Mensahe ti Umuna a Panguluen, Mayo 2013
Ti Panagtungpal ket Mangisangbay kadagiti Parabur
Umay kadatayo ti pannakaammo iti kinapudno ken dagiti sungbat kadagiti kangrunaan a saludsodtayo no managtungpaltayo kadagiti bilin ti Dios.
Ay-ayatek a kakabsatko, agyamanak ta makaduakayo ita a bigat. Kalikagumak ti pammati ken karkararagyo bayat ti panangpatganko iti daytoy a pribilehio nga agsarita kadakayo.
Iti amin a panawen, nagsapsapul dagiti lallaki ken babbai iti pannakaammo ken pannakaawat maipanggep iti daytoy a mortal a panagbiag ken ti kasasaad ken panggepda ditoy, kasta met no kasano a maaddaan iti talna ken ragsak. Kapaset ti tunggal maysa kadatayo ti kasta a panagsapsapul.
Mabalin a gun-oden ti amin a sangkataw-an daytoy a pannakaammo ken pannakaawat. Nailaonda kadagiti kinapudno nga awan inggana. Iti Doktrina ken Katulagan benneg 1, bersikulo 39, mabasatayo, “Adtoy ket imutektekanyo, ti Dios ti Apo, ket ipakita ti Espiritu ti kasuratan, ket pudno ti sinurat, ket agtalinaed ti kinapudno iti agnanayon nga awan inggana.”
Insurat ti mannaniw:
Mapukaw man wenno madadael ti amin a banag iti langit ken daga,
Ti kinapudno, ti kadagupan ti biag, ket maandurannanto ti kakaruan a pasamak,
Agnanayon, saan nga agbalbaliw, awan patinggana.1
Adda dagiti agsaludsod, “Sadino ti pakasarakan ti kasta a kinapudno, ken kasano a mailasintayo daytoy?” Iti maysa a paltiing a naited babaen ken ni Propeta Joseph Smith iti Kirtland, Ohio, idi Mayo ti 1833, impakdaar ti Apo:
“Kinapudno ti pannakaammo kadagiti banag a kas iti kasasaadda ita, ken kasasaadda idi, ken kasasaadda iti masakbayan. …
“Nagtaud iti Dios ti Espiritu. …
“Ket awan ti tao nga umawat iti pakabuklan malaksid no tungtungpalenna dagiti bilinna.
“Isu a mangtungtungpal kadagiti bilin ti [Dios] umawat iti kinapudno ken silaw, agingga a maitan-ok iti kinapudno ken maammuanna amin a banag.”2
Nagloriaan a kari daytoy! “Isu a mangtungtungpal kadagiti bilin ti [Dios] umawat iti kinapudno ken silaw, agingga a maitan-ok iti kinapudno ken maammuanna amin a banag.”
Saanen a kasapulan kadatayo iti daytoy a panawen nga aduantayo iti pannakaammo, gapu ta naisublin ti pakabuklan ti ebanghelio, tapno aglayagtayo kadagiti baybay wenno agdaliasattayo kadagiti kalsada a saan pay a napagnaan tapno sapulentayo ti kinapudno. Gapu ta ti managayat a Nailangitan nga Ama ti nagplano iti dalantayo a daliasaten ket impaayna ti saan a mapagduaduaan a pangiwanwan—a daytoy ti panagtungpal. Umay kadatayo ti pannakaammo iti kinapudno ken dagiti sungbat kadagiti kangrunaan a saludsodtayo no managtungpaltayo kadagiti bilin ti Dios.
Masursurotayo ti panagtungpal iti unos ti panagbiagtayo. Nangrugi idi ubbingtayo pay, dagiti addaan pagrebbengan a mangaywan kadatayo ket nangitudingda kadagiti pangiwanwan ken annuroten tapno masigurado ti talgedtayo. Nalaklaka ti panagbiag para iti amin kadatayo no naan-anay a tungpalentayo dagita nga annuroten. Nupay kasta, adu kadatayo babaen ti padas ti masursuruan iti sirib a magun-od iti panagtungpal.
Idi dumakdakkelak, tunggal kalgaw manipud kadagiti umuna nga aldaw ti Hulio agingga kadagiti umuna nga aldaw ti Septiembre, nagtalinaed ti pamiliak iti balaymi iti Vivian Park iti Provo Canyon iti Utah.
Maysa kadagiti kasingedan a gayyemko kadagita a nararagsak a panawen ket ni Danny Larsen, a ti pamiliana ket akinkukua pay iti maysa a balay iti Vivian Park. Inaldaw a lawlawenmi daytoy a lugar, agalakami iti ikan iti waig ken iti karayan, agkolektakami kadagiti dadakkel a bato ken dadduma pay a napapateg a banag, magnakami, agulikami, ken agragsakkami iti tunggal minuto ti tunggal oras ti inaldaw.
Maysa a bigat, inkeddengmi ken ni Danny nga agaramid iti campfire iti dayta a sardam a kaduami ti amin a gagayyemmi idiay. Kasapulanmi laeng a dalusan ti lugar nga asideg iti talon a mabalin a pagtitiponanmi. Nalaylayen ken nasiit dagiti ruot iti Hunio a nagtubo iti kataltalonan, isu a saan a mayannatup daytoy kadagiti panggepmi. Rinugianmi a paruten dagiti natatayag a ruot, a planplanuenmi a dalusan ti nalawa, patimbukel a paset daytoy. Nagparutkami iti amin a pigsami, ngem bassit laeng ti naparutmi kadagiti natitibker a ruot. Ammomi nga agmalmalem nga aramidenmi daytoy a trabaho, ken nabannogkamin ken awanen ti ganasmi nga agparut pay.
Ket kalpasanna dimteng ti walo-ti-tawen a panunotko ti impagarupko a kapintasan a solusion. Kinunak ken ni Danny, “Kasapulanta laeng a puoran dagitoy a ruot. Inta laengpuoran ti tengnga ti karuotan!” Dagus nga immanamong, ket timmarayak a napan iti balaymi tapno mangalaak iti posporo.
Amangan ta panunotenyo a palubosandakami idi nga agusar iti posporo iti edadmi a walo, kayatko nga ilawlawag a maiparit idi kadakami ken ni Danny nga agusar iti posporo no awan ti nakabantay kadakami a nataengan. Agpadakami a nadagdagullit a naballaagan maipapan kadagiti peggad a parnuayen ti apoy. Nupay kasta, ammok no sadino ti nangidulinan ti pamiliak iti posporo, ken kasapulan a madalusanmi dayta a karuotan. Diak nagpangngadua iti panunotko, timmarayak a napan iti balaymi ket nangalaak iti sumagmamano a palito ti posporo, a siniguradok nga awan ti asino man a nakakita kaniak. Nagdardarasak a nangilemmeng kadagitoy iti maysa kadagiti bolsak.
Nagtarayak a nagsubli ken ni Danny, naragsakak gapu ta addan kaniak iti bolsak ti solusion ti problemami. Nalagipko a pampanunotek idi a puoran laeng ti apoy ti kayatmi a mapuoran ket kalpasanna uray no kaskasano ket agiddepto lattan a mismo ti apoy.
Inkirasko ti posporo iti maysa a bato ket pinuorak ti nagango a karuotan iti Hunio. Gimmil-ayab daytoy a kas man la napatedtedan daytoy iti gasolina. Idi damo naragsakankami ken ni Danny bayat ti panangbuybuyami kadagiti maur-uramen a ruot, ngem dagus a naamirismi a saan a basta agiddep lattan ti apoy. Nagbutengkami idi maamirismi nga awan ti maaramidmi tapno maiddep daytoy. Rinugian nga uramen ti makadadael nga apoy dagiti atap a ruot agingga iti igid ti bantay, a pagpeggadan dagiti pine tree ken ti amin a madalapus daytoy.
Kamaudiananna awanen ti pagpilianmi no di ti tumaray tapno dumawat iti tulong. Di nagbayag nagtataray ti amin a lallaki ken babbai iti Vivian Park a nagsubli-subli nga iggemda dagiti nabasa a tela ti sako, a mangisapsaplit kadagiti apoy tapno maeddep dagitoy. Kalpasan ti sumagmamano nga oras, dagiti naudi a nabati pay a beggang ket naeddep. Naispal dagiti lallakayen a pine tree, kasta met dagiti pagtaengan a dumani koma dinanon ti apoy.
Nasursuromi ken ni Danny ti sumagmamano a narigat ngem napapateg a leksion iti dayta nga aldaw—ti dakkel a paset daytoy ket ti kinapateg ti panagtungpal.
Adda dagiti annuroten ken paglintegan a makatulong tapno masigurado ti pisikal a talgedtayo. Kasta met nga impaay ti Apo dagiti pangiwanwan ken bilin a makatulong a mangsigurado iti naespirituan a talgedtayo tapno naballigian a makapagdaliasattayo iti daytoy mortal a biag a masansan a napnuan iti peggad ken makapagsubli iti Nailangitan nga Amatayo iti kamaudiananna.
Sumagmamanon a siglo ti naglabas, iti maysa a kaputotan a naan-anay a nairarem iti kannawidan a panagisakripisio iti ayup, situtured nga impakdaar ni Samuel, “Ti panagtulnog naim-imbag ngem iti sakripisio, ken panangipangag ngem iti kinalukmeg dagiti karkarnero a lallaki.”3
Iti daytoy a dispensasion, impalgak ti Apo ken ni Propeta Joseph Smith a kasapulanna “ti puso ken ti natallugod a panunot; ken ti natallugod ken natulnog manganto iti nasayaat iti daga ti Zion kadagitoy maudi nga aldaw.”4
Naammuanen ti amin a propeta, idi ken ita, a napateg unay iti pannakaisalakantayo ti panagtungpal. Impakdaar ni Nephi, “Mapanak ket aramidek dagiti banag nga imbilin ti Apo.”5 Nupay sumagmamano ti kimmapuy iti pammati ken ti kinamanagtungpalda, saan a nagsukir uray iti naminsan ni Nephi a mangaramid iti imbilin ti Apo kenkuana. Adu a kaputotan ti naparaburanen kas bunga daytoy.
Ti pakasaritaan maipapan kada Abraham ken Isaac ket maysa a makaparegta nga estoria maipapan iti kinamanagtungpal. Mabalin a narigat ken nasakit para ken ni Abraham, iti panagtungpalna iti bilin ti Dios, nga ipan ti ipatpategna unay nga Isaac iti daga ti Moria tapno idatonna daytoy kas maysa a sakripisio. Mailadawantayo kadi ti panagladingit ni Abraham bayat ti ipapanna iti naituding a lugar? Awan duadua a ti nalaus a panagrigrigatna ket agpada iti bagi ken panunotna idi rineppetna ni Isaac, impaidda isuna iti altar, ken nangala iti kutsilio tapno patayenna daytoy. Addaan iti saan a mapagduaduaan a pammati ken naan-anay a panagtalekna iti Apo, tinungpalna ti bilin ti Apo. Anian a nagngayed ti panangipakaammo, ken nangted daytoy iti naan-anay a ragsak: “Saanmo nga idisso ta imam iti ubing, ket uray ania dika aramiden kenkuana: ta ita mabigbigko a mabutengka iti Dios, yantangay dika impaidam kaniak ti anakmo, ti bugbugtong nga anakmo.”6
Nasubok ni Abraham, ken gapu iti kinapudno ken kinamanagtungpalna inted kenkuana ti Apo daytoy nagloriaan a kari: “Iti putotmo mabendisionanto isu amin dagiti nasnasion; gapu ta tinungpalmo ti timekko.”7
Nupay saan a nakiddaw kadatayo a paneknekantayo ti panagtungpaltayo iti kasta a nalaus ken nasakit unay a wagas, ti kinamanagtungpal ket naidawat met kadatayo amin.
Impakdaar ni Presidente Joseph F. Smith idi Oktubre 1873, “Ti panagtungpal ket umuna a linteg ti langit.”8
Kinuna ni Presidente Gordon B. Hinckley, “Ti kinaragsak dagiti Santo iti Ud-udina nga Aldaw, ti talna dagiti Santo iti Ud-udina nga Aldaw, ti panagdur-as dagiti Santo iti Ud-udina nga Aldaw, ti panagrang-ay dagiti Santo iti Ud-udina nga Aldaw, ken ti agnanayon a pannakaisalakan ken pannakaitan-ok dagitoy a tao ken agpannuray iti panagtungpal kadagiti balakad ti … Dios.”9
Ti panagtungpal ket maysa a gagangay a kababalin dagiti propeta; daytoy ti nangted kadakuada iti pigsa ken pannakaammo iti amin a panawen. Napateg unay daytoy tapno maamiristayo a maikaritayo met iti daytoy a pagtaudan ti pigsa ken pannakaammo. Sidadaan a magun-od daytoy ti tunggal maysa kadatayo ita no agtungpaltayo kadagiti bilin ti Dios.
Kadagiti napalabas a tawen, adu dagiti naam-ammok a tattao a nagbalin a napudno ken natulnog. Pinaraburan ken pinaregtadak. Isaritak man kadakayo ti pakasaritaan ti dua kadagitoy a tattao.
Ni Walter Krause ket maysa a napudno a miembro ti Simbaan a, kaduana ti pamiliana, nagnaedda iti am-ammo itan nga East Germany kalpasan ti Maikadua a Gubat ti Lubong. Iti baet dagiti rigat a napasaranna gapu iti kinaawan wayawaya iti dayta a lugar ti lubong iti dayta a panawen, impateg ken pinagserbian ni Brother Krause ti Apo. Sipupudno ken sigaganetget nga impatungpalna ti tunggal naituding nga aramiden a naited kenkuana.
Ti sabali pay a lalaki, a ni Johann Denndorfer, maysa nga umili ti Hungary, ket nagbalin a miembro iti Simbaan iti Germany ken nabuniagan idiay idi 1911 iti edad a 17. Iti saan unay a nabayag kalpasanna nagsubli isuna iti Hungary. Kalpasan ti Maikadua a Gubat ti Lubong, nagbalin isuna a balud iti nakayanakanna a pagilian, iti siudad ti Debrecen. Naipaidam pay ti wayawaya manipud kadagiti umili ti Hungary.
Ni Brother Walter Krause, a di makaam-ammo ken ni Brother Denndorfer, ket nabilin nga agbalin a home teacherna ken mangsarungkar kenkuana a kanayon. Inawagan ni Brother Krause ti kompanionna iti home teaching ket kinunana kenkuana, “Nabilinta a mangsarungkar ken ni Brother Johann Denndorfer. Makakuyogka kadi kaniak iti daytoy a lawas a mangsarungkar kenkuana ken maited kenkuana ti mensahe ti ebanghelio?” Ket kalpasanna innayonna, “Agnanaed ni Brother Denndorfer iti Hungary.”
Sinaludsod ti nasdaaw a kompanionna, “Kaano a pumanawta?”
“Inton bigat,” insungbat ni Brother Krause.
“Kaanonto nga agawidta?” dinamag ti kompanion.
Insungbat ni Brother Krause, “Agarup makalawas—no makasublita la ketdi.”
Pimmanaw ti dua nga agkompanion iti home teaching tapno sarungkaranda ni Brother Denndorfer, nagluganda iti tren ken bus manipud iti amianan a daya ti lugar ti Germany a nagturong iti Debrecen, Hungary—maysa nga atiddog a panagbiahe. Awanan idi ni Brother Denndorfer kadagiti home teacher manipud pay idi kasakbayan ti gubat. Ita, idi nakitana dagitoy a katulongan ti Apo, addaan panagyaman a naragsakan unay isuna iti idadatengda. Idi damo nagkedked a makialamano kadakuada. Ngem ketdi, napan iti siledna ket innalana manipud iti bassit nga aparador ti maysa a kahon a naglaon iti apagkapullona nga inurnongna iti adu a tawen. Intedna ti apagkapullo kadagiti home teacherna ket kinunana, “Ita natungpalkon ti obligasionko nga agbayad iti apagkapullok iti Apo. Ita mariknak a maikariakon a makialamano kadagiti katulongan ti Apo!” Idi agangay imbaga kaniak ni Brother Krause a dina mailadawan ti nariknana no panunotenna a daytoy napudno a kabsat a lalaki, nga awan ti ania man a kontakna iti Simbaan iti uneg ti adu a tawen, ket situtulnog ken agtultuloy nga ik-ikkatenna ti 10 a porsiento ti bassit nga urnongna a pangbayadna iti apagkapullona. Inurnongna daytoy a saanna nga ammo no kaano wenno no maaddaan pay isuna iti gundaway a mangbayad iti daytoy.
Pimmusay ni Brother Walter Krause siam a tawenen ti napalabas iti edad a 94. Nagserbi a sipupudno ken situtulnog iti unos ti biagna ken nangted inspirasion kaniak ken iti amin a nakaam-ammo kenkuana. Idi nabilin a mangaramid kadagiti pagrebbenganna, di kaano man nagduadua, di kaano man nagdayengdeng, ken di kaano man nagpambar isuna.
Kakabsatko, ti panagtungpal ket dakkel a pannubok iti daytoy a biag. “Subokentayo ida babaen daytoy,” kinuna ti Apo, “ta kitaentayo no aramidenda amin a banag nga ibilin ti Apo a Diosda.”10
Impakdaar ti Mangisalakan, “Ta amin a maaddaanto iti bendision kadagiti imak agtungpaldanto iti paglintegan a naituding iti dayta a bendision, ken dagiti annuroten a nasao, kas nairugi pay la idi sakbay ti pannakabukel ti lubong.”11
Awanen ti nain-indaklan pay a pagwadan ti panagtungpal no di dayta impakita ti Mangisalakantayo. Maipapan kenkuana, napaliiw ni Pablo:
“Uray pay no isu ti Anak, idi naadalna ti panagtulnog gapu kadagiti bambanag a linak-amna;
“Ket idinto a naaramid nga awan pagkuranganna, nagbalin nga isu ti akin-aramid iti agnanayon a pannakaisalakan kadagiti isu amin nga agtulnog kenkuana.”12
Impakita ti Mangisalakan ti napudno nga ayat ti Dios babaen ti panagbiag a perpekto, babaen ti panangdayaw iti sagrado a mision nga Isu ti akinmision. Saan a kaano man nagkuspag Isuna. Saan a kaano man nagpannakkel Isuna. Saan a kaano man nanggulib Isuna. Kanayon a napakumbaba Isuna. Kanayon a napudno Isuna. Kanayon a natulnog Isuna.
Nupay Isu ket sinulisog dayta a maestro ti allilaw, nga isu ti sairo, nupay kimmapuy ti bagina manipud iti panagayuno iti 40 nga aldaw ken 40 a rabii ken kalpasanna nagbisin, ngem idi idiaya ti sairo ken ni Jesus ti kapalaluan a gakat ti panangallilaw ken panangsulisog, inikkannatayo iti nadiosan a pagwadan ti panagtungpal babaen ti panagkedked tapno maliklikan ti ammona nga umno.13
Idi naipasango Isuna iti panagsagaba iti Getsemani, a nagibturanna iti kasta a saem a “ti ling-etna ket kasla nabuslon a tedted ti dara a nagayus iti daga,”14 impagwadanna ti managtungpal nga Anak babaen ti panagkunana, “Ama, no pagayatam, yadayom kadi daytoy a kopa kaniak: nupay kasta saan koma a maaramid ti pagayatak, no di ti pagayatam.”15
Kas idi binilin ti Mangisalakan dagiti nagkauna nga Apostolna, kasta met a bilinennatayo, “Surotennak.”16 Sitatallugodtayo kadi nga agtungpal?
Ti pannakaammo a sapsapulentayo, dagiti sungbat a paggagarantayo, ken ti pigsa a tartarigagayantayo ita a sumango kadagiti karit ti nariribuk ken agbaliwbaliw a lubong ket matagikuatayo no sitatallugodtayo nga agtungpal kadagiti bilin ti Apo. Adawek manen dagiti balikas ti Apo: “Isu a mangtungtungpal kadagiti bilin ti [Dios] umawat iti kinapudno ken silaw, agingga a maitan-ok iti kinapudno ken maammuanna amin a banag.”17
Sipapakumbaba nga ikararagko a maparaburantayo koma iti nawadwad a naikari kadagiti natulnog wenno managtungpal. Iti nagan ni Jesucristo, ti Apo ken Mangisalakan, amen.
© 2013 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/12. Pannakaanamongna a maipatarus: 6/12. Pannakaipatarus ti First Presidency Message, May 2013. Ilokano. 10665 864