsibol blong kea long yumi oli putum ol gaedlaen mo rul blong yumi blong mekemsua se yumi stap sef. Laef bae i simpol moa long evriwan long yumi sapos yumi obei ol rul ia fulwan. Be plante long yumi, tru long eksperiens, i lanem waes tingting ia blong stap obei.
Taem mi stap gro i kam antap, evri sama stat long eli Julae kasem eli Septemba, famle blong mi i bin stap long wudhaos long Vivian Pak long Provo Kenion long Yuta.
Wan long ol gudfala fren blong mi, long ol taem ia we i no gat man i lukaot long mifala long kenion, i bin Dani Larsen, we famle blong hem tu i gat wan wudhaos long Vivian Pak. Evri dei, hem mo mi i ronron raon, mifala i go huk long krik mo reva, pikimap ston, mo ol nara rij samting, go antap long hil, klaem, mo stap glad long wanwan minit blong evri aoa long evri dei.
Wan moning, Dani mo mi i bin disaed se mitufala i wantem blong gat wan kamp faea long aftenun ia wetem evri fren blong mitufala long kenion. Mifala i jes nidim blong kliarem wan ples kolosap we bae mifala evriwan i save stap mit long hem. Gras we i kavremap ples ia long manis Jun i drae mo strong, mekem se ples ia i no stret blong mekem faea. Mifala i stat blong pulumaot ol longfala gras, mo plan blong kliarem wan bigfala raon ples. Mifala i pulum mo pulum wetem evri paoa blong mifala, be mifala i save pulum smol hip blong strong gras ia nomo. Mifala i save se wok ia bae i tekem ful dei, mo paoa mo tingting blong mifala i stap go daon finis.
Afta wanem mi ting se i wan gudfala wei, i kam long eit yia maen blong mi. Mi talem long Dani: “!Wanem yumi nidim blong mekem i blong laetem faea long ol rabis gras ia! !Bae yumi mekem wan sekol long strong gras ia mo mekem faea!” Hem i agri fulwan, mo mi ron i go long wudhaos blong mifala blong karem sam mases.
Sapos i gat eniwan long yufala we i ting se long 8 yia, mifala i gat raet blong yusum mases, mi wantem mekem i klia se Dani mo mi, i no gat raet blong yusum mases sapos i no gat wan bigman wetem mifala. Mitufala tugeta i kasem woning fulap taem long saed blong ol denja blong faea. Be, mi bin save weaples famle i stap putum mases, mo mifala i nid blong kliarem ples ia. Mi no tingting tu taem mo ron i go, karem sam mases, mekemsua se i no gat wan i luk. Mi haedem mases kwiktaem long wan long ol paket blong mi.
Mi ron i gobak long Dani, mi glad se mi gat ansa long problem long paket blong mi. Long maen blong mi, mi ting se faea bae i bon nomo kasem ples we mitufala i wantem, mo bae long wan majik wei bae i ded hemwan.
Mi straekem mases long wan ston mo laetem hip blong gras blong manis Jun ia i go. I laet olsem se oli kapsaedem bensin long hem. Long fas taem, Dani mo mi i glad tumas taem mitufala i stap luk gras i go lus, be i no longtaem afta, mitufala i luk se faea ia bae i no ded hemwan. Mitufala i seksek taem mitufala i luksave se i no gat wan samting blong stopem. Strong faea ia i stat blong folem wael gras i go long saed long hil, i mekem evri oktri mo evri samting we i stap long rod blong faea i stap long denja.
Long en, mitufala i no gat joes be ron blong kasem help. I no longtaem evri man mo woman long Vivian Pak oli kam mo go wetem ol bigfala bag we oli wetwet, oli traem blong stopem faea. Afta sam aoa, oli kilimdaon evri smosmol faea we i stap. Ol olfala oktri oli sef, semmak long sam hom we kolosap faea i kasem.
Dani mo mi i lanem sam had be impoten lesen long dei ia—bigfala lesen, i we i impoten blong stap obei.
I gat ol rul mo ol loa we oli help blong mekemsua se yumi stap sef long bodi. Semmak, Lod i putum ol gaedlaen mo komanmen blong help blong mekemsua se yumi sef long saed blong spirit blong yumi save gat sakses blong wokbaot tru long laef ia we i gat fulap samting mo gobak long Papa blong yumi long Heven.
Sam handred yia i pas, long wan jeneresen we i fas strong long kastom blong sakrifaes blong animol, Samuel i talem stret: “I tru we hem i wantem blong yumi kilim ol nambawan sipsip blong mekem sakrefaes long hem, be hem i wantem moa blong yumi obei long tok blong hem.”3
Long dispensesen ia, Lod i talemaot long Profet Josef Smit se Hem i nidim wan hat mo wan maen we i wantem mekem samting; mo man we i wantem mekem samting mo i stap obei, bambae hem i kakae gud samting blong graon blong Saeon long ol las dei ia.4
Evri profet, blong bifo mo tedei, oli save se fasin blong stap obei i impoten long fasin blong sevem yumi. Nifae i talem: “Bae mi go mo mekem ol samting we Lod i bin talem.”5 Nomata ol narawan oli no bin strong long fet mo fasin blong stap obei, i no gat wan taem we Nifae i slakem hem blong mekem wanem we Lod i bin askem hem. Plante jeneresen i kasem blesing from hemia.
Wan stori blong fasin blong stap obei we i leftemap sol, i stori blong Ebraham mo Aesak. I bin had tumas long Ebraham, blong obei long toktok blong God, blong tekem Aesak blong hem, we hem i laekem tumas, i go long graon blong Moraea blong givim hem olsem wan sakrifaes. ?Traem tingting se hemia bae i hevi olsem wanem long hat blong Ebraham taem hem i stap go long ples we God i jusum? I tru nomo, harem nogud i fulumap bodi blong hem mo i tantanem tingting blong hem taem hem i stap fasem Aesak, i mekem hem i silip long olta, mo i tekem naef blong kilim hem i ded. Wetem fet blong hem i no muvmuv, mo wetem ful tras blong hem long Lod, hem i mekem folem toktok blong Lod. Toktok ia i bin gud tumas, taem God i talemaot, mo Ebraham i mas glad tumas taem hem i bin kasem toktok ia: “!Yu no spolem boe ya! !Yu no mekem wan samting long hem! Naoia mi mi save we yu yu stap onatru long God. Yu yu gat wan pikinini ya nomo, mo nating we hem wan nomo we yu yu gat, be yu rere nomo blong letem hem i ded.”6
God i bin traem mo testem Ebraham, mo from hem i bin fetful mo hem i bin obei, Lod i givim hem bigfala promes ia: “Bambae ol man blong ol narafala kantri oli save prea long mi blong mi blesem olgeta, olsem we bambae mi blesem olgeta ya. Be bambae mi mi mekem i gud tumas long olgeta we bambae oli kamaot biaen long yu, from fasin ya we yu yu mekem tedei, we yu obei long tok ya blong mi.”7
Nomata we God i no stap askem yumi blong pruvum se yumi obei long wan bigfala wei olsem, Hem i wantem yumi evriwan blong stap obei tu.
Presiden Josef F. Smit i bin talem long Oktoba 1873: “Fasin blong stap obei i fas loa blong heven.”8
Presiden Godon B. Hinkli i talem: “Hapines blong Ol Lata-Dei Sent, pis blong Ol Lata-Dei Sent, progres blong Ol Lata-Dei Sent, laen blong Ol Lata-Dei Sent, mo fasin blong sevem man we i no save finis mo fasin blong ol pipol ia oli kam olsem wan god, i stap long rod blong folem fasin blong stap obei long ol kaonsel blong … God.”9
Fasin blong stap obei i wan hae fasin we evri profet i gat; hem i givim paoa, mo save long olgeta truaot ol yia. Hem i impoten blong yumi luksave se, yumi tu, yumi gat raet long paoa ia mo save ia. Hem i stap nomo blong wanwan long yumi tedei i kasem, taem yumi stap obei long ol komanmen blong God.
Truaot ol yia, mi bin save plante man mo woman we speseli oli bin fetful mo oli stap obei. Mi bin gat blesing mo kasem insperesen tru long olgeta. Bae mi serem wan stori blong tu pipol ia.
Wolta Kraos, i bin wan strong memba blong Jos, we, wetem famle blong hem, oli stap long wan ples we naoia oli singaotem Is Jemani afta long Seken Wol Wo. Nomata ol hadtaem we hem i bin fesem from se oli no fri long eria ia blong wol long tetaem ia, Brata Kraos i bin wan man we i lavem mo i givim seves long Lod. Hem i fetful, mo wetem ful tingting, i mekem evri wok we oli givim long hem.
Narafala man, Joan Dendofa, blong Hangari, i bin konvet long Jos long Jemani mo i bin baptaes longwe long 1911 taem hem i bin gat 17 yia. I no longtaem afta, hem i gobak long Hangari. Afta long Seken Wol Wo, hem i luk se hem i stap olsem wan prisena long stret kantri blong hem, long siti blong Debreken. Oli bin karemaot fridom ia tu long ol pipol blong Hangari.
Brata Wolta Kraos, we i no bin save Brata Dendofa, i kasem wok blong stap homtija blong hem mo visitim hem oltaem. Brata Kraos i singaotem hom tijing kompanion blong hem mo i talem long hem: “Mifala i kasem wan wok blong visitim Brata Joan Dendofa. ?Bae yu fri blong go wetem mi long wik ia blong luk hem mo givim wan gospel mesej long hem? Afta hem i talem: “Brata Dendofa i stap long Hangari.”
Kompanion blong hem we i sapraes i askem: “?Bae yumi go wetaem?
“Tumoro,” ansa i bin kam long Brata Kraos.
“?Wetaem bae yumitu kambak long haos?” kompanion i askem.
Brata Kraos i ansa: “O long wan wik taem—sapos yumitu save kambak.”
Tufala hom tijing kompanion i go visitim Brata Dendofa; tufala i travel long tren mo bas, stat long Not Is eria blong Jemani i go kasem Debreken, Hangari—wan longfala travel. Brata Dendofa i no bin luk wan homtija stat long taem bifo long wo. Nao, taem hem i bin luk tufala wokman blong Lod, hem i bin fulap long tangkyu we tufala i bin kam. Long fas taem, hem i no wantem sekhan wetem tufala. Be, hem i go long bedrum blong hem, i tekem long kabod blong hem wan bokis we i gat taeting blong hem insaed we hem i bin sevem blong plante yia. Hem i presentem taeting ia long ol homtija blong hem mo talem: “Nao, mi stret long fored blong Lod. Naoia nao mi filim klin inaf blong mi sekhan wetem ol wokman blong Lod!” Brata Kraos i talem long mi afta se toktok i no save talem filing blong hem, se fetful brata ia, we i no gat kontak wetem Jos blong plante yia, i bin obei mo i bin tekemaot 10 pesen long smol vatu blong hem blong pem taeting blong hem. Hem i bin sevem, we hem i no save wetaem bae hem i gat janis blong pem taeting ia.
Brata Wolta Kraos i bin ded naen yia i pas taem hem i gat 94 yia. Hem i bin fetful blong givim seves mo I bin stap obei truaot long laef blong hem, mo i bin wan insperesen long mi, mo long evriwan we i bin save hem. Taem oli askem blong mekem wan wok, hem i neva kwestenem, hem i neva komplen, mo hem i neva mekem eskius.
Ol brata mo sista blong mi. Bigfala tes blong laef ia hem i fasin blong stap obei. God i talem se bae oli testem yumi long wei ia, blong luk sapos bae yumi mekem evri samting we Lod, God blong yumi bae i givim oda long yumi blong mekem.10
Sevya i talem se evriwan we i wantem blong gat wan blesing long han blong hem, i mas obei long loa ia we blesing ia i folem, mo ol kondisen blong loa ia, olsem we oli bin stap stat long bifo long stat blong wol ia.11
I no gat wan eksampol blong fasin blong obei we i stap bitim hemia blong Sevya blong yumi. Long saed blong Hem, Pol i talem wanem hem i luk:
“Kraes i Pikinini blong God, be hem i lanem mining blong fasin ia blong obei long God, long ol samting we oli mekem hem i harem nogud long bodi blong hem.
“Nao from we fasin ya blong hem i mekem hem i prapa man blong sevem man, hem i save sevem olgeta we oli obei long hem i save holem gud olgeta, gogo i no save finis.”12
Sevya i soemaot tru lav long God taem Hem i bin laef long wan laef we i stret gud evriwan, taem hem i ona long tabu misin we Hem i gat. Hem i neva gat hae tingting. Hem i neva flas wetem hae tingting. Hem i neva tanem baksaed long Papa blong Hem. Hem i gat tingting i stap daon oltaem. Hem i gat tru fasin oltaem. Hem i stap obei oltaem.
Nomata we masta blong giaman, we i devel i bin temtem Hem; nomata we bodi blong hem i slak from hem i bin livim kakae blong 40 dei mo 40 naet, mo hem i bin hanggri, yet, taem we devel i rere blong givim long Jisas ol naesfala samting blong temtem Hem, Jisas i givim yumi wan tabu eksampol blong stap obei taem hem i no wantem kamaot long wanem we Hem i save se i raet.13
Taem Hem i bin fesem harem nogud long Getsemane, ples ia we Hem i gotru long plante soabodi, mekem se “swet blong Hem i stap folfoldaon long graon olsem blad nomo,”14 Hem i stap olsem eksampol blong Pikinini ia we i obei mo talem: “Papa, sipos i stret long tingting blong yu, plis yu tekemaot ol samting ya we i stap mekem mi mi harem nogud. Be yu no mekem olsem we mi mi wantem, yu mekem olsem we yu nomo yu wantem.”15
Olsem we Sevya i bin tijim ol fas Aposol blong Hem, semmak Hem i stap tijim yu mo mi: “Yu yu mas biaen long mi.”16 ?Yumi wantem blong stap obei?”
Save ia we yumi stap lukaotem, ol ansa ia we yumi wantem tumas, mo paoa ia we yumi wantem tedei blong mitim ol jalenj blong wan wol we i defren mo i jenis, i save blong yumi taem yumi wantem obei ol komanmen blong Lod wetem glad hat. Mi talem bakegen ol toktok blong Lod se man we i kipim ol komanmen blong [God] bae hem i kasem trutok mo laet, kasem taem we hem i kasem glori tru long trutok mo i save evri samting.17
Hem i prea blong mi wetem tingting we i stap daon se bae yumi kasem blesing blong ol bigfala praes we God i promesem long olgeta we oli stap obei. Long nem blong Jisas Kraes, Lod mo Sevya blong yumi, amen.
© 2013 i kam long Intellectual Reserve, Inc.Oli holem evri raet. Oli printim long YSA. Oli letem long Inglis: 6/12. Oli letem translesen: 6/12. Translesen blong First Presidency Message, May 2013. Bislama.10665 852