O Se Faamanuiaga o le Papatisoga
O le tusitala e nofo i Nevada, ISA.
O le alu i lalo o le vai e lagona ai lava e Trevor i taimi uma le popole. E mafai faapefea ona papatisoina o ia?
Sa saofai Trevor i luga o le nofoa ma tuu lona auvae i ona lima. Sa taaalo ona uso ma Tamamatua. Sa moomoo o ia ia mafai ona ia maua foi se taimi malie, ae sa le mafai ona taofi lona popole i lona papatisoga.
Sa saofai ane tina i ona autafa ma saveu lona ulu. “O le a se mea ua tupu?” na ia fesili ai. “E te le fia taalo?”
Sa lulu le ulu o Trevor, ma foliga faauu.
Sa tilotilo atu Tina ia te ia mo se taimi, ona ia opo mai lea o ia. “O lena e te fefe lava e alu i lalo o le vai?”
Sa luelue le ulu o Trevor.
O le manatu o le i ai i lalo o le vai sa fefe ai lava Trevor i taimi uma. A o tolu ona tausaga, sa pau ai o ia i totonu o se vaitaele. E le mafai ona galo ia te ia lona fefe tele a o ia magoto ifo i totonu o le vai, seia oo ina toso mai o ia i fafo e se tagata. Talu mai lava lena mea na fefe ai lava o ia i vai.
“Aisea ua leai ai se mea e lelei?” O le fesili lea a Trevor. “Sa matou tatalo, ma sa matou asiasi foi i le faatanoa. Sa leai se mea na aoga!” Sa oso ese Trevor mai le nofoa, ma tamoe i totonu o lona potu.
Sa ato e Trevor le faitotoa o le potumoe i ona tua, ma faapalasi i luga o lona moega. E le’i leva ae ona faalogoina se tu’itu’i malie i le faitotoa.
Sa tepa a’e Trevor a o saofai atu i lalo Tama i ona tafatafa. “Fai mai Tina o loo e popole lava i lou papatisoga,” o le tala lea a Tama.
Sa luelue le ulu o Trevor. “Sa ou tatalo lava, ae e le aluese le lagona o le fefe.”
Sa mafaufau Tama mo se minute. “O nisi taimi pe a tatou tatalo mo se mea, e le tupu i le taimi lava lena. Atonu e te lagona le fefe i le taimi nei, ae atonu o taeao o le a lelei ai ou lagona.”
Sa lūlū le ulu o Trevor, ona ia manatua ai lea o le taimi sa popole ai i le amataga o le aoga i le tausaga ua te’a. Sa tuu atu e Tama ia te ia se faamanuiaga. Atonu foi o se faamanuiaga e mafai ona fesoasoani ia te ia e papatiso ai. Sa tilotilo atu o ia ia Tama. “Mata e mafai ona oulua faia ma Tamamatua so’u faamanuiaga?”
Sa luelue le ulu o Tama. “Ou te iloa o se manatu lelei tele lena.”
O se taimi puupuu mulimuli ane, na saofai ai Trevor i se nofoa i totonu o le potu malolo. Sa tuu e Tama ma Tamamatua o laua lima i luga o lona ulu. Sa faamanuia o ia e Tama, ma fai mai afai e faatuatua o ia, o le a fesoasoani le Tama Faalelagi ia te ia e lagona le toamalie ma le toafilemu.
O le aso na sosoo ai a o saofai o ia i lona papatisoga ma ona lavalava papa’e, sa lagona lava e Trevor si ona popole laitiiti. Sa fiafia o ia ona sa fai sona faamanuiaga, ae faapefea pe afai e tumau lava lona fefe? E faapefea la ona papatisoina o ia?
Ina ua uma ona faalogo i se lauga e uiga i le papatisoga, sa faalagolago atu Tama. “Ua oo i le taimi e o atu ai i le faatanoa,” sa ia fai atu ai. Sa luelue le ulu o Trevor ma mulimuli atu ia Tama i le faatanoa. Sa alu muamua i totonu Tama.
Sa oo i le taimi o Trevor. Sa tau musu o ia, ona ia manatua ai lea o lona faamanuiaga. “Tama Faalelagi, faamolemole fesoasoani mai ia ou maua le faatuatua,” o lana tatalo leleoa lea ia te ia lava.
Sa tuutuu malie ae e Trevor lona vae e tasi i totonu o le vai. Sa manaia ma mafanafana. Sa toe laa atu Trevor.
O laa taitasi, sa ia lagona ai le te’a ese atu o lona popole ma le fefe. Sa tago atu Tama i lona lima ma ataata. “Sauni?”
Sa lagona e Trevor le toamalie ma le toafilemu. O le lagona lenei sa folafola atu e le Tama Faalelagi e tuu atu ia te ia. Sa lue lona ulu. “Sauni.”
Sa sii le lima taumatau o Tama ma fai le tatalo o le papatisoga. A o faatofu e Tama ia Trevor i lalo o le vai, sa le’i fefe o ia. Na pau lava le mea sa ia lagonaina o le faateteleina o le malosi o le lagona toafimalie, ma le toafilemu.
Sa aluese mai Trevor mai le vai ma se ataata. Sa ia iloa o lona faatuatua sa fesoasoani e faatoilalo ai lona fefe ina ia mafai ona papatiso o ia. Sa ia iloa o le a fesoasoani mai i taimi uma le Tama Faalelagi ia te ia a o taumafai o ia e filifili le mea sa’o.
Ata na tusia e Kevin Keele