Aumaia o le Peraimeri i le Fale
O Le a Ou Mulimuli i le Fuafuaga a le Tama Faalelagi e ala i le Papatisoina ma Faamauina
E mafai ona e faaaogaina le lesona ma le gaoioiga lenei e aoao atili ai e uiga i le autu o le Peraimeri i le masina lenei.
O loo faamatala mai i le Tusi a Mamona e uiga i se vaega o tagata o e sa faapotopoto faatasi i se togavao na ta’ua o Mamona. Sa latou fia faalogo ia Alema o aoao atu e uiga i le talalelei a Iesu Keriso. Ina ua uma ona aoaoina i latou e Alema mo ni aso se tele, sa ia fesili atu ia i latou pe mananao e osi se feagaiga e auauna atu i le Atua ma tausi Ana poloaiga. Sa ia ta’u atu ia i latou afai o le a latou papatiso, o le a faatasi pea le Agaga Paia ma i latou (tagai i le Mosaea 18:7–10).
Ina ua latou faalogo i lenei mea, sa matuai fiafia tagata o lea sa “pati [ai] o latou lima i le olioli” (Mosaea 18:11). Sa papatisoina e Alema pe tusa ma le 200 tagata i le Vai o Mamona. Sa manatu nei tagata o le vao o Mamona o se nofoaga matagofie aua o iina sa latou aoao ai e uiga i le Faaola ma sa papatisoina ai (tagai Mosaea 18:30).
E pei o le nuu o Alema, tatou te lagona le olioli a o tatou tulimatai atu i le papatisoga pe manatua foi le papatisoina. E pei o na tagata, a tatou papatiso, ua tatou osia se feagaiga ma le Atua. Ua tatou folafola atu e tausi Ana poloaiga ma auauna atu ia te Ia. Tatou te tauave i o tatou luga le suafa o Iesu Keriso ma avea ma tagata o Lana Ekalesia. Pe a faamauina i tatou, tatou te maua lena lava folafolaga matagofie lea na maua e le nuu o Alema: o le a faatasi pea le Agaga Paia ma i tatou, pe afai tatou te tausia poloaiga a le Atua.
Ata na tusia e Dani Jones