Mensahe iti Visiting Teaching, Mayo 2013
“Umaykayo Kaniak”
Babaen kadagiti balikas ken pagwadanna, impakita ni Cristo kadatayo no kasano nga ad-adda nga umasidegtayo Kenkuana.
Agyamanak a makaduakayo iti daytoy a komperensia ti Ti Simbaan ni Jesucristo dagiti Santo iti Ud-udina nga Aldaw. Daytoy ti Simbaanna. Awatentayo ti naganna no sumrektayo iti pagarianna. Isu ti Dios, ti Namarsua, ken awan pagkuranganna. Mortaltayo a makapadas iti ipapatay ken panagbasol. Ngem gapu iti panagayatna kadatayo ken kadagiti pamiliatayo, awisennatayo nga umasideg Kenkuana. Dagitoy dagiti balikasna: “Umasidegkayo kaniak ket umasidegakto kadakayo; sapulendak a sireregta ket masapulandakto; agdawatkayo, ket umawatkayonto; agtuktokkayo ket malukatankayto.”1
Iti daytoy a panawen ti Paskua ti Panagungar napalagipantayo maipanggep no apay nga ay-ayatentayo Isuna ken maipanggep iti karina kadagiti napudno a disipulona nga aramidenna ida nga ipatpategna a gagayyem. Inaramid ti Mangisalakan dayta a kari ken imbagana kadatayo no kasano nga umasideg Isuna kadatayo no agserserbitayo Kenkuana. Maysa a pagarigan ti maysa a paltiing ken ni Oliver Cowdery idi nagserbi isuna iti Apo a kaduana ni Propeta Joseph Smith iti pannakaipatarus ti Libro ni Mormon: “Adtoy, sika ni Oliver, ket nagsaoak kenka gapu iti tarigagaymo; ngarud italimengmo dagitoy a balikas iti pusom. Agtalinaedka a napudno ken naregget iti panagtungpalmo kadagiti bilin ti Dios, ket yarakupko kenka dagiti takiag ti ayatko.”2
Napadasak ti rag-o ti panagbalin a naas-asideg iti Mangisalakan ken ti panagbalinna a naas-asideg kaniak a kanayon babaen dagiti simple a panagtungpal kadagiti bilin.
Naaddaankayon kadagiti kasta a padas. Mabalin a naaramid daytoy idi piniliyo ti dumar-ay iti miting ti sakramento. Napadasak daytoy iti aldaw ti Sabbath idi ubingak pay. Kadagidiay a panawen inangaymi ti sakramento iti pangrabii a miting. Ti lagip ti maysa nga aldaw 65 a tawen ti napalabasen, idi tinungpalko ti bilin a mangtipon iti pamiliak ken dagiti Santo, ket mangyas-asideg pay laeng kaniak iti Mangisalakan.
Nasipnget ket nalam-ek iti ruar. Malagipko a kasla nalawag ken nabara iti uneg ti kapilia iti dayta a rabii a kaduak dagiti nagannak kaniak. Nakiranudkami iti sakramento, nga inannong dagiti Aaronic Priesthood holder, a nakitulag iti Nailangitan nga Amami a kanayon a manglaglagip iti Anakna ken agtungpal kadagiti bilinna.
Iti gibus ti miting kinantami ti himno nga “Abide with Me; ’Tis Eventide,” nga addaan kadagiti balikas ti “O Savior, stay this night with me.”3
Nariknak ti ayat ken ti kinaasidegko iti Mangisalakan iti dayta a rabii. Ken nariknak ti liwliwa ti Espiritu Santo.
Kayatko a sadiwaen manen ti nariknak nga ayat ti Mangisalakan ken ti kinaasidegko Kenkuana kabayatan ti miting ti sakramento idi agtutuboak pay. Isu nga itay kallabes tinungpalko ti sabali pay a bilin. Nagsukisokak kadagiti nasantuan a kasuratan. Kadagitoy, ammok a maiparikna manen kaniak ti Espiritu Santo ti narikna ti dua a disipulo ti nagungar nga Apo idi inawatna ti awisda a sumrek iti pagtaenganda ken agtalinaed kadakuada.
Binasak maipapan ti maikatlo nga aldaw kalpasan ti Pannakailansana iti krus ken itatanemna. Nasarakan dagiti napudno a babbai ken dadduma pay ti naipatulid a bato a nangkalub iti tanem ket nakitada nga awanen ti bagina sadiay. Gapu iti ayatda Kenkuana, napanda idiay tapno sapsapuanda ti bagina iti bangbanglo.
Dinamag ti dua nga anghel nga adda idiay no apay a mabutengda, a kunkunana:
“Apay apay sapulenyo kadagiti natay ti sibibag?
“Awan ditoy, no di ket nagungaren: laglagipenyo ti insaona kadakayo idi adda pay laeng idiay Galilea,
“A kunkunana, Masapul a ti Anak ti tao mayawat kadagiti ima dagiti tao, a managbasol, ken mailansa iti krus, ken agungar iti maikatlo nga aldaw.”4
Inayon ti Ebanghelio ni Marcos ti pangiturong manipud iti maysa kadagiti anghel: “Ngem inkayo, ibagayo kadagiti adalanna ken ni Pedro a mapan iti masanguananyo idiay Galilea: isu makitayonto idiay, kas imbagana kadakayo.”5
Nagguummong dagiti Apostol ken disipulo iti Jerusalem. Nalabit a kas met kadatayo, nagbuteng ken nasdaawda bayat ti panagsasaritada maipapan iti no ania ti kaipapanan kadakuada ti patay ken ti damag maipapan iti panagungarna.
Dua kadagiti disipulo ti nagna iti dayta a malem manipud iti Jerusalem iti dalan nga agturong iti Emaus. Nagparang ti nagungar a Cristo iti dalan ket nakipagna kadakuada. Napan kadakuada ti Apo.
Ti libro ni Lucas ti mangipalubos kadatayo a makipagna kadakuada:
“Ket naaramid, nga idi agsasaoda ken agsisinnaludsodda, ni Jesus met laeng immasideg, ket nakikuyog kadakuada.
“Ngem dagiti matada nakullaapanda, tapno isu dida mailasin.
“Ket kinunana kadakuada, Ania a sarsarita dagitoy a sasawenyo iti maysa ken maysa iti panpannagnayo? Ket nagsardengda a sililiday.
“Ket simmungbat ti maysa a managan Cleofas, ket kinunana kenkuana, Siksika laeng ti sangsangaili idiay Jerusalem, a dika ammo dagiti banag a naaramid sadiay kadagitoy nga aldaw?”6
Imbagada Kenkuana ti panagladingitda iti ipapatay ni Jesus idinto a ninamnamada nga Isunto ti agbalin a Mannubbot ti Israel.
Awan duadua nga adda panangisakit ti timek ti nangungar nga Apo bayat ti pannakisaona kadagitoy dua a malidlidayan ken agladladingit a disipulo:
“Ket kinunana kadakuada, O nakuneng a tattao ken naladaw ti panagpuspusoyo a mamati kadagiti amin a sinao dagiti mammadto:
“Saan aya a manipud idi a ni Cristo lak-amenna dagitoy a banag, ken sumrek iti gloriana?
“Ket idinto a rugianna manipud ken Moises ken dagiti isu amin a mammadto, impalawagna kadakuada dagiti amin a sursurat a mangsarita iti maipapan kenkuana.”7
Kalpasanna dimteng ti kanito a nangparagsak iti pusok manipud pay idi ubingak:
“Ket immasidegda iti purok a papananda: ket isu impakitana a kasla mapan iti ad-adayo.
“Ngem isuda inggawidda a kinunada, Agbatika kadakami: ta rumabiin ket lumabes ti horasen. Ket isu simrek a nagbati kadakuada.”8
Inawat ti Mangisalakan dayta a rabii ti awis a sumrek iti balay dagiti disipulona iti asideg ti purok ti Emaus.
Nakilanglang a nangan kadakuada. Nangala iti tinapay, binendisionanna, pinisina, ket intedna daytoy kadakuada. Naluktan dagiti matada tapno maam-ammoda Isuna. Kalpasanna nagawan Isuna iti imatangda. Insurat ni Lucas para kadatayo dagiti rikna dagita a nagasat a disipulo: “Ket kinunada iti maysa ken maysa, Saan aya a rumayrayray ti pusota iti unegta, itay madama nga agsasao iti dalan ket itay ilawlawagna kadata dagiti sursurat?”9
Iti dayta met la nga oras, nagdardaras ti dua a disipulo a nagsubli iti Jerusalem tapno ipakaammoda iti sangapulo-ket-maysa nga Apostol no ania ti napasamak kadakuada. Iti dayta a kanito nagpakita manen ti Mangisalakan kadakuada.
Imbagana manen dagiti padto maipapan iti misionna a mangsubbot kadagiti basbasol ti amin nga annak ti Amana ken tapno warwarenna dagiti pamungo ni patay.
“Ket kinunana kadakuada, Kasta ti adda a naisurat ken masapul a ti Cristo agsagaba, ken agungar kadagiti natay iti maikatlo nga aldaw:
“Ket maikaskasaba ti naganna ti panagbabawi ken ti pannakasubbot dagiti basbasol kadagiti isu amin a nasnasion, a nangrugi iti Jerusalem.
“Ket dakayo ti makasaksi kadagitoy a banag.”10
Maitutop met dagiti balikas ti Mangisalakan kadatayo kas kadagiti disipulona idi. Datayo ti saksi kadagitoy a banag. Ken ti nagloriaan a bilin nga inawattayo idi nabuniagantayo iti Ti Simbaan ni Jesucristo dagiti Santo iti Ud-udina nga Aldaw ket inlawlawag ni propeta Alma adun a siglo ti naglabas kadagiti danum ti Mormon:
“Ket napasamak a kinunana kadakuada: Adtoy addagitoy dagiti danum ti Mormon (gapu ta kastoy ti pannakaawagda) ket ita, gapu iti tarigagayyo nga umay iti salinong ti Dios, ken maawagan a tattaona, ken siaayat a makipagbaklay iti imet ti tunggal maysa, tapno lumag-anda;
“Wen, ken siaayat a makipagladingit kadagiti agladladingit; wen, ken manglinglingay kadagiti makasapul iti pannakalinglingay, ken agtakder a saksi ti Dios iti amin a kanito ken iti amin a banag, ken iti amin a lugar a yanyo, uray pay agingga ken patay, tapno masubbotnakayo ti Dios, ket maibilangkayonto kadagiti adda iti umuna a panagungar, tapno maaddaankayo iti agnanayon a biag—
“Ita kunak kadakayo, No daytoy ti tarigagay ti puspusoyo, ania ti pamkuatanyo a di agpabuniag iti nagan ti Apo, a kas saksina iti pannakitulagyo kenkuana, nga agpaaykayo kenkuana ken salimetmetanyo dagiti bilinna, tapno nabusbuslon ti panangiburayna iti Espirituna kadakayo?
“Ket ita idi nangngeg dagiti tao dagitoy a balikas, nagsisipatda gapu iti rag-o, ket kinunada: Daytoy ti tarigagay ti puspusomi.”11
Nakitulagtayo a tulongantayo dagiti agkasapulan ken agbalintayo a saksi ti Mangisalakan agingga a sibibiagtayo.
Kabaelantayto laeng nga aramiden daytoy a di mangliway no ay-ayatentayo ti Mangisalakan ken mariknatayo nga ay-ayatennatayo. No napudnotayo kadagiti kari nga inaramidtayo, mariknatayo ti ayattayo para Kenkuana. Manayonanto daytoy gapu ta mariknatayto ti bilegna ken ti yaasidegna kadatayo no agserbitayo Kenkuana.
Masansan nga impalagip kadatayo ni Presidente Thomas S. Monson maipapan iti kari ti Apo kadagiti napudno a disipulona: “Ket asino man a mangawat kadakayo, addaakto met sadiay, ta addaakto iti sangoyo. Addaakto iti makanawanyo ken iti makanigidyo, ket addanto ti Espirituk iti puspusoyo, ket likmutendakayonto dagiti anghelko, a mangtarabay kadakayo.”12
Adda sabali pay a wagas a nariknatayo nga umas-asideg Isuna kadatayo. No napudnotayo nga agserbi Kenkuana, ad-adda nga umasideg Isuna kadagiti ipatpategtayo iti pamiliatayo. Tunggal maawaganak nga agserbi iti Apo iti adayo a lugar wenno kasapulan a panawak ti pamiliak, makitkitak a parparaburan ti Apo ti asawak ken dagiti annakko. Insaganana dagiti managayat a katulonganna ken mangmangted kadagiti gundaway tapno ad-adda a mayasideg ti pamiliak Kenkuana.
Nariknayo metten dayta a bendision iti biagyo. Adu kadakayo ti addaan kadagiti ipatpateg iti biag nga umad-adayo iti dalan nga agturong iti agnanayon a biag. Pampanunotenyo no ania pay ti maaramidyo tapno mapasubliyo ida. Makanamnamakayo nga ad-adda a mayasideg ti Apo kadakuada no agserbikayo Kenkuana a sipapammati.
Laglagipenyo ti kari ti Apo kada Joseph Smith and Sidney Rigdon idi nayadayoda kadagiti pamiliada iti panagserbida Kenkuana: “Gagayyemko a Sidney ken Joseph, naimbag dagiti kaamaanyo; addada kadagiti imak, ket tulongak ida no namnamaek a nasayaat; ta adda kaniak ti amin a bileg.”13
Kas kada Alma ken Ari Mosiah, sumagmamano a napudno a nagannak ti napaut a nagserbi iti Apo ngem addaanda kadagiti annak a nayaw-awan iti dalanda iti baet ti panagsakripisio dagiti nagannak kadakuada para iti Apo. Inaramidda ti amin a kabaelanda ngem awan ti napasamak, uray no timmulong dagiti managayat ken napupudno a gagayyem.
Inkararagan idi ni Alma ken dagiti Santo ti anakna a lalaki ken dagiti annak a lallaki ni Ari Mosiah. Dimteng ti maysa nga anghel. Dagiti kararagyo ken dagiti kararag dagiti addaan iti pammati ti mangisangbayto kadagiti katulongan ti Apo a mangtulong kadagiti miembro ti pamiliayo. Tulongandanto ida a pumili iti dalan nga agsubli iti taeng ti Dios, uray no sulsulisogen ida ni Satanas ken dagiti pasurotna, a ti panggepna ket mangdadael kadagiti pamilia ditoy a biag ken iti kinaagnanayon.
Laglagipenyo dagiti balikas nga insao ti anghel ken ni Alma nga Ub-ubing ken kadagiti annak a lallaki ni Mosiah iti panagalsada: “Ket manen, kinuna ti anghel: Adtoy, nangngeg ti Apo ti kararag dagiti taona, kasta met ti kararag ti katulonganna, ni Alma, nga isu ti amam; ta nagkararag a napnuan iti pammati maipanggep kenka ta maidanon koma kenka ti pannakaammo iti pudno; ngarud, daytoy ti gapu nga immayak tapno allukoyenka iti bileg ken turay ti Dios, tapno masungbatan ti karkararag dagiti katulonganna a maibatay iti pammatida.”14
Dakayo nga agkarkararag ken agserserbi iti Apo diak maikari kadakayo a magun-odyonto ti tunggal parabur a mabalin a tarigagayanyo para kadakayo ken iti pamiliayo. Ngem maikarik kadakayo nga ad-addanto nga umasideg ti Mangisalakan kadakayo ket paraburannakayto ken ti pamiliayo iti ammona a kasayaatan para kadakayo. Magin-awaankayto iti ayatna ket mariknayo ti dawdawatenyo a yaasidegna no tumultulongkayo iti panagserbi kadagiti dadduma. No tumultulongkayo kadagiti agkasapulan ken mangidiaya iti pangpatarnaw ti Pannubbotna kadagiti agladladingit iti basol, papigsaennakayto ti bileg ti Apo. Nakaunnat dagiti takiagna tapno makaduanakayo iti panangtulong ken panagbendisionyo kadagiti annak ti Nailangitan nga Amayo, agraman kadagiti miembro ti pamiliayo.
Adda nadayag a panangsabat a naisagana para iti panagawidtayo. Kalpasanna makitatayto ti pannakaipatungpal ti kari ti Apo nga inayattayo. Isu ti umawat kadatayo nga agturong iti agnanayon a biag a kadenna Isuna ken ti Nailangitan nga Amatayo. Inladawan ni Jesucristo daytoy iti kastoy:
“Ikalikagummo a yeg ken ipasdek ti pagsayaatan ti Zionko. Tungpalem dagiti bilinko iti amin a banag.
“Ket no tungpalem dagiti bilinko ken agibturka agingga iti panungpalan maaddaanka iti agnanayon a biag, a sagut a kapatgan iti amin a sagut ti Dios.”15
“Ta isuda nga agbiag tawidendanto ti daga, ket isuda a matay aginanadanto iti amin a trabahoda, ket sumarunonto kadakuada ti bunga dagiti aramidda; ket umawatdanto iti korona kadagiti mansion ti Amak, nga insaganak a para kadakuada.”16
Paneknekak a babaen ti Espiritu masurottayo ti awis ti Nailangitan nga Ama: “Daytoy ti Ay-ayatek nga Anakko. Dumngegka Kenkuana!”17
Babaen kadagiti balikas ken pagwadanna, impakita ni Cristo kadatayo no kasano nga umas-asidegtayo Kenkuana. Tunggal anak ti Nailangitan nga Ama a nangpili a sumrek iti ridaw ti panagbuniag iti Simbaanna ket maaddaanto iti gundaway ditoy a biag a masuruan iti ebangheliona ken mangngegan kadagiti naawagan a katulonganna ti awisna, “Umaykayo kaniak.”18
Tunggal nakitulag a katulonganna iti uneg ti pagarianna iti daga ken iti lubong ti espiritu ket umawatto iti pannarabayna babaen ti Espiritu bayat ti panangbendision ken panagserbida kadagiti dadduma para Kenkuana. Ket mariknadanto ti ayatna ken masarakandanto ti rag-o iti panagbalin nga as-asideg Kenkuana.
Maysaak a saksi ti Panagungar ti Apo a kasla addaak idiay iti dayta a rabii a kaduak ti dua a disipulo iti balay iti dalan ti Emaus. Ammok a sibibiag Isuna kas iti ammo ni Joseph Smith idi nakitana ti Ama ken ti Anak iti lawag ti naraniag nga agsapa iti kakaywan iti Palmyra.
Daytoy ti pudno a Simbaan ni Jesucristo. Kadagiti laeng tulbek ti priesthood nga ik-ikutan ni Presidente Thomas S. Monson nga adda bileg a mailantip kadagiti pamilia tapno agnanayon nga agbiag a kadennatayo ti Nailangitaan nga Amatayo ken ni Jesucristo. Iti Aldaw ti Panangukom agtakdertayonto iti sanguanan ti Mangisalakan. Daytoyto ti panawen ti rag-o kadagiti immasideg Kenkuana babaen ti panagserbida Kenkuana ditoy a biag. Rag-onto a mangngegan dagiti balikas: “Naimbag, adipen a nalaing ken mapagtalkan.”19 Daytoy ti pammaneknekko kas maysa a saksi ti nagungar a Mangisalakan ken Mannubbottayo iti nagan ni Jesucristo, amen.
© 2013 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/12. Pannakaanamongna a maipatarus: 6/12. Pannaakaipatarus ti Visiting Teaching Message, May 2013. Ilokano. 10665 864