O Le A Ou Le Toe Alu Lava i se Isi Siva
Wendy Van Noy, Ilinoi, ISA
I le matou itumalo o Chicago, Ilinoi, ISA, e itiiti ifo ma le 20 le autalavou a le Au Paia o Aso e Gata Ai e auai i se aoga maualuga pe a ma le 4,400 tamaiti aoga i ni lotoa eseese se lua. Sa ma fiafia i aoaoga sa maua e le ma atalii, ma e tele ni aiga lelei e i ai ni tulaga faatonuina maualuluga e nonofo i le matou eria.
I le tautotogo o le vasega 11 o le ma atalii, sa valaaulia ai o ia i se siva a le aoga. Sa ofu e lana paga se ofu manaia, ma tauagafau, ma sa matou naunau e faalogo pe na a mai le la afiafi. Ina ua sau o ia i le fale, sa ia faapea mai, “O le a ou le toe alu lava i se isi siva a le aoga!” Fai mai o ia sa faia e tamaiti aoga ni siva leaga, ae na leai se mea a taitai o le aoga sa faia e taofia ai. Sa matuai faateia lava au.
O a’u ou te faigaluega faavaitaimi i le itu o le aoga lenei, ma o ni aso se lua ina ua uma le siva sa ou sueina ai se sui puleaoga. O ia o se tamalii faamaoni, ma sa ou manatu o le a faalogo o ia i o’u atugaluga. Sa ia fautuaina ia ou tusi atu i puleaoga o le aoga maualuga.
Sa ou mafaufau ma le agaga tatalo i mea o le a ou fai atu ai ma filifili ai loa e ta’u atu i ai lo’u le fiafia i siva le talafeagai ma le leai o se mea na faia e taofi ai. Sa siitia maualuga le tulaga mo le atamai faaleaoaoga, aisea lava e le faia ai i gaoioiga uma?
Na te’a ni nai masina, ma sa ou faapea ua oo atu la’u tusi i ni taliga logonoa. Ae i se tasi aso, i le taimi o le lesitalaga mo tamaiti e toe foi atu i le aoga, sa fesili mai ai se sui puleaoga ia te a’u, “O oe lea o le tina sa tusia le tusi e uiga i siva a le aoga?”
“Ioe, o lea lava,” na ou tali atu ai.
“Ou te manao ia e iloa o lau tusi sa mafua ai se vavaō tele!” o lana tala lea.
Sa ou iloa ai faatoa faatauanauina se tasi o puleaoga e faapea na manaomia ona fai ni suiga, ina ua ia fesili i ni nai tamaiti aoga mo ni o latou manatu. Sa tutusa lava tali a tamaiti uma: “Matou te le toe o lava i se isi siva a le aoga! E inosia tele na siva!”
Sa faapea loa ona faaaoga e le pulega ni tulafono mo amioga e faaalia i siva, lea o le a faamalosia i se siva mo le toe aega o aoga lea ua loma. Sa logoina e le puleaoga ia tamaiti aoga o le a faatonuina i latou e tuumuli pe a latou le usitaia ia tulafono.
Sa ou nofo faatali ma le naunautai i le toe foi mai o le ma atalii mai le siva o le toe aega o aoga. Ina ua taunuu mai, sa ia fai mai o tamaiti aoga o e sa taumafai ia sao mai le amioga tuai sa aveesea mai. Fai mai o ia o le siva sili lea ona manaia ua alu ai.
Sa ou tusi atu i le pulega, ma faafetai atu ia i latou mo le faia o lenei siva e tasi ua sili ona manaia a le aoga talu mai le tele o tausaga. Sa tali mai le sui puleaoga sa ou masani ai: “Faafetai lava mo le amataina o lena talanoaga i le tautotogo ua te’a. Ana leai lou manatu faaalia semanu matou te le agai i luma i lenei tulaga.”
Ua ou iloa talu mai lena taimi, o le tele o aoga i le matou itumalo ua faaaogaina nei tulafono fou mo siva, o lea la o le a mafai nei e le faitau afe o tamaiti aoga ona fiafia i siva a aoga.
Ou te tatalo ia faamanuia e le Alii i tatou uma ia maua le lototele e tautatala atu ai mo mea ua tatou talitonu i ai. Ua ou aoaoina e mafai e se tagata e toatasi ona faia se eseesega.