Mensahe sang Unang Panguluhan, Mayo 2013
Ang Pagkamatinumanon Nagadala sang mga Bugay
Ang pagkahibalo sang kamatuoran kag ang mga sabat sa aton pinakadalagko nga mga pamangkot mabaton naton kon nagatuman kita sang mga kasuguan sang Dios.
Mga pinalangga kong kauturan, nagapasalamat gid ako nga makaupod kamo sini nga aga. Nagahingyo ako sang inyo pagtuo kag mga pangamuyo samtang nagahambal sa inyo.
Sa sulod sang mga dinag-on, ang mga lalaki kag babayi nagtinguha sa pag-angkon sang ihibalo kag paghangop sining mortal nga pagpangabuhi kag sang ila lugar kag katuyuan sa sini, subong man sang paagi agud maangkon ang kalinong kag kalipayan. Ang amo nga pagtinguha ginahimo man sang tagsa sa aton.
Ining ihibalo kag paghangop mahimo maangkon sang tanan nga katawhan. Kaundan ini sang mga kamatuoran nga wala’y katapusan. Sa Doctrine and Covenants seksyon 1, bersikulo 39, ginasiling nga ang Ginuo amo ang Dios, kag ang Espiritu nagasaksi sini, kag ining panaksihon matuod, kag ang kamatuoran nagapadayon tubtob sa katubtuban.
Ang mamalaybay nagsulat:
Ang iban mamangkot, “Sa diin bala ining kamatuoran makita, kag paano naton ini makilala?” Sa isa ka bugna nga ginhatag paagi kay Propetang Joseph Smith sa Kirtland, Ohio, sang Mayo sang 1833, ang Ginuo nagpahayag:
Ang kamatuoran amo ang ihibalo sang mga butang sa karon, sang nagligad, kag sa palaabuton. …
Ang Espiritu sang kamatuoran iya sang Dios. …
Kag wala sang sin-o man nga makabaton sang kabug-osan magluwas kon nagatuman sia sang Iya mga kasuguan.
Ang nagatuman sang mga kasuguan sang Dios makabaton sang kamatuoran kag kasanag, tubtob nga pagahimayaon sia sa kamatuoran kag makahibalo sang tanan nga mga butang.2
Daw ano kanami nga pangako! Ang nagatuman sang mga kasuguan [sang Dios] makabaton sang kamatuoran kag kasanag, tubtob nga pagahimayaon sia sa kamatuoran kag makahibalo sang tanan nga mga butang.
Indi na naton kinahanglan, sa sining tion sang kaalam sa diin napanumbalik na ang kabug-osan sang ebanghelyo, nga maggamit sang bag-o nga paagi agud pangitaon ang kamatuoran. Ang mapinalanggaon nga Amay nga Langitnon nagplastar sang aton alagyan kag naghatag sang sigurado nga giya—nga amo angpagkamatinumanon.Ang pagkahibalo sang kamatuoran kag ang mga sabat sa aton pinakadalagko nga mga pamangkot mabaton naton kon nagatuman kita sang mga kasuguan sang Dios.
Nagatuon kita nga mangin matinumanon sa bug-os naton nga kabuhi. Sugod sang kita magagmay pa, yadtong mga responsable sa pag-atipan sa aton nagahatag sang mga giya kag pagsulundan agud masiguro nga hilway kita sa katalagman. Mas mangin simple ang kabuhi para sa aton kon tumanon naton ining mga pagsulundan sing lubos. Ugaling, madamo sa aton ang nanuto paagi sa eksperiyensya sang kaimportante sang pagkamatinumanon.
Sang gamay pa ako, tagsa ka summer halin sa umpisa sang Hulyo tubtob sa umpisa sang Septyembre, ang amon pamilya nagatiner sa amon kamalig sa Vivian Park sa Provo Canyon sa Utah.
Isa ka suod ko nga abyan sadtong malipayon nga mga inadlaw sa canyon amo si Danny Larsen, nga ang pamilya may ila man kamalig sa Vivian Park. Kada adlaw nagalibot kami sa sining paraiso namon, nga nagapamunit sa sapa-sapa kag suba, nagapanipon sang mga bato kag kon ano-ano pa, nagapanglakaton, nagpanaka, kag nagakasadya sa tagsa ka minuto sang tagsa ka oras sang tagsa ka adlaw.
Isa ka aga nagdesisyon kami ni Danny nga maghimo sang dabok [campfire] sina nga gab-i upod sang amon mga amigo. Kinahanglan lang namon hawanan ang isa ka bahin sang wayang sa unhan sa diin pwede kami tanan magtililipon. Ang hilamon nga nagatubo sa wayang laya na kag gapanunok, gani daw indi kami makatigayon sang gusto namon himuon. Gin-amat-amat namon panggabot ang matag-as nga mga hilamon, nga nagaplano nga hawanan ang isa ka daku nga bahin sing patipulon. Ubos-kusog kami nga nagpanggabot, pero ang amon lang gid masarangan amo ang pila ka hakop sang mahunit nga mga hilamon. Narealisar namon nga ining ulobrahon malab-utan sang bilog nga adlaw, kag ang amon kusog kag gana amat-amat na nagakadula.
Kag dayon ang akon nahunahuna nga pinakamaayo nga solusyon gulpi lang nagsulod sa akon walo-ka-tuig nga pamensaron. Siling ko kay Danny, “Kinahanglan lang naton tutdan ining mga hilamon. Sunugan lang naton sing patipulon ang mga hilamon!” Nagsugot man sia dayon, kag nagdalagan ako pakadto sa amon kamalig agud magkuha sang posporo.
Basi bala panumdumon ninyo nga sa amon idad nga walo ka tuig ginasugtan na kami maggamit sang posporo, luyag ko athagon nga ako kag si Danny ginadilian nga maggamit sini nga wala sang hamtong nga nagabantay. Pareho kami nga ginpaandaman na sing liwat-liwat sang kadelikado sang kalayo. Pero, nahibaluan ko kon diin ginatago sang akon pamilya ang posporo, kag kinahanglan namon hawanan yadtong wayang. Nga daw wala na nagpamensar pa, nagdalagan ako pakadto sa amon kamalig kag nagkuha sang pila ka palito sang posporo, nga ginapiho gid nga wala sang nakakita. Gilayon ko ini nga gintago sa akon bulsa.
Nagdalagan ako pabalik kay Danny, ginakunyag nga yara sa sulod sang akon bulsa ang solusyon sa amon problema. Madumduman ko pa nga abi ko ang kalayo magsunog tubtob sa kon diin lang gusto namon kag pagkatapos mapatay lang ini.
Ginbag-id ko ang posporo sa bato kag gintutdan ang patay nga mga hilamon. Nagkarab-karab ini nga daw ginbuboan sang gasolina. Sang primero nasadyahan kami ni Danny samtang nagatan-aw nga nagkalasunog ang mga hilamon, pero sang ulihi daw indi sia gali mapatay sa iya lang. Nagsala-sala kami sang marealisar namon nga wala kami sang mahimo para patyon ang kalayo. Ang nagadaba-daba nga kalayo naglapta tubtob sa kilid sang bukid, nga hana maglamon sang mga pine tree kag tanan nga maagyan sini.
Sang ulihi wala na kami sang mahimo kundi ang mangayo sang bulig. Pagkadugay-dugay ang mga lalaki kag babayi nga yara sa Vivian Park nagadinalagan sing pakadto-pakari nga may dala nga basa nga mga sako, nga ginahampas sa kalayo agud mapatay ini. Pagligad sang pila ka oras ang katapusan nga baga napatay gid man. Ang tigulang na kaayo nga mga pine tree naluwas, subong man ang mga balay nga diutayan lang man tani masunog.
Natun-an namon ni Danny ang pila ka mabudlay pero importante nga leksyon sadto nga adlaw—ilabi na gid ang importansya sang pagkamatinumanon.
May mga pagsulundan kag mga layi nga nagabulig nga masiguro ang aton pisikal nga kahilwayan sa katalagman. Sa amo man, ang Ginuo nagpahamtang sang mga giya kag mga kasuguan agud sigurohon ang aton espiritwal nga kahilwayan sa katalagman para madinalag-on kita nga magpanglakaton sa sining masami peligroso nga mortal nga kabuhi kag makabalik sa ulihi sa aton Amay nga Langitnon.
Mga dinag-on na ang nagligad, sa isa ka henerasyon nga nahulom sa tradisyon ang paghalad sang sapat, si Samuel maisog nga nagpahayag, “Ang pagtuman maayo pa sangsa halad, kag ang pagpamati sangsa sapay sang mga karnero.”3
Sa sini nga dispensasyon, ang Ginuo nagpahayag kay Propetang Joseph Smith nga nagapangayo Sia sang “tagipusuon kag handa nga kaisipan; kag ang handa kag matinumanon magakaon sang kaayo sang duta sang Sion sa sining ulihing mga adlaw.”4
Ang tanan nga mga propeta, dumaan kag moderno, nakahibalo nga ang pagtuman importante para sa aton kaluwasan. Si Nefi nagsiling, “Malakat ako kag himuon ang mga butang nga ginasugo sang Ginuo.”5 Bisan pa nga nagluya ang iban sa ila pagtuo kag pagkamatinumanon, bisan kis-a wala gid si Nefi nagpalya sa paghimo sang ginapangayo sang Ginuo sa iya. Madamo nga henerasyon ang nabugayan bilang resulta sini.
Isa ka makatalandog nga kasaysayan sang pagkamatinumanon amo ang kanday Abraham kag Isaac. Daw ano ayhan kabudlay para kay Abraham, nga tumanon ang sugo sang Dios, nga dalhon ang iya pinalangga nga si Isaac sa duta sang Moria agud ihalad sia bilang sakripisyo. Matungkad ayhan naton ang kabug-at sa tagipusuon ni Abraham samtang nagalakat sia padulong sa natakda nga lugar? Piho gid nga gintay-og sang kalisud ang iya lawas kag ginpaantos ang iya pamensaron sang ginhigtan niya si Isaac, ginhamtang sa altar, kag ginkuha ang kutsilyo agud patyon sia. Upod ang indi malingkang nga pagtuo kag lubos nga pagsalig sa Ginuo, nagsunod sia sa sugo sang Ginuo. Daw ano kanami sang pahayag, kag daw ano ka malipayon kay Abraham sang mag-abot ini: “Dili pagpatup-i sang imo kamot ang bata ukon pag-anha sia: kay karon nakilala ko nga ikaw nagakahadlok sa Dios, sa ginatan-aw nga wala mo pag-idumili sa akon ang imo anak nga bugtong.”6
Si Abraham gintilawan, kag tungod sa iya pagtuo kag pagkamatinumanon ang Ginuo naghatag sa iya sining mahimayaon nga pangako: “Kag sa imo kaliwatan pakamaayuhon ang tanan nga pungsod sa duta, bangud nagtuman ka sa akon tingug.”7
Bisan pa nga wala ginapangayo sa aton nga pamatud-an ang aton pagkamatinumanon sa amo ka bug-at kag kasakit nga paagi, ang pagkamatinumanon ginapangayo man sa aton.
Ginhambal ni Pangulong Joseph F. Smith sang Oktubre 1873, “Ang pagkamatinumanon amo ang una nga layi sang langit.”8
Siling ni Pangulong Gordon B. Hinckley, “Ang kalipayan sang mga Santos sa Ulihing mga Adlaw, ang kalinong sang mga Santos sa Ulihing mga Adlaw, ang pag-uswag sang mga Santos sa Ulihing mga Adlaw, ang pagtin-ad sang mga Santos sa Ulihing mga Adlaw, kag ang wala’y katapusan nga kaluwasan kag pagkahitaas sining katawhan nasandig sa pagtuman sa mga laygay sang{nb… Dios.”9
Ang pagkamatinumanon isa ka kinaiya sang mga propeta; nagahatag ini sang kusog kag ihibalo sa ila sa tanan nga panahon. Importante nga aton mahibal-an nga kita man, ginapahanugotan sa sining ginhalinan sang kusog kag ihibalo. Yara lang ini para sa tagsa sa aton sa karon samtang nagatuman kita sang mga kasuguan sang Dios.
Sa sulod sang mga tinuig, nakilala ko ang indi maisip nga mga indibidwal nga nangin matinuohon kag matinumanon. Ginbugayan ako kag ginpadasig sang mga ini. Luyag ko ipaambit sa inyo ang istorya sang duha ka amo sini nga mga indibidwal.
Si Walter Krause isa ka mapag-on nga miyembro sang Simbahan nga, upod sa iya pamilya, nagpuyo sa gintawag nga East Germany pagkatapos sang Ikaduha nga Inaway Pangkalibutanon. Wala’y sapayan sang mga kabudlay nga iya gin-atubang tungod wala sing kahilwayan sa amo nga bahin sang kalibutan sang amo nga panahon, si Brother Krause isa ka tawo nga nagpalangga kag nag-alagad sa Ginuo. Matinuohon kag mauti niya nga gintuman ang tagsa ka ulobrahon nga ginhatag sa iya.
Ang isa naman nga si Johann Denndorfer, isa ka tumandok sang Hungary, nahaylo sa Simbahan sa Germany kag nabunyagan didto sang 1911 sa idad nga 17. Wala madugayi nagbalik sia sa Hungary. Pagkatapos sang Ikaduha nga Inaway Pangkalibutanon, daw nangin priso sia sa iya dutang natawhan, sa siyudad sang Debrecen. Ang kahilwayan ginkakas man sa mga tawo sang Hungary.
Si Brother Walter Krause, nga wala makakilala kay Brother Denndorfer, nakabaton sang assignment nga mangin iya home teacher kag magbisita pirme sa iya. Gintawgan ni Brother Krause ang iya kaupod sa home teaching kag nagsiling sa iya, “Nakabaton kita sang assignment nga bisitahan si Brother Johann Denndorfer. Libre ka bala nga updan ako sini nga simana agud bisitahan sia kag hatagan sang mensahe sang ebanghelyo?” Kag dayon gindugang niya, “Si Brother Denndorfer nagapuyo sa Hungary.”
Namangkot ang iya nakibot nga kaupod, “San-o kita malakat?”
“Buwas,” ang sabat ni Brother Krause.
“San-o kita mapauli?” pamangkot sang kaupod.
Nagsabat si Brother Krause, “Ah, mga isa ka simana—kon makabalik pa kita.”
Naglakat ang duha ka magkaupod sa home teaching agud bisitahan si Brother Denndorfer, nga nagbiyahe sakay sa tren kag bus gikan sa Naaminhan-Nasidlangan nga bahin sang Germany pakadto sa Debrecen, Hungary—isa ka malawig kaayo nga biyahe. Si Brother Denndorfer wala sang nangin home teacher bisan antes pa sang giyera. Karon, sang nakita niya ining mga alagad sang Ginuo, napuno sia sang kapasalamatan nga nag-abot sila. Sang primero nagbalibad sia sa pagpangumusta sa ila. Sa baylo, nagsulod sia sa iya kwarto kag nagkuha gikan sa gamay nga aparador sang isa ka gamay nga kahon nga nasudlan sang iya ika-pulo nga ginsupot niya sa sulod sang mga tinuig. Ginhatag niya ang ika-pulo sa iya mga home teachers kag nagsiling, “Karon natuman ko na ang akon obligasyon sa ika-pulo sa Ginuo. Karon pamatyag ko angayan na ako magkumusta sang kamot sang mga alagad sang Ginuo!” Ginsugid ni Brother Krause sa akon sang ulihi nga natandog gid sia katama sining matinuohon nga utod, nga wala sing komunikasyon sa Simbahan sa sulod sang madamo nga tinuig, nga matinumanon kag dalayon nga nagpain sang 10 porsyento sang iya diutay nga kinitaan agud magbayad sang iya ika-pulo. Ginsupot niya ini nga wala makahibalo kon san-o ukon may ara pa bala sia sang prebilihiyo sa pagbayad sini.
Si Brother Walter Krause nagtaliwan siyam ka tuig ang nagligad sa idad nga 94. Nag-alagad sia sing matutom kag matinumanon sa bug-os niya nga kabuhi kag nangin isa ka inspirasyon sa akon kag sa tanan nga nakakilala sa iya. Kon ginapangabay sa pagtuman sang mga katungdanan, wala sia nagapamangkot, wala sia nagakumod, kag wala sia nagapamalibad.
Mga kauturan ko, ang pinakadako nga pagtilaw sa sining kabuhi amo ang pagtuman. Nagsiling ang Dios nga pagatilawan Niya kita agud tan-awon kon himuon naton ang tanan nga mga butang nga isugo sa aton sang Ginuong Dios.10
Ginhambal sang Manluluwas, ang tanan nga luyag magbaton sang bugay halin sa Ginuo kinahanglan magtuman sang layi kag mga kondisyon nga napertineser sinang bugay, subong sang gintalana gikan sa ginsuguran sining kalibutan.11
Wala na sang mas dako pa nga halimbawa sang pagkamatinumanon sangsa iya sang aton Manluluwas. Si Pablo nagtugda parte sa Iya:
“Bisan Sia anak, nakatuon Sia sang pagkamasinulundon paagi sa Iya gin-antos;
“Kag sang nahimpit Sia, nangin ginhalinan sang kaluwasan nga dayon sa tanan nga nagatuman sa iya.”12
Ang Manluluwas nagpakita sang tunay nga pagpalangga sang Dios paagi sa pagkabuhi sang perpekto nga kabuhi, paagi sa pagtahod sang Iya sagrado nga misyon. Indi Sia nangin matinaas-taason. Indi Sia nangin bugalon. Indi Sia nangin di-tampad. Dalayon Sia nga nangin mapainubuson. Dalayon Sia nga nangin sinsero. Dalayon Sia nga nangin matinumanon.
Bisan pa nga gintentar Sia sinang maestro sang kadayaon, nga amo ang yawa, bisan pa nga pisikal Sia nga nagapalangluya gikan sa pagpuasa sang 40 ka adlaw kag 40 ka gab-i kag ginagutom, pero sang ang panulay nagtanyag kay Jesus sang labing mapang-engganyo kag pinakamakagalanyat nga tanyag, ginhatag Niya sa aton ang isa ka diosnon nga halimbawa sang pagkamatinumanon paagi sa pagbalibad nga maglisa sa nahibaluan Niya nga husto.13
Sang nagapangatubang sang pag-antos sa Getsemani, sa diin ginbatas Niya ang tuman nga kasakit nga “ang iya balhas nangin kaangay sang dalagkong tinulo sang dugo nga nagatupa sa duta,”14nangin perpekto Sia nga halimbawa sang isa ka masinulundon nga Anak sang Sia magsiling, “Amay, kon buot mo, ipahilayo sa akon ining tagayan; apang indi ang akon kabubut-on, kundi ang imo, ang pagahimuon.”15
Pareho nga gintulinan sang Manluluwas ang Iya mga Apostoles sang una, ginatulinan Niya kita, “Sunod ka sa akon.”16Handa bala kita nga magtuman?
Ang ihibalo nga aton ginapangita, ang mga sabat nga aton ginapaabot, kag ang kusog nga aton ginahandom karon nga panahon agud masabat ang mga hangkat sang komplikado kag nagabaylo-baylo nga kalibutan mangin aton kon handa kita nga magtuman sang mga kasuguan sang Ginuo. Ginasambit ko liwat ang mga pulong sang Ginuo: “Ang nagatuman sang mga kasuguan sang [Dios] makabaton sang kamatuoran kag kasanag, tubtob nga pagahimayaon sia sa kamatuoran kag makahibalo sang tanan nga mga butang.”17
Kabay nga pagabugayan kita sang madamo nga padya nga ginsaad sa mga matinumanon. Sa ngalan ni Jesucristo, ang aton Ginuo kag Manluluwas, amen.
© 2013 by Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/12. Petsa sang pagtugot sa paglubad: 6/12. Paglubad sang First Presidency Message, May 2013. Hiligaynon. 10665 861