Etop Eke First Presidency, Ofiong Ition ke isua 2013
Nkopitem Esida mme Edidiong Edi
Nnyin idinyene ifiok akpaniko ye mme iboro kabanga ekese mbume nnyin nte nnyin inamde mme item mbet Abasi.
Ndima ndito eka iren ye iban, etim enem Mi esit ndidu ye mbufo usenubok emi. Ami mmoyom mbuotidem ye akam mbufo nte Ami nnyenede ufang nditing iko nno mbufo.
Totongo ke eyo oko, iren owo ye iban ekesiyom ifiok kabanga uwem isong emi ye itie mmo ye ntak emi mmo edude mi, nko ye usung ndinyene emem ye inemesit. Kpukpru nnyin kiet kiet imoyom usung ndungo oro.
Ifiok ye ndidiongo emi odu ono ofuri ubon owo. Mmo esine ke akpaniko emi edide nsinsi. Ke Doctrine ye Covenants akpa Ibuot, ufang Edip ye efutenang , nnyin Ikoot ite, “Sese, ndien nko, Jehovah edi Abasi, ndien Spirit edi ntiense, ndien se ewet enim edi akpaniko, ndien akpaniko oro odu ke nsinsi ye ke nsinsi.”
Andiwet uto ewet ete:
Ekpedi mme heavens adiangare ndien ikpa isong okubore obomo,
Akpaniko, ke oyoho ndaha esie, eyekan kpukpru se idiok,
Ada ke nsinsi, idikpuhoke, ke nsinsi.1
Mbio efen eyebup, “Idikut oruk akpaniko oro ke ebiet ewe, ndien idinam didie ifiok enye?” Ke eriyarare emi Joseph Smith okobode ke Kirtland, Ohio, ke Ofiong Ition ke isua 1833, Jehovah okofiori ete:
“Akpaniko edi ndifiok nte nkpo edide, ye nte nkpo nkpo ekedide, ye nte nkpo edidide. …
“Spirit akpaniko edi eke Abasi. …
“Ndien iduhe owo eke edibode oyoho akpaniko ke miboghoke enye enim mme Esie.
“Owo eke onimde mbet [Abasi] eyebo akpaniko ye unwana, tutu enye oyoho ke akpaniko onyung ofiok kpukpru nkpo.”2
Nso enwongo inem ntem! “Owo eke onimde mbet [Abasi] eyebo akpaniko ye unwana, tutu enye oyoho ke akpaniko onyung ofiok kpukpru nkpo.”
Ntak iduhe ino fi ye ami, ke uyama ini emi ema ekefiak eyak gospel eno edi, ndiyoyo usung mme ndisanga ke usung eke nnyin mifiokke nyom akpaniko. Edima Ete ke Heaven ama asiak usung nnyin enim onyung ono ndausung —kpa nkopitem. Nnyin idinyene ifiok akpaniko ye mme iboro kabanga ekese mbume nnyin nte nnyin inamde mme item mbet Abasi.
Nnyin imekpeb nkopitem ke ofuri eyo uwem nnyin. Totongo kini nnyin ikedide nditonwong, mbio emi ekesisede nnyin enyin ema eno ndausung ye mbet man nnyin ikut uboho. Uwem isong eyemem ono kpukpru nnyin edieke nnyin inamde ofuri mbet oro oyoho-oyoho. Ediwak nnyin, nte ededi, imebo ukpeb kabanga ifiok ndikop item.
Kini Ami nkedide eyenowong, kpukpru ini ndaeyo tongo ke ntongo Ofiong Itiaba tutu edisim ntongo Ofiong Usukkiet family mi ekesidu ke cabin nnyin ke Vivian Park ke Provo Canyon ke Utah.
Kiet ke otu mme akpan ufan mi kini uyen oro ekedi Danny Larsen, emi family esie ekenyenede cabin nko ke Vivian Park. Kpukpru usen Ami ye enye ima isisanga isang mkparawa, isin uwam ndimum iyak ke idim ye inyang, itang mkpri itiat ye ndiye mkpo eken, idok enyong, ndien ikop idem inem ke kpukpru ini.
Usenubok kiet Ami ye Danny ibiere ndinam campfire mbubreyo oro ye ofuri mme ufan nnyin do. Nnyin ikenyene nditem ebiet kiet ke mkpere anwa kiet emi nnyin idiboghde otokiet. Mbiet Ofiong Itiokiet emi okoyohode anwa oro ama asat onyung enyene nkukim, anam anwa oro ifonkke ye edinam nnyin. Nnyin ima itongo ndiwep nyan mbiet, idiomo nditem akamba ekaka-ekara ebiet. Nnyin ima inam ke ofuri ukeme nnyin, edi kpukpru se nnyin ikekemede ndinam ekedi ndiwep ata ekpri ndisong mbiet. Nnyin ima idiongo ete ke utom emi ekeme ndida ofuri usen kiet, ndien odudu ye udong nnyin ama otongo ndikure.
Ndien se Ami nkekerede nte edi ata eti usung ediduk ekpri ekikere mi. Ami ndoho Danny nte, “Kpukpru se nnyin idinainde edi ndisin ikang ke ofuri mbiet emi. Nnyin iyenam ikang ata mbiet emi ekara-ekara He ososop enyime, ndien Ami mfehe nka cabin nnyin man nkeda eto matches ifang.
Mbufo ekukere ete ke ema esiyak nnyin ikama matches ke idaha isua itiaita, Ami nyom ndinam anwanga ete ke ema ekpan Ami ye Danny ndikama matches ke miboghoke akamba owo ese nnyin enyin. Ema esikpan nnyin mbiba ediwak ini kabanga unomo ekesangade ye ikang. Nte ededi, Ami mma mfiok ebiet emi family mi esinimde matches, nko akana nte nnyin item anwa oro. Nkekere ke mkpo ndomo nte kiet, Ami mma mfehe nka cabin nnyin nnyung nda eto matehes ifang, nting enyin ndibe man owo ndomo kiet okukut mi. Ami nsosop idem ndip mmo ke ekpat ofong mi.
Mfiak mfehe ntiene Danny, ke inem nte ke Ami mmenyene iboro mforia nnyin ke ekpat ofong mi. Ami nditi nte nkerede nte ke ikang oro edita mbiet oro nte nnyin iyomde ndien ke eyenime ke idem esie.
Ami mma nkwat matches oro ke itiat nnyung nsin ikang ke nsat mbiet Ofiong Itiokiet oro. Ikang oro ama obumere ebiet nkpo emi ekesinde petrol. Ke akpa ama enem Ami ye Danny nte isede danga mme mbiet okure, edi nnyin idikut ete ke ikang oro idikemeke ndinime ke idem esie. Idem ama enyen nnyin kini ifiokde ete ke iduhe nkpo emi nnyin idinamde ndinime ikang oro. Mbumere edeme ikang otongo ata mme ikpo ikon odok obot, ekpere ndisim mme eto pine ye kpukpru nkpo eke ikang oro otukde.
Ke akpatre nnyin inyenede se ikpenamde akan ndifehe nyom unwam. Ibighike kpukpru iren owo ye iban emi ekedude ke Vivian Park efehe eka iso ye ndifiak edem emen ndedeng ekpat burlaps, emia edeme ikang man ekeme ndinime ikang oro. Ke ata ediwak hours ama ekebe ema ekeme ndinime ikang oro. Ema enyanga akani eto pine oro, ye mme ufok emi ikang oro ekpeketade.
Ami ye Danny ima ikpeb ediwak mkposong ye eti ukpeb usen oro —nte ekpekpride nte ededi kabanga ufon ndikop item.
Mme mbet ye ewuho odu ndinwam mkpeme nnyin man iboho ke ikpokidem. Nko, Jehovah ama ono ndansung ye mbet ndinwam mkpeme nnyin ndiboho ke spirit man otodo nnyin ikpekeme ndisanga ke uwem isong emi ndien mfiak nyong ntiene Ete nnyin ke Heaven.
Ata ediwak mme tosin isua emi ama ekebe, eketing eno ubon emi ekeyohode ye ido ndida unam nnam uwa, Samuel osongo ofiori ete, Nkopitem ofon akan uwa, ndien mkpang utong onyung ofon akan ikpok okukim erong.”3
Ke eyo emi, Jehovah akayara ono Prophet Joseph Smith ete ke imo iyom “esit ye ekikere eke enyimede; koro mme andinyime ye andinam item eyedia ufon isong eke Zion ke akpatre usen emi.”4
Kpukpru mme prophets, eke eset ye eke mfin emi, ema ediongo ete ke ndinam item edi ata akpan nkpo ono erinyanga nnyin. Nephi ofiori ete, “Ami nyeka nkenam mme nkpo eke Jehovah odongde ete enam.”5 Okposukedi mbio eken ema ekefum ke mbuotidem ye ndinam item, akananam Nephi itetreke ndinam se Jehovah okoyomde ete enye anam. Mme anana ibat ubon ebo edidiong ke ntak ndinam item.
Ata eti mbuk kabanga ndinam item edi mbuk eke Abraham ye Isaac. Ama otim abiak osong ono Abraham, ke ndinam item Abasi, ndida edima Isaac esie nka ke obot Moriah ndida enye nnam uwa. Nte nnyin imekeme ndikere udobi emi okodude ke esit Abraham kini enye asangade aka ebiet uwa oro? Ke akpaniko okposong ubiak ama omum enye onyung otuhode ekikere esie kini enye obopde Isaac, enim eyen ke okpokoro uwa, onyung ada ikwa ndisibe nwot enye. Ke mboutidem ye ke ata edinim Jehovah ke akpaniko, enye ama enyime ndinam item Jehovah. Etop oro ekenem didie, ndien edidi esie eketibe didie: “Kuda ubok fo utuk eyen oro, kunyung unam enye baba nkpo kiet: koro ke emi ke mfiok nte afo efefehe Abasi, afo unyung usinke mi eyen fo kierakiet.”6
Ema edomo Abraham ese, ndien Jehovah ama ono enye eti enwongo emi ke mboutidem ye nkop item esie ete: “Kpukpru mme idut ke ererimbot eyenyung ekut mfon eke otode ke ubon fo, koro afo ama okokop uyo mi.”7
Okposukedi owo imibupke ete nnyin inam item ke oruk okposong ye mbungo esit oro,eyom nkopitem eto kpukpru nnyin nko.
Predident Joseph F. Smith akasian ke Ofiong Duop isua 1873 ete ke: “Nkopitem edi akpa mbet ke heaven.”8
President Gordon B. Hinckley eting ete, “Inemesit eke mme Latter-day Saints, emem eke mme Latter-day saints, nkori eke mme Latter-day Saints, uforo eke mme Latter-day Saints, ye nsinsi erinyanga ye nkori ubong mbio emi okongo ke ndisanga nnim mme item …Abasi.”9
Nkopitem edi okpoiko ono mme prophet; oro ono mmo nsongonda ye ifiok totongo ke eset. Edi akpan-nkpo nnyin ndifiok ete ke nnyin, nko, imenyene unen ndibo oruk nsongonda ye ifiok emi. Emi odu ono kpukpru nnyin mfin emi nte nnyin inamde mme item Abasi.
Ke ofuri mme isua ekebede, Ami mmofiok ediwak mme owo emi esibuotde idem enyung enam item. Ami mmebo edidiong ye ndausung nto mmo. Yak Ami mbuana ye mbufo mbuk kiet kabanga oruk owo iba oro.
Walter Krause ekedi eti member ufok Abasi emi enye, ye family esie, ekedungde ke ebiet emi ekefiokde nte East Germany ke ema ekenwana Second World War ekure. Okposukedi nte enye okokutde ukut ye ntak unana itie eyen isong ke ebiet oro ke ini oro, Brother Krause ekedi owo emi akamade onyung anam nkpo ono Abasi. Eyen ama eting enyin anam ofuri utom emi ekedongde enye.
Eren owo efen, Johann Denndorfer, okoto Hungary, okoduk ufok Abasi ke Germany ndien ana baptism ke isua 1911 ke ini emi enye ekedide isua Efuteba. Ikebighike enye ama afiak onyong aka Hungary. Ke Second World War okurede, etie nte enye edi owo nkpokobi ke isong emana esie, ke obio Debrecen. Ema ebo mbio Hungary itie eyen isong.
Brother Walter Krause, emi mifiokke Brother Dendorfer, ama obo ikoot ndidi home teacher esie nnyung nsisanga nkese enye kpukpru ini. Brother Krause ama okot nsanga home teaching esie onyung odoho enye ete, Nnyin imenyene utom ndikise Brother Johann Danndorfer. Nte afo eyenyene ufang urua emi ndisanga ye ami man ikeno enye etop iko Abasi? Ndien enye adian do,”Brother Denndorfer odung ke Hungary.”
Nsanga esie obumere obup ete,”Nnyin ididaha ini ewe?
Mkpong,”ekedi iboro emi Brother Krause okonode.
“Ini ewe ke nnyin idifiak inyong ufok?” nsanga esie okobup.
Brother Krause okoboro ete, “Oh , ke ufang urua kiet —edieke nnyin idikemede ndifiak nnyong ndi.”
Mme nsanga home teaching mbiba emi ema edaha-eka ndikise Brother Dendorfer, esanga ke train ye bus tongo ke ebiet north-eastern Germany tutu edisim Debrecen , Hungary —ata anyan usung isang. Brother Denndorfer ikenyeneke home teachers mbemiso ekong oro okotongo. Ndien, kini enye okutde mme isungutom Abasi emi, enye okoyoho ye inemesit ekom nte mmo ekedide. Ke akpa enye ama esin ndikom mmo ubok. Edi, ebe oduk ubet ufok esie onyung ada ekpri ekebe emi esinde mme tithe esie emi enye okonimde ke ediwak isua. Enye ama ayak tithe emi ono home teachers esie onyung odoho ete, “Idahaemi Ami mmekeme ndisobo ye Abasi. Idahaemi Ami mmobot ndikom mme isungutom Abasi ubok!” Brother Krause eketing ono mi ete ke emi ama eyik imo etieti nte eti enyeneka emi, eke minyeneke ebuana ye ufok Abasi ke ediwak isua, okop item kpukpru ini osio ke ekpri okuk enye anwanade ekeme ndikpe tithe esie. Enye ama onim oro ikofiokke ini ye mme imo iyenyene ufang ndikpe tithe oro.
Brother Walter Krause ama akpa ke isua usukkiet emi ekebede ke osimde isua Anang ye Duopenang. Enye ama etim anam utom ke mboutidem ye nkopitem ke ofuri eyo uwem esie ndien ekedi uwutnkpo ono mi ye kpukpru mbio emi ekediongode enye. Kini edongde enye ete anam utom ufok Abasi, enye idibukpke mbume, enye iditohoke nko enye idifangake.
Ndito eka mi iren ye iban, akwa udomo ke uwem emi edi nkopitem. ” Nnyin iyedomo mmo ise”, Jehovah odoho, “ndise mme mmo eyenam kpukpru nkpo emi Jehovah Abasi mmo edisiande mmo.”10
Andinyanga okofiori ete, “Kpukpru mmo eke edibode edidiong ke ubok mi enyene ndinim mbet ekesangade ye edidiong oro, ye mme item ekedude ke esit, nte ekenimde totongo ke eritongo ererimbot.”11
Iduhe akwa uwutnkpo kabanga nkopitem ekedude akan eke Andinyanga nnyin. Ke oruk nkpopitem Esie, Paul ewet ete:
”Okposuk edi nte Enye edide Eyen, Enye ekpeb nsukibuot ofiok oto ke ndutoho eke enye okutde;
”Ndien ke ema ekenam Enye ofon ama, Enye akabara edi ntak nsinsi erinyanga ono kpukpru owo emi ekopde uyo Esie.”12
Andinyanga ama owut ata ima ono Abasi ke ndidu edisana uwem, ke ndinam edisana ibiong utom emi ekedide eke Esie. Akananam Enye ikowutde idem. Akananam Enye ikemenekede idem ye nkohore idem. Akananam Enye ikesongke ibuot. Kpukpru ini enye ama osuhore idem. Kpukpru ini enye ama anam akpaniko. Kpukpru ini enye ama okop item.
Okposuk edi nte ete nsu ama okodomo enye, kpa andidiok, okposuk edi nte idem ekememde enye oto ke nditre udia ke uwemeyo ye okoneyo Aba ndien okokop biong, ntre kini andidiok emende owut Jesus ata idiok idomo, enye ama ono nnyin nte uwutnkpo kabanga nkopitem ke ndisin ndinwongore mkpong nkpo emi enye okofiokde ete edi akpaniko.13
Kini enye okutde ufen ndutoho ke Gethsemane, emi enye okobode akwa ubiak tutu “ibibiak esie etie nte mme ntoi iyip eke etoide ke isong,”14 Enye owut nkopitem nte Eyen ke nditing nte, “Ete, edike Afo onyimede, men mi cup emifeb: edi okudi nte Ami nnyimede, yak edi nte Afo onyimede.”15
Ukem nte Andinyanga eketemede me mbet Esie ke eset, ukem oro ke Enye eteme afo ye ami, “Afo kam tiene mi.”16 Nte nnyin imebenge idem ndikop item?
Nnyin iyebo ifiok eke nnyin iyomde, iboro eke nnyin iyomde, ye osongo eke nnyin iyomde mfin emi ndinwana ye idiok ererimbot emi kini nnyin ibengeke idem inam mme item Abasi. Ami mfiak nting iko Abasi nte: “ Owo eke onimde mme mbet [Abasi] eyebo akpaniko ye unwana, tutu enye oyoho ke akpaniko onyung ofiok kpukpru nkpo.”17
Ami mbong akam nte nnyin ikpekam ibo edidiong ye nti utip emi ekenwongoke eno mme anam item. Ke enying Jesus Christ, Obong ye Andinyanga nnyin, amen.
© 2013 by Intellectual Reserve, Inc. Ekpeme kpukpru unen. Ekeming ke USA. Enyimme eming ke Iko Mbakara: 6/12 Enyimme Ndikabare: 6/12 Ndikabare eke First Presidency Message, May 2013. Efik. 10665 553