Pweng ke Forfor Luti, Mei 2013
“Fahsruh nuh Yuruk”
Ke kahs Lal ac srihkasrak Lal, Kraist El ahkkahlwemye nuh sesr ohiyac in fototoeni nuh Sel.
Nga kulohkihn in wi kowos ke toeni se inge luhn Alu luhn Jisus Kraist luhn Mwet Luhlahlfongi ke Lwen-sahflah. Pa inge Alu Lal uh. Kuht eis Inel nuh in kuht ke kuht ilyak nuh in tohkohsrahi Lal. El pa God, Mwet Orwaclah facluh se, ac fas. Kuht mwet ma kuh in misac ac oruh ma koluk. Tuh ke luhngse Lal nuh sesr ac sucu lasr uh, El suli kuht in fototo nuh Yohrohl. Pa inge kahs Lal uh: Fototome nuh Yuruk ac Nga fah fototowot nuh yurum; oaru in sukyuc ac kowos fah konweyucyak; siyuck, ac kowos fah eis; tongol, ac e fah ikacklah nuh suwos.1
Ke pacl in Istuh se inge, kuht ahkacsmakihnyeyuck lah efuh kuht luhngse El ac ke olwelah El oruh nuh sin mwet tuhma lutlut luhlahlfongi kuh Lal in oruh kawuck sacohk Lal. Mwet Lahngo El orwaclah olwelah sac ac fahk nuh sesr ohiyac uh, ke kuhlwacnsap lasr nuh Sel, El tuhkuh nuh yohrohsr. Sie mwe srihkasrak oasr ke fwackyuck se nuh sel Oliver Cowdery ke el kuhlwacnsapuh Leum in weluhl Mwet Pahluh Joseph Smith ke luhngasyacn Puk luhn Mormon: Liye Oliver, Nga sramsram nuh sum ke srihpen kena lom an; pwacnwacng eis kahs inge liyacacng ke insiyom. Oruh in luhlahlfongi kuh ac oaru in karihngihn masap luhn God ac Nga fah apihskowi in paho luhngse luhk uh.2
Nga puhlakihn engan ke tuhkuh fototo nuh yurin Mwet Lahngo ac ke tuhkuh fototo Lal nuh sihk ke mukwikwi srihsrihk ke ahkostwen nuh ke masap uh.
Oasr kain puhla se lowos. Ac kuh in ke kowos sulaclah in wi toeni ke kuhfa luhn Leum. Pa nuh sihk ke lwen Sahpuht ke nga tuh fuhsr ah. Ke pacl ingoh, kuht eis kuhfa luhn Leum ke miting in ekuh uh. Esamtwen ke lwen se ke yac 65 kuh puhs liki somlah ah, ke nga karuhnganwacng masap in wi sucu luhk ac Mwet Luhlahlfongi uh tuhkweni, nwe ke ahkfototoyeyuc nuh yurin Mwet Lahngo.
Lohsr ac ohu lukunum ac. Nga esam in puhla kahlwem ac fuhsrfuhsr lun lohm in alu sac ke ekuh sac wi pahpah ninac kiyuck ah. Kuht eis ke kuhfa luhn Leum, karihngihnyuck sin mwet sruok Aaronic Pristut, olweacng nuh sin Pahpah tuhmasr Inkuhsrao in esam Wen Nahtuhl ac karihngihn masap Lal pacl nuh kwewa.
Ke sahflahiyacn miting sac kuht yuck on in alu “Abide with Me; ’Tis Eventide,” ke kahs kac ah “O Savior, stay this night with me.”3
Nga puhla luhngse luhn Mwet Lahngo ac fototoyang ke ekuh sac. Ac nga puhla ahkwo luhn Nguhn Muhtahl.
Nga ke sifil fohlohkohnma puhla ke luhngse luhn Mwet Lahngo ac fototome Lal nga puhla ke miting in kuhfa luhn Leum sac ke pacl nga fuhsr we ah. Na nga karuhnganwacng pac sie masap. Nga suk ke ma suhmuhslah. Kac, nga etuh lah nga kuh in sifil fohlohk in eis Nguhn Muhtahl in lwelah ngan puhla ma mwet tuhma lutlut luo luhn Leum moulyak sac puhla ke El inseselac ke solsol lalos in tuhkuh nuh in lohm selos ac tuhkweni nuh yohrohlos.
Nga riti ke lwen ahktolu tukun Srihpsrihpyak ac puckpucki Lal. Muhtuhn luhlahlfongi kuh ac kuhtuh sahyac liyacack lah yot sac ipiplac liki luhf in kuclyuck sac ac liyacack lah Mahnol wacngihnlac we. Elos tuhkuh ke luhngse lalos nuh Sel in akmuhsrai Mahnol.
Lihpufacn luo tulac siskac ah ac siyuck lah efuh elos sahngweng, fahk muh:
“Efuh kowos kuh suk El suc moul inmahsrlon mwet misac?
“El tiac oasr inge, El ahkmoulyeyuckyak tari. Esam ma El tuh fahk nuh suwos ke muhta Galilee ah,
“Fahk muh, Wen nuhtin mwet El fah ituckyang nuh in poun mwet koluk, ac El ac fah acnwucki fin sahkseng soko, na tuhkuh lwen tolu El ac fah sifil moulyak.”4
Ke Wosasuc lal Mark el sang weacng srihsrsrihsr sin sie lihpufacn: “Som ac fahkwack nuh sin mwet tuhma lutlut ac Peter, lah el ac som meet liki kowos nuh Galilee, kowos ac fah liyacl we, oacna ke el fahk nuh suwos.”5
Mwet Sap ac mwet tuhma lutlut fahsrweni nuh Jerusalem. Sahp oacna kuht, elos sahngweng ac motko ke elos sramsram nuh sie ke kalmacn nuh selos misac sac ac sulkackihnyac lah El moulyak.
Luo sin mwet tuhma lutlut ah fahsr ke ekuh sac ke inkacnek soko Jerusalem lac nuh Emmaus. Kraist moulyak sac sikyang ke ekuh sac ke inkacnek soko ah ac weluhlos fahsr. Leum El tuhkuh nuh yohrohlos.
Puk lal Luk lwelah nuh sesr in weluhlos fahsr:
“Ac ke eltahl kahskahs ac asiyucki ke ma inge, Jisus sifacna El kihluckyang ac weluhltahl fahsr.
“Eltahl liyacl, tuhsruhk eltahl tiac na akihlacnuhl.
“Jisus El fahk nuh seltahl, Meac komtacl fahsr sruhmuhn an? Eltahl tuhkweni tui ac ngwetngwet in ahsor.
“Sie seltahl suc pahngpahng Cleopas el siyuck sel, Meac, kom muhkwena pa mwet muhtwacta se nuh Jerusalem, ma tiac etuh ke ma orek we ke lwen ekahsr somlah me?”6
Elos fahk nuh Sel ke ahsor lalos lah Jisus el misac ke elos luhlahlfongi muh El pa Mwet in Molwelah luhn Israel.
Ac kuh in oasr puhla ke puhsrwen Leum ahkmoulyeyuckyak sac ke El sramsram nuh sin mwet tuhma lutlut ahsor ac yok srah luo uh:
“Na Jisus El fahk nuh selos, Pwacyelah komtacl arulacna afohn! Efuh kuh pahtlac komtacl in luhlahlfongi ma nuh kwewa mwet pahluh ah fahk?
“Yac tiac enenweyuck tuh Kraist elan kweok ke ma inge, na el fah utyak nuh in wolacna Lal?
“Ac Jisus El ahkuhtweyac nuh seltahl ma fahk kacl in ma suhmuhslah nuh kwewa, muhtwacwacack ke puk lal Moses, fahsruh nuh ke ma sihmlac sin mwet pahluh nuh kwewa.”7
Na tuhkuh kihtin pacl ma ahkfucsrfucsrye insiyuck ke nga tuh kihtin tuhlihk mukul se ah:
“Ke eltahl apkuhran in sun siti srihsrihk se eltahl fahsr nuh we ah, Jisus El oruh oacna muh El ac fahlac na.
“Tuh elos ikolilyac ac fahk, Tari muhta yohrohsr, mweyen fongweni pa inge. Ohinge El utyak ac monglac yohrohltahl.”8
Mwet Lahngo El inseselac ke fong sac solsol se in ilyak nuh in lohm sin mwet tuhma lutlut Lal siskacn mura se Emmaus.
El pihtucki ac ohsun nuh yohrohlos. El eis fuhlao, ahkinsewowoyelah, kuhnsaclihk, ac sang nuh selos. Muhtahltahl ikackaclihk elos in muh Etwacl. Na El wacngihnlac luhkwelos. Luk el suhmuhslah nuh sesr puhla luhn mwet tuhma lutlut ahkinsewowoyeyuck ah: “Na elos fahk nuh sin sie sin sie, Yac insiyacsr tiac fucsrfucsryak ke engan, oacna sie e tayak in kuht, ke El sramsram nuh sesr inkacnek uh ac ahkuhtweyac nuh sesr ke ma suhmuhslah?”9
Ke ao sacpacna, mwet tuhma lutlut luo ah suhlahklahk fohlohk nuh Jerusalem in fahk nuh sin Mwet Sap singucul luo ah ma sikyak nuh selos ah. Ke puhlan pacl sac Mwet Lahngo El sifil pac sikyang.
El sifil fahk ke palye luhn misin Lal in iwe nuh ke ma koluk luhn tuhlihk nuh kwewa nuhtin Pahpah Tuhmwacl ac in kuhnahoslah kapihr luhn misac.
“Ac fahk nuh selos, Pa inge ma sihmlac uh: Kraist El ac fah kweok, ac El ac fah moulyak liki misac ke lwen ahktolu:
“Pweng ke auliyak ac nuhnak muhnahs ke ma koluk enenuh in lutiyuck in facl nuh kwewa, muhtwacwacack Jerusalem.
“Kowos mwet loh ke ma inge.”10
Kahs luhn Mwet Lahngo pwacye pac nuh sesr oacna nuh sin mwet tuhma lutlut Lal met ah. Kuht mwet lohoh ke ma inge. Ac sap wolacna kuht inseselac nuh kac ke kuht pacptaislac nuh ke Alu luhn Jisus Kraist luhn Mwet Luhlahlfongi ke Lwen-sahflah pa oreklac kahlwem nuh sesr sel mwet pahluh Alma foko nuh ke foko yac somlah ah ke kof luhn Mormon:
Alma el fahk nuh sin mwet lal suc ma oasr ke kof luhn Mormon (tuh pa inen acn sac) el kena in tuhkuh nuh yurin God ac in pahngpahng elos mwet Lal, ac insese in akacsruhi ke toasr luhn kais sie tuh elos in muhlahlahyak,
Ac inseselac in yok srah weluhlos suc yohk sra ac ahkwoyelos suc enenuh in ahkwoyeyuck, ac tulac in oruh mwet loh luhn God ke pacl nuh kwewa ac ke ma nuh kwewa, ac ke acn ma elos ac oasr we uh, finne ne ke misac, elos in muh kuh in moullac sin God, ac in weluhlosyang suc ke moulyak se emet, tuh in oasr moul ma pahtpaht lalos—
Alma el siyuck selos lah pa inge kena luhn insiyaclos, na efuh elos tiac pacptaislac ke Inen Leum in oacna mwet loh nuh Sel lah elos ilyak in oruh olweacng se nuh Sel tuh elos in kuhlwacnsapwacl ac karihngihn masap Lal Elan muh ukwiyac in yohk Nguhnal nuh yohrohlos.
Ke mwet ah lohng kahs ingoh elos pahspahslah ke engan ac tuhngiyac lah pa inge kena luhn insiyaclos.11
Kuht oasr ye olweacng kwewana in kahsruh ac ahkkweyaclos suc enenuh ac in mwet loh luhn Mwet Lahngo ke lusacn moul lasr uh.
Kuht ac kuh in oruh wo muhkwena ke kuht puhla luhngse nuh sin Mwet Lahngo ac luhngse Lal nuh sesr. Ke kuht luhlahlfongi kuh ke olwelah kuht orwaclah tari, kuht ac puhla luhngse lasr nuh Sel. Ac fah yohkwelihk ke srihpen kuht ac puhla kuh Lal ac fototome Lal ke kuht oruh kuhlwacnsap nuh Sel uh.
Prestuhn Thomas S. Monson el kwacna ahkacsmakihnye kuht ke olwelah luhn Leum nuh sin mwet tuhma lutlut luhlahlfongi kuh Lal lah elos suc eis mwet kuhlwacnsap Lal El ac oasr pac we, tuh El ac som nuh ye muhtahlos. El ac oasr ke lacyot ac lacsac lalos, ac Nguhn Lal fah oasr insiyaclos, ac lihpufacn fah raunweloslac, in sruhkuhlosyak, som nuh ye muhtahlos.”12
Oasr pac sie ohiyac ma nga kom puhla Elan fototo nuh yohrohsr. Ke kuht sang kuhlwacnsap oaru nuh Sel, El fototo nuh yohrohlos suc kuht luhngse in sucu lasr uh. Pacl nuh kwewa nga enenweyuck nuh ke kuhlwacnsap luhn Leum in mukwi nuh ke sie acn sahyac in muhta we kuh in som liki sucu luhk, nga liyacack lah Leum el ahkinsewowoye muhtwacn kiyuck ac tuhlihk nuhtihk. El ahkolah mwet kuhlwacnsap luhngse Lal ac pacl wowo in ahkfototoyelos sucu luhk uh nuh Yohrohl.
Kowos puhla kain insewowo sacna ke moul lowos. Puhs suwos oasr mwet kowos luhngse ma kuhflah liki inkacnek nuh ke moul ma pahtpaht. Kowos motko muh meac pac kowos kuh in oruh in usaclosme. Kowos kuh in luhlahlfongi ke Leum in fototoyang nuh yohrohlos ke kowos ac kuhlwacnsapwacl ke luhlahlfongi kuh.
Kowos esam olwelah luhn Leum nuh sel Joseph Smith ac Sidney Rigdon ke elos som liki sucu lalos ke sap Lal uh. Leum El fahk nuh sel Sidney ac Joseph, lah sucu lalos uh fokoko; elos oasr Inpacol, ac El ac oruh kaclos ma El sulaclah muh wo uh; tuh El kuhlacna.13
Oacna Alma ac Tohkohsrah Mosiah, kuhtuh suwos pahpah ninac luhlahlfongi kuh an kuhlwacnsapuh Leum ke pacl loeloes ac oasr na tuhlihk nahtuh ma kuhfkuhf finne pahpah ninac kiyaclos an kihsackihn nuh sin Leum. Elos orwaclah kwewa kuhiyaclos, ke wacngihn kahsrweyac, finne ke kahsruh sin mwet luhngse ac kawuck luhlahlfongiyuck.
Alma ac Mwet Luhlahlfongi ke pacl lal pruhe ke wen se nahtuhl ah ac wen nahtuhl Tohkohsrah Mosiah. Lihpufacn se tuhkuh. Pruhe lowos an ac pruhe lalos suc ahkpahye luhlahlfongi lalos fah use mwet kuhlwacnsap luhn Leum in kahsruh mwet ke sucu lowos an. Elos ac kahsrwelos sulaclah inkacnek in som nuh yen selos yurin God, finne ke elos lainyuck sin Setuhn ac mwet ukwacl uh, suc la srihpac in kuhnahoslah sucu ke moul se inge ac ke ma pahtpaht.
Nga esam kahs sruhmuhnyuck sin lihpufacn sac nuh sel Alma Fuhsr ac wen nahtuhl Mosiah ke lokoalok lalos: Lihpufacn sac fahk nuh sel Alma lah el tuhkuh nuh yohrohl ke srihpen Leum El lohng pruhe luhn mwet lal ac oacyacpac pruhe luhn mwet kuhlwacnsap lal, pahpah tuhmwacl Alma ah. Lihpufacn sac fahk lah pahpah tuhmwacl Alma ah pruhe ke luhlahlfongi yohk tuh Alma lacn kuh in fohlohkihnyuck nuh ke etuh se ke ma pwacye uh; pwacnwacng, ke srihpac se inge lihpufacn sac tuhkuh in kwacfel Alma ke kuh ac wal luhn God, lah pruhe luhn mwet kuhlwacnsap luhn Leum kuh in toplac oacna ke luhlahlfongi kuh lalos uh.14
Olwelah luhk nuh suwos suc pruhe ac kuhlwacnsapuh Leum tiac pa kowos ac eis insewowo nuh kwewa kowos kuh in finsrak nuh kac nuh suwos sifacna ac sucu lowos an ke ma wo emet. Tuhsruhk nga kuh in olwelah nuh suwos lah Mwet Lahngo El fah fototoeni nuh yuruwos ac ahkinsewowoye kowos ac sucu lowos an ke ma wo emet. Kowos ac eis ahkwo ke luhngse Lal ac puhla Lal lah El fototome in topuk pruhe lowos an ke kowos saplaklac in sang mwe insewowo nuh sin mwet sahyac. Ke kowos sang mwe kahsruh kuh kahsrwelos suc enenuh ac sang ahknwacsnwacslah ke Iwaclah Lal nuh selos suc puhla ahsor ke srihpen ma koluk, kuh luhn Leum fah ahkkweye kowos. Pahol orekwelihk wi pouwos in kahsruh ac ahkinsewowoye tuhlihk nuhtin Pahpah tuhmasr Inkuhsrao, weacng mwet ke sucu lowos an.
Oasr ahkolah wolacna se nuh ke tuhkuh nuh yen sesr uh. Na kuht ac fah liye olwelah luhn Leum ahkfalyeyucklac. El pa pain kuht nuh ke moul ma pahtpaht nuh Yohrohl ac Yurin Pahpah tuhmasr Inkuhsrao. Jisus Kraist El ahkuhtweyac ohinge:
Suk in use ac akiyac Saion Lal. Karihngihn masap Lal ke ma nuh kwewa.
Kuht fin karihngihn masap Lal uh ac kutong ne ke sahflah, ac oasr moul ma pahtpaht lasr, suc ma yohk liki mwe sang nuh kwewa luhn God.15
Nuh selos suc moul fah usrui facluh, ac selos suc misac fah monglac liki orekma lalos, ac orekma lalos fah weluhlos, ac elos ac eis kuhsra lalos ke lohm fuhlwact luhn Pahpah, suc Jisus Kraist El ahkolah nuh selos.16
Nga fahkwack lah kuht kuh ke Nguhn in ukwe solsol luhn Pahpah Lucng: Pa inge Wen Kuloh nuhtihk! Porongwacl!17
Ke kahs Lal ac mwe srihkasrak Lal, Kraist El ahkkahlwemye ohiyacn fototoyang nuh Yohrohl. Tuhlihk nuh kwewa nuhtin Pahpah Lucng suc sulaclah in ilyak ke motonwac ke pacptais nuh ke Alu Lal fah eis pacl wowo in lutiyuck ke wosasuc Lal ac in lohng sin mwet kuhlwacnsap pahngyak Lal ke solsol Lal “Fahsruh nuh yuruk.”18
Mwet kuhlwacnsap olweacng Lal nuh kwewa lun tohkohsrahi Lal fin facluh ac ke facluh luhn nguhn fah eis kolyuck Lal sin Nguhn ke elos ahkinsewowoye ac kuhlwacnsapuh mwet sahyac nuh Sel. Na elos ac puhla luhngse Lal ac sokwack engan ke fototoyang nuh Sel.
Nga sie mwet lohoh ke Moulyak luhn Leum oacna na pwacye nga in oasr we ke ekuh sac wi mwet tuhma lutlut luo ah lun lohm se ke inkacnek Emmaus ah. Nga etuh lah El moul oacna na pwacye Joseph Smith ke el liyacack Pahpah ac Wen ke kahlwem pihkapak ke sie lututacng ke un sahk Palmyra ah.
Pa inge Alu pwacye luhn Jisus Kraist uh. Ke ki luhn pristut sruokyuck sel Prestuhn Thomas S. Monson muhkwena pa kuh nuh sesr in siliyucki nuh ke sucu uh in moul ne tok yurin Pahpah tuhmasr Inkuhsrao ac Leum Jisus Kraist. Ke Lwen in Nuhnuhnkuh kuht ac fah tulac ye muhtuhn Mwet Lahngo, angwetwacni. Ac pacl in engan nuh selos suc fototoyang nuh Yohrohl ke kuhlwacnsap Lal ke moul se inge. Ac mwe engan se in lohng kahs uh: “Kom mwet kuhlwacnsap wo ac oaru, wona orekma lom.”19 Nga fahkwack na pwacye oacna sie mwet lohoh luhn Mwet Lahngo ahkmoulyeyuckyak sac ac Mwet in Molwelah lasr ke inen Jisus Kraist, amen.
© 2013 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/12. Ahkkweyeyucklac ke lweng: 6/12. Lwenglah luhn Visiting Teaching Message, May 2013. Kosraean. 10665 868