Mensahe sa Visiting Teaching, Mayo 2013
“Kari sa Akon”
Paagi sa Iya mga pulong kag Iya halimbawa, si Cristo nagpakita sa aton kon paano maglapit pa gid sa Iya.
Nagapasalamat ako nga makaupod kamo sining komperensya sang Ang Simbahan ni Jesucristo sang mga Santos sa Ulihing mga Adlaw. Iya ini Simbahan. Ginadala naton ang Iya ngalan sang magsulod kita sa Iya ginharian. Sia amo ang Dios, ang Tagtuga, kag perpekto. Mga mortal kita nga mapatay kag makasala. Pero sa Iya pagpalangga sa aton kag sa aton mga pamilya, ginaagda Niya kita nga mangin malapit sa Iya. Sia nagsiling: Dapat kita magpalapit sa iya kag Sia magapalapit sa aton; dapat matutom naton Sia nga pangitaon kag makita naton Sia; dapat kita magpangayo kag kita makabaton; dapat kita magpanuktok kag kita pagabuksan.1
Sining Paskwa sang Pagkabanhaw ginapadumdom kita kon ngaa palangga naton Sia kag sang saad nga Iya ginahatag sa Iya matinuohon nga mga sumulunod agud mangin pinalangga Niya nga mga abyan. Ang Manluluwas naghimo sinang pangako kag naghambal sa aton nga sa aton pag-alagad sa Iya, Sia nagapalapit sa aton. Isa ka halimbawa amo ang bugna para kay Oliver Cowdery sang nag-alagad sia sa Ginuo kaupod ni Propetang Joseph Smith sa paglubad sang Libro ni Mormon: Ang Ginuo naghambal kay Oliver nga nakighambal Sia sa iya tungod sa iya handum. Kinahanglan niya huptan ang laygay sang Ginuo sa iya tagipusuon. Kinahanglan niya nga mangin matinuohon kag matutom sa pagsunod sang mga kasuguan sang Dios, kag dayon ang Dios magalikop sa iya nga may pagpalangga.2
Naeksperiyensyahan ko ang kalipay sang pagpalapit sa Manluluwas kag sang masami nga paglapit Niya sa akon paagi sa simple nga mga pagtuman sa mga kasuguan.
May subong man kamo sini nga mga eksperiyensya. Mahimo nga sa tion ini nga nagpili kamo nga magtambong sa pang-sakramento nga miting. Natabo ini sa akon sang isa ka Domingo sang bata pa ako. Sadto nga tiyempo, nagabaton kami sang sakramento sa panggab-i nga miting. Ang handurawan sinang adlaw masobra 65 ka tuig na ang nagligad, sang gintuman ko ang kasuguan nga magtipon upod sa akon pamilya kag sa mga Santos, sa gihapon nagapalapit sa akon sa Manluluwas.
Madulom kad matugnaw sadto sa gwa. Madumduman ko ang kamag-an kag kaalabaab sa simbahan sina nga gab-i kaupod sa akon mga ginikanan. Nag-ambit kami sang sakramento, nga ginpanagtag sang mga nagakapot sang Aaronic Priesthood, nga nagapangako sa amon Amay nga Langitnon nga pirme panumdumon ang Iya Anak kag tumanon ang Iya mga kasuguan.
Sa paghingapos sang miting nagkanta kami sang himno “Abide with Me; ‘Tis Eventide,” nga may mga tinaga “O Ginuo, updi ako sini nga gab-i.”3
Nabatyagan ko ang pagpalangga kag kalapit sang Manluluwas sinang kagab-ihon. Kag nabatyagan ko ang pagpaumpaw sang Balaan nga Espiritu.
Gusto ko balikan liwat ang mga balatyagon sang pagpalangga sang Manluluwas kag sang kalapit Niya nga nabatyagan ko sa sinang pang-sakramento nga miting sang lamharon pa ako. Gani sang sini lang gintuman ko ang isa pa ka kasuguan. Gin-usisa ko ang balaan nga mga kasulatan. Sa diri, nahibaluan ko nga sarang ako magbalik agud mapabatyag sa akon sang Balaan nga Espiritu ang nabatyagan sang duha ka mga disipulo sang nabanhaw nga Ginuo sang Iya ginbaton ang ila pangagda nga magdayon sa ila puluy-an kag mag-upod sa ila.
Nabasa ko ang parte sa ikatlo nga adlaw matapos ang Iya Paglansang kag lubong. Nakita sang matinuohon nga mga babayi kag sang iban pa nga ang bato napahigad na gikan sa pwertahan sang lulubngan kag ang Iya lawas wala na didto. Nagkadto sila tungod sang ila pagpalangga sa Iya agud haplasan ang Iya lawas.
Duha ka mga anghel ang nagatindog sa unhan kag namangkot kon ngaa nahadlok sila, nga nagasiling:
“Ngaa bala ginapangita ninyo ang buhi sa tunga sang mga patay?
“Wala Sia diri, kundi nabanhaw, Panumduma kon paano nga nagpamulong Sia sa inyo, sang didto pa Sia sa Galilea,
“nga ang Anak sang tawo dapat itugyan sa mga kamot sang mga tawong makasasala, kag ilansang sa krus, kag sa ikatlong adlaw mabanhaw.”4
Ang Ebanghelyo ni Marcos nagdugang sing direksyon gikan sa isa sa mga anghel: “Apang kadto kamo, sugiri ang iya mga gintutun-an kag si Pedro nga nagauna si Jesus sa inyo sa Galilea; didto makita ninyo Sia, subong sang ginsiling Niya sa inyo.”5
Ang mga Apostoles kag mga disipulo nagtipon sa Jerusalem. Pareho sa aton kon yara kita sa amo nga hitabo, nahadlok sila kag natingala samtang nagahinambalanay sila kon ano ang kahulugan sang Iya kamatayon kag sang mga balita nga Sia nabanhaw.
Duha sa mga disipulo ang naglakat sina nga hapon gikan sa Jerusalem padulong sa Emmaus. Nagpakita sa ila ang nabanhaw nga Cristo sa dalan kag naglakat upod sa ila. Ang Ginuo nagpalapit sa ila.
Ang libro ni Lucas nagatugot sa aton nga maglakat upod sa ila:
“Sang nagasugilanon sila kag nagapamangkutanay, si Jesus gid nagpalapit kag nagbuylog sa ila.
“Apang ang ila mga mata nakulapan sa bagay nga wala sila makakilala sa iya.
“Kag nagsiling sia sa ila, Ano bala nga mga sugid ining ginahambalan ninyo sang nagalakat kamo kag nagdulog sila, nga nagakasubo?
“Nian ang isa sa ila, nga ginhingalanan si Cleofas, nagsabat sa iya, “Ikaw lamang bala ang dumalayon sa Jerusalem nga wala makahibalo sang mga butang nga nahanabo didto sa sining mga adlaw?”6
Ginsugiran nila Sia sang ila kasubo nga napatay si Jesus nga kuntani naglaum sila nga Sia ang mangin Manunubos sang Israel.
Ayhan may pagpalangga sa tingug sang nabanhaw nga Ginuo sang nagsiling Sia sa sining duha ka masinulub-on kag nagakalisod nga mga disipulo:
“Kag nagsiling sia sa ila, “O mga tawo nga buang-buang, kag makuli sing tagipusuon sa pagtuo sa tanan nga napamulong sang mga manalagna:
“Indi bala kinahanglan nga ang Cristo mag-antus sining mga butang kag magsulod sa iya himaya?
“Kag sumugod kay Moises kag sa tanan nga manalagna, gintalastas niya sa ila sa bug-os nga mga kasulatan ang mga butang nahanungod sa iya kaugalingon.”7
Dayon nag-abot ang tion nga nagpaalabaab sang akon tagipusuon halin sang gamay pa ako nga bata:
“Gani naghinampot sila sa minoro nga ginapakadtuan nila: nagpahayag sia nga daw magapadayon pa.
“Apang ginpilit nila sia, nga nagasiling, “Pabilin ka sa amon, kay kahapunon na kag malapit na ang gab-i.” Gani nagsulod sia sa pagpabilin sa ila.”8
Ginbaton sang Manluluwas ang pangagda sina nga gab-i nga magsulod sa puluy-an sang Iya mga disipulo malapit sa minoro sang Emmaus.
Nagkaon Sia kaupod nila. Nagkuha Sia sang tinapay, ginbendisyunan ini, ginpihak-pihak ini, kag ginhatag sa ila. Nagsanag ang ila mga mata kag nakilala nila Sia. Kag nadula Sia sa ila panulok. Ginsulat ni Lucas para sa aton ang mga balatyagon sadtong bulahan nga mga disipulo: “Kag nagsinilingay sila, Wala bala nagdabdab ang aton mga tagipusuon sa sulod naton sang nagpamulong sia sa aton sa dalan, sang nagatalastas sia sa aton sang mga kasulatan?”9
Sa sina mismo nga tion, ang duha ka mga disipulo dali-dali nga nagbalik sa Jerusalem agud sugiran ang onse ka mga Apostoles kon ano ang natabo sa ila. Sa sina mismo nga tion nagpakita liwat ang Manluluwas sa ila.
Ginrepaso Niya ang mga propesiya sang Iya misyon sa pagpasag-uli [atone] para sa mga sala sang tanan nga anak sang Iya Amay kag sa paghukas sang mga gapos sang kamatayon.
“Kag nagsiling sia sa ila, Amo ining nasulat, nga ang Cristo magaantos kag mabanhaw sa ikatlo nga adlaw:
“Kag nga ang paghinulsol kag ang kapatawaran sang mga sala iwali sa iya ngalan sa tanan nga kapungsuran, sumugod sa Jerusalem.
“Kamo amo ang mga saksi sining mga butang.”10
Ang mga pulong sang Manluluwas matuod man para sa aton kasubong nga matuod ini para sa Iya mga disipulo sadto. Kita mga saksi sining mga butang. Kag ang mahimayaon nga sugo nga ginbaton naton sang ginbunyagan kita sa Ang Simbahan ni Jesucristo sang mga Santos sa Ulihing mga Adlaw ginpaathag sa aton sing simple sang propeta nga si Alma dinag-on na ang nagligad sa mga tubig sang Mormon:
“Kag natabo ini, nga nagsiling sia sa ila: Yari karon, yari ang mga tubig sang Mormon (kay amo ini ang pagtawag sang mga ini) kag karon, sanglit maluyag kamo nga magsulod sa panong sang Dios, kag tawagon nga iya katawhan, kag sugot nga magpas-an sang palas-anon sang isa kag isa, agud nga mangin mamag-an ang mga ini;
“Kag subong man, sugot nga magpangasubo upod sadtong mga nagapangasubo; kag subong man, magpaumpaw sadtong nga nagakinahanglan sang kaumpawan, kag magtindog bilang mga saksi sang Dios sa tanan nga mga tinion kag sa tanan nga mga butang, kag sa tanan nga mga duog nga yara kamo, bisan tubtob sa kamatayon, agud matubos kamo sang Dios, kag maisip upod sadtong sa mga naunang pagkabanhaw, agud makaangkon kamo sang kabuhi nga wala’y katapusan—
“Karon ginasiling ko sa inyo, kon amo ini ang handum sang inyo mga tagipusuon, ano bala ang inyo ginapamatok sa pagpabunyag sa ngalan sang Ginuo, bilang isa ka saksi sa iya atubang nga kamo nagsulod sa isa ka kasugtanan upod sa iya, nga kamo magaalagad sa iya kag magtuman sang iya mga kasuguan, agud iya ibubo ang iya Espiritu sing bugana pa gid sa inyo?
“Kag karon sang mabatian sang katawhan ining mga pulong, nagpinalakpak sila sang ila mga kamot tungod sang kalipay, kag nagsininggit: Amo ini ang handum sang amon mga tagipusuon.”11
May kasugtanan kita nga bayawon ang mga nagakinahanglan kag mangin mga saksi sang Manluluwas samtang kita nagakabuhi.
Sarang lamang naton ini himuon nga wala palya kon makabatyag kita sang pagpalangga para sa Manluluwas kag mabatyagan naton ang Iya pagpalangga para sa aton. Kon kita matutom sa aton mga saad nga ginhimo, mabatyagan naton ang aton pagpalangga sa Iya. Magatubo ini tungod mabatyagan naton ang Iya gahum kag ang Iya pagpalapit sa aton sa pag-alagad sa Iya.
Si Pangulong Thomas S. Monson nagpahanumdom sa aton pirme sang saad sang Ginuo sa Iya matinuohon nga mga disipulo: “Nga ang sin-o man nga magabaton sang Iya mga alagad, mangin yara man Sia, kay magauna Sia sa ila. Kag mangin yara sa ila natuo nga kamot kag sa ila nawala, kag ang Iya Espiritu mangin yara sa ila tagipusuon, kag ang Iya nga mga angheles magalibot sa ila, sa pagtib-ong sa ila.”12
May isa pa ka paagi nga nabatyagan naton nga mas naglapit Sia sa aton. Samtang matutom kita nga nagaalagad sa Iya, nagapalapit Sia sa mga pinalangga naton sa aton pamilya. Sa tagsa ka tion nga ginatawag ako nga mag-alagad sa Ginuo agud sayluhon ukon biyaan ang akon pamilya, nakita ko nga ginabendisyunan sang Ginuo ang akon asawa kag kabataan. Ginhanda Niya ang Iya mapinalanggaon nga mga alagad kag ang mga oportunidad nga mapalapit ang akon pamilya sa Iya.
Nabatyagan na ninyo ini nga bugay sa inyo mga kabuhi. Madamo sa inyo may mga mahal sa kabuhi nga nagatalang gikan sa dalan padulong sa kabuhi nga wala’y katapusan. Nagapanumdom kamo kon ano pa ang inyo himuon agud mapabalik sila. Makasalig kamo sa Ginuo nga magpalapit sa ila samtang nagaalagad kamo sa Iya nga may pagtuo.
Matandaan ninyo ang saad sang Ginuo kanday Joseph Smith kag Sidney Rigdon sang mahilayo sila sa ila mga pamilya nga nagaalagad sa Iya. Ginhambalan sang Ginuo sanday Sidney kag Joseph, nga yara sa maayo nga kahimtangan ang ila mga pamilya; nga yara sila sa Iya pag-inakop, kag himuon Niya para sa ila ang sa pagbanta Niya makapaayo sa ila; tungod Sia gamhanan.13
Pareho nanday Alma kag Haring Mosias, pila ka matinuohon nga mga ginikanan ang nag-alagad sa Ginuo sing malawig kag maayo pero may mga kabataan nga naglisa wala’y sapayan sang mga sakripisyo sang ila mga ginikanan para sa Ginuo. Ginhimo nila ang tanan nga ila masarangan nga wala sang makita nga resulta, bisan upod pa ang bulig sang mapinalanggaon kag matinuohon nga mga abyan.
Si Alma kag ang mga Santos sa iya panahon nagpangamuyo para sa iya anak kag sa mga anak ni Haring Mosias. Nag-abot ang anghel. Ang inyo mga pangamuyo kag ang mga pangamuyo sang mga nagatuo magadala sang mga alagad sang Ginuo agud buligan ang mga miyembro sang inyo pamilya. Buligan nila sila nga pilion ang dalan pabalik sa Dios, bisan pa nga ginaatake sila ni Satanas kag sang iya mga sumulunod, nga ang katuyuan amo ang gub-on ang mga pamilya sa sini nga kabuhi kag sa katubtuban.
Madumduman ninyo ang mga pulong nga ginhambal sang anghel kay Alma nga Lamharon kag sa mga anak ni Mosias sa ila pagrebelde: “Kag sa liwat, ang anghel nagsiling: Yari karon, nabatian sang Ginuo ang mga pangamuyo sang iya alagad nga si Alma, nga amo ang imo amay; kay nagpangamuyo sia upod ang tuman kadako nga pagtuo nahanungod sa imo nga kabay nga madala ka sa ihibalo nahanungod sa kamatuoran; gani, para sa amo nga katuyuan nagkari ako sa pagpapati sa imo sang gahum kag pagbulut-an sang Dios, nga ang mga pangamuyo sang iya mga alagad mahimo nga masabat suno sa ila pagtuo.”14
Ang saad ko sa inyo nga nagapangamuyo kag nagaalagad sa Ginuo indi nga mabaton ninyo ang tagsa ka bugay nga sarang ninyo handumon para sa inyo kaugalingon kag sa inyo pamilya. Pero ang masaad ko sa inyo nga ang Manluluwas magapalapit sa inyo kag bugayan kamo kag ang inyo pamilya sang kon ano ang pinakamaayo. Maangkon ninyo ang kaumpawan sang Iya pagpalangga kag mabatyagan ang sabat sang Iya pagpalapit sa inyo samtang ginadab-ot ninyo ang inyo mga kamot sa pag-alagad sa iban. Sa inyo pagpaayo sang mga pilas sang mga nagakinahanglan kag pagtanyag sang pagtinlo sang Iya Pagpasag-uli sa ila nga nagakasubo sa sala, ang gahum sang Ginuo magapabakod sa inyo. Nagadupa ang iya mga butkon kaupod sang inyo mga butkon sa pagbulig kag pagbugay sang mga anak sang aton Amay nga Langitnon lakip na yadtong yara sa inyo pamilya.
May isa ka mahimayaon nga pag-abi-abi nga ginhanda para sa aton. Dira naton makita ang katumanan sang saad sang Ginuo nga aton ginpalangga. Sia ang maga-abi-abi sa aton sa kabuhi nga wala’y katapusan kaupod Niya kag sang aton Amay nga Langitnon. Ginlaragway ini ni Jesucristo sa sini nga paagi:
Tinguhai nga mapalayag kag mapasad ang akon Sion. Tumana ang akon mga kasuguan sa tanan nga butang.
Kon tumanon naton ang Iya mga kasuguan kag magpadayon sa katapusan maangkon naton ang kabuhi nga wala’y katapusan, isa ka dulot nga amo ang pinakadako sa tanan nga mga dulot sang Dios.15
Kay ang mga mabuhi magapanubli sang duta, kag sila nga mapatay magapahuway sa ila pagpangabudlay, kag ang ila mga binuhatan magasunod sa ila; kag magabaton sila sang purong-purong sa mga mansyon sang Iya Amay, nga Iya ginhanda para sa ila.16
Nagasaksi ako nga paagi sa Espiritu sarang naton sundon ang pangagda sang Amay nga Langitnon: “Ini ang Akon Pinalangga nga Anak. Pamatii Sia!”17
Paagi sa Iya mga pulong kag Iya halimbawa, si Cristo nagpakita sa aton kon paano maglapit pa gid sa Iya. Ang tagsa ka anak sang Amay nga Langitnon nga nagpili nga magpabunyag sa Iya Simbahan makaangkon sang oportunidad sa sini nga kabuhi nga matudloan sang Iya ebanghelyo kag mabatian ang Iya pangagda paagi sa Iya tinawag nga mga alagad, “Kari sa akon.”18
Ang tagsa ka nakighisugot nga alagad Niya sa Iya ginharian sa duta kag sa kalibutan sang mga espiritu magabaton sang Iya giya paagi sa Espiritu samtang ginabugayan nila kag ginaalagaran ang iban para sa Iya. Kag ila mabatyagan ang Iya pagpalangga kag makasalapo sang kalipay sa paghilapit sa Iya.
Isa ako ka saksi sang Pagkabanhaw sang Ginuo nga daw pareho lang nga yara ako sadtong gab-i kaupod ang duha ka mga disipulo sa puluy-an sa dalan sa Emmaus. Nakahibalo ako nga Sia buhi pareho kay Joseph Smith sang makita niya ang Amay kag ang Anak sa kasanag sadtong masanag kaayo nga aga sa kakahuyan sa Palmyra.
Ini ang matuod nga Simbahan ni Jesucristo. Yara lamang sa pagbulut-an sang priesthood nga ginakaptan ni Pangulong Thomas S. Monson ang gahum para kita mahugpong sa mga pamilya agud magakabuhi sa katubtuban kaupod sang aton Amay nga Langitnon kag sang Ginuong Jesucristo. Sa Adlaw sang Paghukom kita magaatubang sa Manluluwas. Mangin isa ini ka tion sang kasadya para sa ila nga nagpalapit sa Iya sa pag-alagad sa Iya sa sining kinabuhi. Mangin masadya ang makabati sang mga pulong: “Maayo gid, ulipon nga maayo kag matutom.”19Nagapamatuod ako bilang saksi sang nabanhaw nga Manluluwas kag aton Manunubos sa ngalan ni Jesucristo, amen.
© 2013 by Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/12. Petsa sang pagtugot sa paglubad: 6/12. Paglubad sang Visiting Teaching Message, May 2013. Hiligaynon. 10665 861